បរទេស៖ តម្លៃមាសឡើងថ្លៃជាង ៥ ៧០០ ដុល្លារក្នុងមួយតម្លឹង ដោយសារបញ្ហាភូមិសាស្រ្តនយោបាយរវាងអាម៉េរិក និងអឺរ៉ុបកាន់តែតានតឹងពាក់ព័ន្ធនឹងកោះ Greenland នេះបើយោងតាមការរាយការណ៍ពី Kitco។

តម្លៃមាសឡើងថ្លៃដល់ជាង ៤ ៧៣៧ ដុល្លារក្នុងមួយអោននៅលើទីផ្សារអន្តរជាតិ (មាសមានតម្លៃ ៥ ៩០០ ដុល្លារក្នុងមួយតម្លឹង និង ៥៩០ ដុល្លារក្នុងមួយជីនៅលើទីផ្សារកម្ពុជា)។ ភាពតានតឹងជុំវិញកោះ Greenland បានកើនឡើងបន្ទាប់ពីមានការចាប់ខ្លួនមេដឹកនាំវេណេហ្ស៊ុយអេឡា ដែលកាន់តែធ្វើឲ្យទីផ្សារមាសកាន់តែឡើងថ្លៃ។

កាលពីថ្ងៃច័ន្ទដើមសប្ដាហ៍នេះ ប្រធានាធិបតីអាម៉េរិក លោក Donald Trump បានគំរាមដំឡើងពន្ធបន្ថែម ១០% លើការនាំចូលទំនិញពីចក្រភពអង់គ្លេស និងប្រទេសសហភាពអឺរ៉ុបចំនួន ៧ ទៀតដែលសុទ្ធតែជាសម្ព័ន្ធមិត្តរបស់ណាតូ។ ពន្ធថ្មីនេះនឹងបន្ថែមពីលើពន្ធដែលមានស្រាប់ សរុបចូលគ្នា ២៥% និងចូលជាធរមានចាប់ពីថ្ងៃទី ១ ខែកុម្ភៈ ឆ្នាំ២០២៦ រហូតដល់ពេលដែលមានកិច្ចព្រមព្រៀងមួយដែលអាចឲ្យទីក្រុងវ៉ាស៊ីនតោនទិញកោះ Greenland ពីដាណឺម៉ាក។ មិនត្រឹមតែប៉ុណ្ណោះ លោក Trump បានបង្ហាញពីផែនការបន្តដំឡើងពន្ធរហូតដល់ ១០០% ប្រសិនបើអឺរ៉ុបបន្តរារាំងលោកពីការកាន់កាប់កោះ Greenland ។ ការគំរាមកំហែងរបស់អាម៉េរិកចំពោះអឺរ៉ុប ដែលជាសម្ព័ន្ធមិត្តរបស់ខ្លួននៅក្នុងអង្គការណាតូ បានធ្វើឱ្យទីផ្សារមាសកើនឡើងតម្លៃ ដែលជំរុញពីការកើនឡើងនៃតម្រូវការទៅលើទ្រព្យសម្បត្តិដែលមានសុវត្ថិភាព។

ពេលនេះ បណ្តាអ្នកវិនិយោគកំពុងតាមដានការឆ្លើយតបរបស់អឺរ៉ុបចំពោះការគំរាមកំហែងរបស់ប្រធានាធិបតី លោក Donald Trump ដែលដំឡើងពន្ធលើប្រទេសចំនួន ៨ ដែលប្រឆាំងនឹងមហិច្ឆតារបស់លោកក្នុងការកាន់កាប់កោះ Greenland។  ទន្ទឹមនឹងនេះ បណ្តាមេដឹកនាំប្រទេសមួយចំនួន រួមមានទាំងលោក Trump ផងដែរនោះ កំពុងចូលរួមវេទិកាសេដ្ឋកិច្ចពិភពលោក (WEF) ប្រចាំឆ្នាំនៅទីក្រុង Davos នៃប្រទេសស្វីស ហើយពួកគេអាចនឹងពិភាក្សាគ្នាបន្ថែមទៀតអំពីអនាគតកោះ Greenland។ យ៉ាងណាមិញ ទំនាក់ទំនងរវាងអឺរ៉ុប និងអាម៉េរិក ហាក់នៅមានភាពតានតឹង ខណៈដែលប្រធានាធិបតីបារាំង លោក Emmanuel Macron បានបដិសេធមិនចូលរួមការប្រឹក្សាសន្តិភាពសម្រាប់ Gaza ដែលបានស្នើឡើងដោយលោក Trump ។ បន្ទាប់ពីលោក Macron បដិសេធមិនចូលរួមកិច្ចប្រជុំនេះ លោក Trump បានគំរាមដំឡើងពន្ធលើស្រាសំប៉ាញនាំចូលពីបារាំងរហូតដល់ប្រមាណ ២០០% ។  មិនត្រឹមតែប៉ុណ្ណោះ ជម្លោះផ្ទៃក្នុងរវាងរដ្ឋបាល Trump និងធនាគារកណ្តាលអាម៉េរិក Federal Reserve ក៏បានជំរុញឲ្យតម្លៃមាសឡើងថ្លៃផងដែរ។