បច្ចេកវិទ្យាកាន់តែទំនើប បងប្អូនយើងមានទូរស័ព្ទវៃឆ្លាត (Smart phone) កាន់ស្ទើរគ្រប់ដៃ ហើយការផ្សព្វផ្សាយព័ត៌មាន ក៏ដូចជាការចែករំលែកចំណេះដឹងក៏កាន់តែមានច្រើន សូម្បីតែបច្ចេកទេសដាំដុះដំណាំក៏ងាយស្រួលរក។ ចំពោះអ្នកដែលចង់រៀនបច្ចេកទេសដាំដុះដំណាំងាយៗ ក៏អាចរៀនបានពីគេហទំព័រមួយចំនួនដូចខាងក្រោម។

តួយ៉ាង រៀនដាំ ជាគេហទំព័រមួយដែលមានចែករំលែកចំណេះដឹងកសិកម្មចម្រុះ ការចិញ្ចឹមសត្វ ក៏ដូចជាបទពិសោធន៍ផ្ទាល់របស់ម្ចាស់កសិដ្ឋានតែម្ដង តាមរយៈវីដេអូបង្រៀន និងការប្រឹក្សាយោបល់ផងដែរ។

លោក នី ប៊ុនថា មានទីលំនៅ ស្រុកស្រែអំបិល ខេត្តកោះកុង និងជាស្ថាបនិក «រៀនដាំ» បានមានប្រសាសន៍ថា៖

«គោលបំណងដែលយើងបង្កើតផេកនេះគឺដោយតែយើងចង់ផ្សព្វផ្សាយបន្តនូវចំណេះដឹង និងបច្ចេកទេសកសិកម្មទំនើបទៅដល់បងប្អូនកសិករយើង ដោយឥតគិតថ្លៃនៅលើហ្វេសប៊ុក និង YouTube «រៀនដាំ» ក៏មានសេវាកម្មបង្រៀនវគ្គពិសេសជាវីដេអូអំពីការចិញ្ចឹមមាន់ និងដាំដំណាំលើទឹក ដែលមួយវគ្គមានតម្លៃ ៣៥ដុល្លារផងដែរ»។

គួរបញ្ជាក់ដែរថា លោក នី ប៊ុនថា បានចាប់ផ្ដើមបង្កើតគេហទំព័រ «រៀនដាំ» នៅឆ្នាំ២០១៨ ក្រោយលោកចាប់ផ្ដើមការដាំដុះ និងអនុវត្តបច្ចេកទេសទំនើបបន្តពីគ្រួសារ ដែលជាចែករំលែកដល់អ្នកដែលចូលចិត្តដាំដំណាំជុំវិញផ្ទះឱ្យបានដឹងកាន់តែច្រើនពីការអនុវត្តកសិកម្មបែបទំនើប និងទទួលបានទិន្នផលកាន់តែច្រើន។

ស្រដៀងគ្នានេះដែរ កម្មវិធី ចំការ (Chamka) ជាកម្មវិធីទូរសព្ទថ្មីមួយដែលត្រួវបានបង្កើតឡើងក្នុងគោលបំណងជួយសម្រួលដល់ការដាំដុះ ផ្ដល់ចំណេះដឹង ក៏ដូចជាបច្ចេកទេសកសិកម្មថ្មីៗដល់បងប្អូនកសិករនៅទូទាំងប្រទេស។

លោក សេស ប៊ុនធឿន ជាអ្នកគ្រប់គ្រង App ចំការ បានមានប្រសាសន៍ទាក់ទងទៅនឹងគោលបំណងនៃការបង្កើត app នេះថា ៖

«គោលបំណងរបស់ក្រុមយើង គឺចង់ជួយទៅកាន់កសិករនៅទូទាំងប្រទេស ដែលស្របទៅនឹងពាក្យស្លោករបស់យើងថា កសិដ្ឋាននៅក្បែរអ្នកជានិច្ច មានន័យថា គាត់មានតែកម្មវិធីនេះមួយ គឺដូចជាគាត់នៅជិតអ្នកបច្ចេកទេសកសិកម្ម ហើយវាក៏ជាផ្នែកមួយជួយលើកកម្ពស់សេដ្ឋកិច្ចរបស់កសិករយើងផងដែរ»។

សូមជម្រាបដែរថា App ចំការ ជាកម្មវិធីដែលមានផ្ទុកនូវចំណេះដឹងកសិកម្មល្អជាច្រើនមិនថាការដាំដំណាំ ចិញ្ចឹមសត្វ ការទិញដូរសម្ភារកសិកម្ម និងផ្នែកជាច្រើនផ្សេងទៀតដែលបងប្អូនកសិករអាចទាញយក និងយកមកអនុវត្តបាន។

តាមរយៈបណ្ដាញផ្សព្វផ្សាយទាំងពីរខាងលើ បងប្អូនដែលចង់បានចំណេះដឹងកសិកម្មបន្ថែមគឺអាចរកបានដោយងាយស្រួល មិនថាការទាញយក App ឬមើលវីដេអូដែលគេបង្រៀន ចែលរំលែក គឺពិតជាងាយស្រួល និងជាការទាញយកប្រយោជន៍ពីបណ្ដាញសង្គម ជាជាងការមើលវីដេអូកម្សាន្តដែលពុំមានប្រយោជន៍អ្វីសោះ៕