ភ្នំពេញ ៖ ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្ម ឆ្នាំ២០២៣-២០៣៣ ដែលរាជរដ្ឋាភិបាលទើបបានអនុម័ត មាន ១៧៤ គម្រោង និងត្រូវការទុនវិនិយោគប្រមាណ ៣៦,៦ ពាន់លានដុល្លារអាមេរិក។ ជាមួយគ្នានេះ រដ្ឋាភិបាលត្រូវការការវិនិយោគ និងបណ្តាក់ទុនពីវិស័យឯកជនទាំងក្នុង និងក្រៅប្រទេស។ នេះបើតាមការឱ្យដឹងរបស់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ក្នុងឱកាសជួបពិភាក្សាការងារជាមួយអ្នកនាង Esra BORA នាយិកា​គ្រប់គ្រង​ទូទៅនៃក្រុមហ៊ុន CMA CGM (Cambodia) Co., Ltd. ប្រចាំប្រទេសកម្ពុជា/វៀតណាម កាលពីថ្ងៃដើមសប្ដាហ៍កន្លងទៅនេះ។

សូមជម្រាបថា ជំនួបនេះមានគោលបំណងដើម្បីស្វែងយល់អំពីទិដ្ឋភាពទូទៅ និងបច្ចុប្បន្នភាពនៃវិស័យហេដ្ឋារចនាសម្ព័ន្ធដឹកជញ្ជូន ក៏ដូចជាប្រព័ន្ធភស្តុភារកម្មនៅកម្ពុជា ដើម្បីបានជាគន្លឹះក្នុងការបង្កើនកិច្ចសហប្រតិបត្តិការ និងពង្រីកការវិនិយោគរវាងផ្នែករដ្ឋ និងវិស័យឯកជន។

នៅក្នុងឱកាសនោះ ឯកឧត្តមរដ្ឋមន្រ្តី បានចង្អុលបង្ហាញនូវកាលានុវត្តភាពវិនិយោគជាច្រើនក្នុងវិស័យដឹកជញ្ជូន និងភស្តុភារកម្ម ដោយបានជម្រាបជូនអំពីគម្រោងសំខាន់ធំៗ​ជាច្រើន ជាពិសេសគឺ ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្ម ២០២៣-២០៣៣ ដែលរាជរដ្ឋាភិបាលទើបបានអនុម័ត មាន១៧៤​គម្រោង និងត្រូវការទុនវិនិយោគប្រមាណ ៣៦,៦ ពាន់លានដុល្លារអាមេរិក។

អ្នកនាង Esra BORA នាយិកា​គ្រប់គ្រងក្រុមហ៊ុន CMA CGM បានសម្តែងនូវចំណាប់អារម្មណ៍ខ្ពស់លើចក្ខុវិស័យក្នុងការអភិវឌ្ឍប្រព័ន្ធដឹកជញ្ជូន និងវិស័យភស្តុភារកម្មនៅ​កម្ពុជា។

ជាមួយគ្នានេះ គណៈប្រតិភូក្រុមហ៊ុនបានសង្កត់ធ្ងន់លើគម្រោងធំៗចំនួន២ គឺគម្រោងអភិវឌ្ឍន៍កំពង់ផែពហុបំណងខេត្តកំពត និងគម្រោងអភិវឌ្ឍន៍មជ្ឍមណ្ឌល​ភស្តុភារកម្ម​ភ្នំពេញ ​ដោយរំពឹងថានឹងទទួលបានព័ត៌មានលម្អិតអំពីគម្រោងជាបន្តបន្ទាប់ ដើម្បីបានជាធាតុចូលក្នុងការសិក្សាឱ្យបានកាន់តែស៊ីជម្រៅមុននឹងឈានទៅរកកិច្ចសហការ​ណាមួយនាពេលអនាគត៕