សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ មន្ត្រីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា បច្ចុប្បន្ន កម្ពុជាកំពុងប្រមូលផលស្រូវសរុបឆ្នាំ២០២៤ បានប្រមាណ ១៣ លានតោន លើសឆ្នាំមុនប្រមាណកន្លះលានតោន និងលើសកាលពី៥ឆ្នាំមុនប្រមាណ ៣ លានតោន ហើយកំពុងបន្តប្រមូលផលស្រូវចុងរដូវដែលជាប្រភេទស្រូវធ្ងន់ប្រមាណកន្លះ(០,៥)លានតោនទៀត ឬប្រមាណជាង៥ភាគរយនៃទិន្នផលសរុបប្រចាំឆ្នាំ២០២៤។
ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម បានលើកឡើងថា៖ នេះជាជោគជ័យដ៏ធំមួយនៃផ្នែកផលិតកម្មស្រូវក្នុងការធានាបាននូវសន្តិសុខស្បៀងជូនជាតិ និងចូលរួមចំណែកដល់សេដ្ឋកិច្ចជាតិ តាមរយៈការនាំចេញស្រូវ – អង្ករ ក្នុងបរិមាណជាមធ្យម៦លានតោនស្រូវក្នុងមួយឆ្នាំ។
ឯកឧត្តម បណ្ឌិត បានកត់សម្គាល់ដែរថា ៖
«គិតមកដល់ដើមខែធ្នូ ឆ្នាំ២០២៤ នេះនៅទូទាំងប្រទេស យើងប្រមូលផលស្រូវសរុបបានចំនួនជាង ១២ លានតោន ឬស្មើនឹងជាង៩០ ភាគរយ នៃបរិមាណផលស្រូវប្រមូលសរុប។ ជាទូទៅ កសិករទទួលបានតម្លៃសមរម្យពីការលក់ផលស្រូវទាំងនេះ ជាពិសេស ស្រូវផ្ការំដួល សុម៉ាលី សែនក្រអូប និងស្រង៉ែ ដែលជាប្រភេទស្រូវមានតម្រូវការខ្ពស់សម្រាប់ការនាំចេញ»។
ឯកឧត្តមបណ្ឌិត យ៉ង សាំងកុមារ បានបញ្ជាក់ទៀតថា ៖
«បច្ចុប្បន្នយើង កំពុងបន្តប្រមូលផលស្រូវចុងរដូវ (Late season rice) ដែលជាប្រភេទស្រូវធ្ងន់ នៅសល់ប្រមាណកន្លះលានតោនទៀត ឬប្រមាណជាង៥ភាគរយ នៃផលសរុបប្រចាំឆ្នាំ២០២៤ ។ ក្រុមស្រូវធ្ងន់ទាំងនេះរួមមានដូចជា នាងខុន រាំងជ័យ និងពូជចម្រុះផ្សេងទៀត ជាស្រូវដែលកសិករនិយមដាំសម្រាប់ទុកបរិភោគ(ដាំបាយឡើង) និងកែច្នៃធ្វើជានំបញ្ចុក គុយទាវ ។ល។ »។
គួរបញ្ជាក់ដែរថា ចំពោះប្រភេទស្រូវធ្ងន់មានតម្រូវការទីផ្សារក្នុងស្រុកច្រើន តែមិនសូវមានតម្រូវការក្នុងការនាំចេញនោះទេ ដោយសារភាគច្រើនស្រូវនេះបាយមិនសូវទន់ គ្រាប់រាងខ្លី ខណៈដែលតម្រូវការទីផ្សារអង្ករកម្ពុជានៅក្រៅប្រទេស គេនិយមអង្ករគ្រាប់វែង (ចាប់ពី ៦,៦ mm ឬបណ្តោយគ្រាប់អង្ករស្មើនឹង៤ ទៅ៥ ដងនៃទទឹង) មានគុណភាពល្អ ក្លិនក្រអូប និងបាយទន់។ ទោះជាយ៉ាងណាក៏ដោយ ក្រសួងកសិកម្ម សហការជាមួយ សហព័ន្ធស្រួវអង្ករ និងធនាគារ ARDB បានបន្តយកចិត្តទុកដាក់ជួយដោះស្រាយបញ្ហាទីផ្សារ និងតម្លៃស្រូវធ្ងន់ ឬស្រូវចុងរដូវជូនកសិករ ដោយក្នុងនោះមានរោងម៉ាស៊ីនកិនស្រូវធំៗចំនួន១៤ និងរោងម៉ាស៊ីនដែលកិនស្រូវលក់ក្នុងស្រុកផ្សេងទៀត ប្រមូលទិញស្រូវធ្ងន់ក្នុងតម្លៃនៅរោងម៉ាស៊ីនចាប់ពី៩០០ រៀលក្នុងមួយគីឡូក្រាម។
ជាក់ស្តែង នៅក្នុងការចុះវាយតម្លៃស្ថានភាពប្រមូលផលស្រូវធ្ងន់ នាងខុន នៅឃុំព្រៃស្វាយ ស្រុកមោងឬស្សី ខេត្តបាត់ដំបង កាលពីថ្ងៃចុងសប្ដាហ៍កន្លងទៅឃើញថា នៅសល់តែប្រភេទស្រូវធ្ងន់ចុងរដូវ ដូចជានាងខុន ប្រមាណ១៥០០ ហិកតា ស្មើនឹងផលប្រហែល ៥០០០ តោន ដែលនឹងចាប់ផ្តើមប្រមូលផលនៅចុងសប្តាហ៍ក្រោយ រហូតដល់ដើមខែមករា ឆ្នាំ២០២៥ នឹងត្រូវបញ្ចប់រួចរាល់។
នៅក្នុងឱកាសជាមួយគ្នានេះ ឯកឧត្តមបណ្ឌិត យ៉ង សាំងកុមារ ក៏បានណែនាំឱ្យលោកមន្ត្រីមេឃុំ ក៏ដូចជាមន្រ្តីកសិកម្មប្រចាំឃុំ ក៏ដូចជាមេភូមិ ត្រូវរៀបចំជាផែនការប្រមូលផលដោយកំណត់ថ្ងៃប្រមូលផល ឱ្យបានត្រឹមត្រូវ ជាពិសេសទីកន្លែងប្រមូលផ្តុំ ដើម្បីងាយស្រួលដល់ការដឹកជញ្ជូន។
Account
Security
Favourite Content