សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រតិបត្តិករក្នុងវិស័យហិរញ្ញវត្ថុ បានលើកឡើងថា មុនការបោះឆ្នោតជ្រើសតាំងតំណាងរាស្រ្តអាណត្តិទី៧ ដែលប្រព្រឹត្តទៅ កាលពីថ្ងៃទី ២៣ ខែកក្កដា ឆ្នាំ២០២៣ ប្រជាពលរដ្ឋមិនបានសម្រុកទៅដកប្រាក់ពីធនាគារ និងគ្រឹះស្ថានហិរញ្ញវត្ថុនោះទេ ផ្ទុយទៅវិញ ពួកគាត់បែរជាបង្កើនប្រាក់បញ្ញើសន្សំនៅច្រើនជាងមុន ពោលគឺប្រជាជនមានទំនុកចិត្តកាន់តែខ្លាំងជាងមុនលើប្រព័ន្ធធនាគារនៅកម្ពុជា។
លោកបណ្ឌិត អ៊ិន ចាន់នី ប្រធាននាយកប្រតិបត្តិនៃធនាគារអេស៊ីលីដា បានថ្លែងប្រាប់ថា ការបោះឆ្នោតឆ្នាំនេះ បានប្រព្រឹត្តទៅដោយមានភាពរលូន និងសុវត្ថិភាព ដោយសារប្រជាជនកាន់តែភាពចំណេះដឹង និងភាពចាស់ទុំច្រើនជាងមុន ដោយមិនមានការសម្រុកទៅដកពីធនាគារនោះទេ ប៉ុន្តែមានតែបានបង្កើនប្រាក់បញ្ញើសន្សំនៅធនគារ និងគ្រឹះហិរញ្ញវត្ថុទទួលប្រាក់បញ្ញើទៅវិញ។ ការណ៍នេះបានបញ្ជាក់ឱ្យឃើញថា ប្រជាពលរដ្ឋមានទំនុកចិត្តកាន់តែខ្លាំងជាងមុនលើប្រព័ន្ធធនាគារនៅកម្ពុជា។
លោកបណ្ឌិត បានបន្តថា តាមការសង្កេត ការបោះឆ្នោត ឆ្នាំ ២០២៣ នេះ បានប្រព្រឹត្តទៅដោយមានភាពរលូន និងសុវត្ថិភាព បើយើងប្រៀបទៅនឹងឆ្នាំ ២០១៣ និង ឆ្នាំ ២០១៨។ នៅឆ្នាំ ២០១៣ ប្រជាជនបានដកប្រាក់ច្រើនលានដុល្លារពីធនាគារ មុនពេលបោះឆ្នោតនាពេលនោះ ប៉ុន្តែដល់ឆ្នាំ ២០១៨ មិនមានការប្រែប្រួលនោះទេ ពោលគឺប្រព័ន្ធធនាគារមានដំណើរការធម្មតា។
លោកបណ្ឌិត អ៊ិន ចាន់នី បានថ្លែងបញ្ជាក់ដូច្នេះថា ៖
“ប៉ុន្តែឆ្នាំ ២០២៣ នេះ ខុសពីការបោះឆ្នោតកាលពីលើកមុនៗ ត្រង់ថា ប្រាក់បញ្ញើសន្សំនៅធនាគារមានការកើនឡើងគួរទីកត់សម្គាល់ ពោលគឺមានកំណើនប្រមាណ ៨ ភាគរយ គឺមានទឹកលុយប្រមាណជា ៦ ៧៤០ លានដុល្លារ។”
លោកបណ្ឌិត ៖
“ខ្ញុំអាចរាប់បានថា ការបោះឆ្នោតនេះ គឺមានស្ថិរភាពជាទំផុត ត្រង់ថា ប្រជាជនមានការជឿជាក់លើបរិកាសនយោបាយ អំឡុងពេលបោះឆ្នោត … ដល់គាត់ទុកចិត្តអ៉ីចឹងទៅ គាត់ដាក់លុយថែម។ វាខុសពីឆ្នាំ ២០១៣ និង ២០១៨។”
លោកបណ្ឌិត បានថ្លែងបន្តថា អំឡុងពេលបោះឆ្នោត យើងសង្កេតឃើញថា ប្រជាជនមានភាពសប្បាយរីករាយ និងចាស់ទុំច្រើន ក្នុងការចូលរួមបោះឆ្នោត បើធៀបនឹងការបោះឆ្នោតលើកមុនៗ។
ដោយឡែក ទាក់ទងនឹងប្រព័ន្ធធនាគារនៅកម្ពុជា លោកបណ្ឌិត អ៊ិន ចាន់នី បានឱ្យដឹងថា ស្ថានភាពរបស់ប្រព័ន្ធធនាគារ នាឆ្នាំ ២០២៣ នេះនៅតែបន្តមានភាពរឹងមាំ និងរីកចម្រើន ព្រោះប្រជាពលរដ្ឋមានទំនុកចិត្តខ្លាំងលើប្រព័ន្ធធនាគារ តាមរយៈការប្រើប្រាស់សេវាហិរញ្ញវត្ថុសម្បូរបែបរបស់ធនាគារ និងគ្រឹះស្ថានហិរញ្ញវត្ថុ ពិសេសបច្ចេកវិទ្យាហិរញ្ញវត្ថុ ដែលផ្តល់អត្ថប្រយោជន៍យ៉ាងច្រើនដល់អ្នកប្រើប្រាស់។
សូមបញ្ជាក់ផងដែរថា នៅដំណាច់ឆ្នាំ ២០២២ វិស័យធនាគារមានកំណើនប្រមាណ ២០ ភាគរយ ទាំងសំពៀតឥណទាន និងប្រាក់បញ្ញើ។ ទ្រព្យសកម្មរបស់វិស័យធនាគារមានកំណើនប្រមាណ ១៣% (ដល់ ២៧៨ ទ្រីលានរៀល ស្មើនឹងជិត ៦៨ ពាន់លានដុល្លារ), ឥណទានអតិថិជនកើនឡើង ១៩% (ដល់ ១៨៨ ទ្រីលានរៀល ស្មើនឹង ៤៦ ពាន់លានដុល្លារ), ប្រាក់បញ្ញើអតិថិជនមានកំណើន ៩,៩% (ដល់ ១៥៨ ទ្រីលានរៀល ស្មើនឹងជិត ៣៩ ពាន់លានដុល្លារ), និងគណនីប្រាក់បញ្ញើអតិថិជនកើនដល់ ១១,៧ លានគណនី និងគណនីឥណទានអតិថិជនដល់ ១,៥ លានគណនី៕
Account
Security
Favourite Content