សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ឆ្នាំនេះមានការព្យាករណ៍អំពីប្រាក់ចំណូលរបស់បណ្តាក្រុមហ៊ុនអាកាសចរទាំងឡាយរបស់ពិភពលោកនឹងមានការធ្លាក់ចុះគួរឲ្យកត់សម្គាល់ ជាពិសេស ចាប់តាំងតែពីពេលដែលបញ្ហាសង្គ្រាមពាណិជ្ជកម្មដែលបង្កឡើងដោយសហរដ្ឋអាមេរិកបានផ្ទះឡើង។
សមាគមដឹកជញ្ជូនតាមផ្លូវអាកាសអន្តរជាតិ ហៅកាត់ថា IATA បានបង្ហាញពីការស្ទាបស្ទង់របស់ខ្លួនថា ប្រាក់ចំណូលសរុបបញ្ចូលគ្នានៃក្រុមហ៊ុនអាកាសចរទាំងអស់សម្រាប់ឆ្នាំ២០២៥នេះអាចធ្វើបានត្រឹមតែ៣៦ពាន់លានដុល្លារប៉ុណ្ណោះដែលតួលេខនេះមានការធ្លាក់ចុះប្រមាណជា៦០០លានដុល្លាររួចទៅហើយធៀបទៅនឹងការព្យាករណ៍កាលពីខែធ្នូ ឆ្នាំ២០២៤ ពោលគឺត្រឹមតែប៉ុន្មានខែប៉ុណ្ណោះក្រោយពេលដែលរដ្ឋបាលលោក Donald Trump បានត្រឡប់មកកាន់តំណែងសាជាថ្មី។
ដូចដែលបានគ្រោងទុក ប្រធានាធិបតីអាមេរិក លោក Donald Trump ចាប់ផ្តើមបង្កបញ្ហា និងប្រកាសសង្គ្រាមពាណិជ្ជកម្មជាមួយនឹងបណ្តាប្រទេសទាំងឡាយលើពិភពលោក ជាពិសេសប្រទេសចិន ហើយថែមទាំងបានអនុវត្តគោលនយោបាយសំខាន់ៗផ្សេងទៀត ដូចជាកាត់បន្ថយមូលនិធិមនុស្សធម៌ និងការរឹតបន្តឹងជនអន្តោប្រវេសជាដើម។
ថ្លែងនៅក្នុងកិច្ចប្រជុំប្រចាំឆ្នាំមួយកាលពីពេលថ្មីៗនេះ ប្រធានសមាគមដឹកជញ្ជូនតាមផ្លូវអាកាសអន្តរជាតិ (IATA) លោក Willie Walsh បានធ្វើការពន្យល់បន្ថែមអំពីកត្តាដែលបានជះឥទ្ធិពលទៅដល់ប្រាក់ចំណូលធ្លាក់ចុះរបស់ក្រុមហ៊ុនអាកាសចរ រួមជាមួយនឹងបណ្តាក្រុមការងារជាអ្នកសារព័ត៌មានមួយចំនួនផងដែរ។
កាសែតរ៉យទ័របានដកស្រង់សំដីរបស់លោក Walsh ថា៖
«ទោះបីជាប្រាក់ចំណេញដែលយើងបានព្យាករណ៍ធ្លាក់ចុះក្តី ប៉ុន្តែតម្លៃថ្លៃដើមរបស់យើងក៏ធ្លាក់ចុះដែរ ហើយជាលទ្ធផល យើងនឹងអាចមើលឃើញប្រាក់ចំណូលសរុបរបស់ក្រុមហ៊ុនអាកាសចរដែលអាចធ្វើបាន៣៦ពាន់លានដុល្លារ។ តួលេខនេះ មើលទៅពិតជាធំ និងល្អខ្លាំងណាស់ ប៉ុន្តែបើគិតជាអត្រាកំណើនវិញ យើងទទួលបានត្រឹមតែ៣,៧ភាគរយប៉ុណ្ណោះពោលគឺជាអត្រាកំណើនស្តួចស្តើងបំផុតសម្រាប់ឧស្សាហកម្មធ្វើដំណើរតាមផ្លូវអាកាស»។
លោកបន្ថែមដែរថា ក្រៅពីនេះ ចំពោះបញ្ហានៃការពន្យាពេលក្នុងការផ្គត់ផ្គង់យន្តហោះដឹកជញ្ជូនថ្មីៗវាក៏ជាមូលហេតុរួមផ្សំដែលបង្កឲ្យមានបញ្ហាដល់ប្រាក់ចំណូលនៅក្នុងឧស្សាហកម្មនេះផងដែរ។
ក្រុមហ៊ុនអ្នកផលិតយន្តហោះធំៗរបស់ពិភពលោក ដូចជា Boeing និង Airbus សុទ្ធតែអះអាងដូចគ្នាថា កំពុងជួបបញ្ហាសង្វាក់ផ្គត់ផ្គង់ ហើយមិនត្រឹមតែប៉ុណ្ណោះ ក្រុមហ៊ុនអឺរ៉ុបទាំងនេះក៏បានព្រមានដែរថាការផ្គត់ផ្គង់យន្តហោះថ្មីៗនឹងអាចបន្តពន្យាពេលយ៉ាងហោចណាស់៣ឆ្នាំទៀត។ បញ្ហានេះនឹងធ្វើឲ្យក្រុមហ៊ុនអាកាសចរត្រូវបង្ខំដំណើរការយន្តហោះចាស់ៗ ដែលមិនមានប្រសិទ្ធភាពខ្ពស់នោះទេ។
កាន់តែលំបាកជាងនេះទៀត លោកបានពន្យល់ថា ក្រុមហ៊ុនអាកាសចរជាច្រើន នឹងជួបប្រទះបញ្ហាកើនឡើងនៃតម្លៃគ្រឿងបន្លាស់សំខាន់ៗ បើទោះបីជាបច្ចុប្បន្នតម្លៃប្រេងសាំងកំពុងបន្តធ្លាក់ចុះក្តី។
ក្នុងនោះផងដែរ IATA បានព្យាករណ៍ថា ប្រាក់ចំណេញនៃជើងហោះហើរសម្រាប់ដឹកទំនិញ ឬ Cargo នឹងមានការធ្លាក់ចុះប្រមាណជា ៤,៧ភាគរយ ដោយសារតែបញ្ហាការតម្លើងពន្ធគយដាក់គ្នា និងដោយសារតែកំណើនសេដ្ឋកិច្ចសកលមានភាពយឺតយ៉ាវផង៕
Account
Security
Favourite Content