ភ្នំពេញ ៖ កាលពីពេលថ្មីៗកន្លងទៅនេះ​ ក្រុមប្រឹក្សាធុរកិច្ចកាណាដា-អាស៊ាន ព្រមទាំងក្រុមហ៊ុន Manulife Cambodia បានរៀបចំនូវកិច្ចប្រជុំតុមូលមួយ។ កិច្ចប្រជុំតុមូលនេះផងដែរ ត្រូវបានរៀបចំឡើង​ក្នុងគោលបំណងជំរុញនូវការជជែកពិភាក្សាដោយបើកចំហរទៅ​លើយុទ្ធសាស្ត្រជាក់ស្តែង ដើម្បីពង្រឹង​​កិច្ចសហការរវាងប្រទេសទាំង២ ឱ្យកាន់តែជិតស្និទ្ធលើវិស័យសំខាន់ៗដូចជា៖ សេវាកម្ម ហិរញ្ញវត្ថុ កសិកម្ម ថាមពលបៃតង បច្ចេកវិទ្យា និងហេដ្ឋារចនាសម្ព័ន្ធ។ មិនត្រឹមតែប៉ុណ្ណោះ កិច្ចប្រជុំតុមូលនេះ គឺជាវេទិកាមួយសម្រាប់អាជីវកម្មកាណាដា​ ដែលកំពុង​ធ្វើប្រតិបត្តិការនៅក្នុងប្រទេសកម្ពុជា និងក្រុមហ៊ុនកម្ពុជាដែលចាប់អារម្មណ៍ចង់វិនិយោគនៅ​ប្រទេសកាណាដា ក្នុងការចែករំលែកចំណេះដឹង និងបញ្ហាប្រឈម។

ក្នុងនោះ ឯកឧត្តមសាស្ត្រាចារ្យបណ្ឌិតសភាចារ្យ សុខ ស៊ីផាន់ណា ទេសរដ្ឋមន្ត្រីទទួលបន្ទុក​បេសកកម្មពិសេស និងជាប្រធានគណៈកម្មាធិការផ្ដល់យោបល់លើគោលនយោបាយពាណិជ្ជកម្ម បានសង្កត់ធ្ងន់លើការប្តេជ្ញាចិត្តរបស់កម្ពុជា ក្នុងការអភិវឌ្ឍន៍សេដ្ឋកិច្ចប្រកបដោយចីរភាព និងស្វាគមន៍កិច្ចសហការកាន់តែស៊ីជម្រៅជាមួយដៃគូកាណាដា។

ឯកឧត្តមសាស្ត្រាចារ្យបណ្ឌិតសភាចារ្យ បានមានប្រសាសន៍ថា អាជីវកម្មនៅ​កម្ពុជា​កំពុងត្រូវការអ្នកដែលមានបទពិសោធន៍លើវិស័យថាមពលស្អាត ហើយកាណាដា គឺជាប្រទេសដែលមានបទពិសោធន៍ខ្ពស់លើវិស័យនេះស្រាប់។ ដោយឡែក សម្រាប់វិស័យកែច្នៃម្ហូបអាហារវិញក៏ដូចគ្នា កាណាដា ជាប្រទេសដែលមានបទពិសោធន៍ខ្ពស់លើផ្នែកនេះ ខណៈដែលរដ្ឋាភិបាលកម្ពុជាកំពុងជំរុញវិស័យនេះឱ្យកាន់តែផុសផុលនៅក្នុងស្រុក។

ឯកឧត្តមបានបន្តសង្កត់ធ្ងន់ថា៖

« បច្ចុប្បន្ន កម្ពុជាកំពុងតែសម្លឹងរកច្រកទីផ្សារថ្មីៗបន្ថែមទៀត ហើយខ្ញុំគិតថា កាណាដា គឺជាដៃគូដ៏ស័ក្ដិសមសម្រាប់យើងជាដៃគូដែលរឹងមាំ និងមានស្ថិរភាពនៅលើទីផ្សារអន្តរជាតិ»។

ក្នុងឱកាសជាមួយគ្នានេះ លោក Wayne Farmer ប្រធានក្រុមប្រឹក្សាធុរកិច្ចកាណាដា-អាស៊ាន បានកត់សម្គាល់ថា កិច្ចប្រជុំតុមូលនេះបានឆ្លុះបញ្ចាំងពីចក្ខុវិស័យរួមរបស់ភាគីទាំងពីរ ​ក្នុងការពង្រីក​ទំនាក់ទំនងសេដ្ឋកិច្ចកាណាដា-កម្ពុជា តាមរយៈការសន្ទនា និងកិច្ចសហការអាជីវកម្មជាក់ស្តែង។

បន្ថែមពីនេះ លោកក៏កំពុងកៀរគរប្រមូលធុរជនកាណាដា ឱ្យមកដាក់ការវិនិយោគនៅកម្ពុជាបន្ថែមទៅលើវិស័យសក្កានុពលដែលបានលើកឡើងនៅក្នុងកិច្ចប្រជុំ ហើយលោកក៏មានក្ដីរំពឹងចង់ឃើញធុរជនកម្ពុជា ទៅបណ្ដាក់ទុនធ្វើអាជីវកម្មនៅប្រទេសកាណាដាវិញដូចគ្នា។

លោក ចាន់ រដ្ឋា អគ្គនាយក ក្រុមហ៊ុន មេនូឡាយហ្វ៍ ខេមបូឌា បានបញ្ជាក់បន្ថែមថា៖

«កិច្ចសហការរបស់យើងជាមួយធុរកិច្ចកាណាដា មិនត្រឹមតែនាំមកនូវការវិនិយោគមកកម្ពុជាប៉ុណ្ណោះទេ ប៉ុន្តែថែមទាំងជំរុញការបង្កើតថ្មី និងកំណើនសេដ្ឋកិច្ចប្រកបដោយចីរភាពផងដែរ»។

សម្រាប់ក្រុមហ៊ុន Manulife  ការចូលរួមចំណែករៀបចំកិច្ចប្រជុំខាងលើនេះ ជាការងារដ៏សំខាន់មួយ​ដែលអាចឱ្យក្រុមហ៊ុនទទួលបាននូវទស្សនវិស័យថ្មីៗ ជាពិសេសយល់ដឹងអំពីយុទ្ធសាស្ត្រ​ដើម្បីពង្រឹងសមត្ថភាពរបស់ពួកគេក្នុងការបម្រើអតិថិជន និងរួមចំណែកដល់ការអភិវឌ្ឍន៍​សេដ្ឋកិច្ច​របស់ប្រទេសទាំងពីរផងដែរ។

គួរបញ្ចាក់ថា កិច្ចប្រជុំខាងលើនេះបានប្រមូលផ្ដុំធុរជន និងថ្នាក់ដឹកនាំមកពីស្ថាប័នរដ្ឋាភិបាល និងវិស័យឯកជនទាំងពីរប្រទេសគឺ កម្ពុជា និងកាណាដា ដើម្បីស្វែងរកឱកាសសម្រាប់ការពង្រឹងកិច្ចសហប្រតិបត្តិការសេដ្ឋកិច្ចរបស់ប្រទេសទាំងពីរ។ ក្រុមហ៊ុនដែលចូលរួមរួមមាន ធនាគារ ABA, WorldBridge, OCIC, Chip Mong Group និង Mekong Strategic Capital៕