សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រយៈពេល៩ខែ ឆ្នាំ២០២៥នេះ កម្ពុជាបានសម្រេចការនាំចេញផលិតផលដំណាំទៅក្រៅប្រទេសសរុបជាង ១១លានតោន គិតជាទឹកប្រាក់ប្រមាណជាង៣.៨៩ ពាន់លានដុល្លារសហរដ្ឋអាម៉េរិក ដែលចំនួននេះមានការកើនឡើងជាង ៣០ភាគរយ បើធៀបនឹងរយៈពេលដូចគ្នាកាលពីឆ្នាំ២០២៤។ នេះបើតាមរបាយការណ៍របស់អគ្គនាយកដ្ឋានកសិកម្ម នៅថ្ងៃទី០៧ ខែតុលា ឆ្នាំ២០២៥។
របាយការណ៍បានបញ្ជាក់ថា នៅក្នុងរយៈពេល៩ខែ ឆ្នាំ២០២៥នេះ ការនាំចេញផលិតផលដំណាំទៅក្រៅប្រទេស ដែលអគ្គនាយកដ្ឋានកសិកម្មទទួលបានផ្អែកលើប្រព័ន្ធទិន្នន័យគ្រឹះភូតតាមអនាម័យជាតិ (National Phytosanitary Database) មានបរិមាណសរុប ១១ ១៣១ ៦៨១.១៥តោន។ ក្នុងនោះ ផលិតផលដំណាំក្រៅពីស្រូវ-អង្ករចំនួន ៥ ២៨៧ ៣៤៥.៥៦តោន ត្រូវចំនួន ៥ ២៤៧ ៩៩២.៥៩តោន និងអង្ករចំនួន ៥៩៦ ៣៤៣តោន ទៅកាន់ទិសដៅ ៨៨ប្រទេស ដោយមានការកើនឡើងចំនួន ៣០.៤៣% បើធៀបនឹងរយៈពេលដូចគ្នាក្នុងឆ្នាំ២០២៤។
ក្រៅពីអង្ករ កម្ពុជានាំចេញកសិផលសំខាន់ៗជាច្រើនរួមមាន ដំឡូងមីស្រស់ប្រមាណ ២.០៥លានតោន ដំឡូងមីស្ងួត ១.៣៦លានតោន គ្រាប់ស្វាយចន្ទី ៦២៦.០០០តោន ស្វាយស្រស់ ២០៧.០០០តោន ស្វាយស្រស់ជិត ២៥២.០០០តោន ចេកស្រស់ ៥តោន ជាង ០០១ មៀនប៉ៃលិន ២១.៧៣៤ តោន និងផលិតផលដំណាំ ៩៥ ផ្សេងទៀត សរុបជាង ៦២១.០០០ តោន។
ឯកឧត្តម ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ក្នុងរបាយការណ៍ថា រយៈពេល៩ខែនៃឆ្នាំ២០២៥ ការនាំចេញដំណាំរបស់កម្ពុជាបានកើនឡើងប្រហែល ២.៦០ លានតោន បើធៀបនឹងរយៈពេលដូចគ្នាក្នុងឆ្នាំ២០២៤។ ក្នុងចំណោមនោះ ការនាំចេញដំណាំមិនមែនស្រូវបានកើនឡើងចំនួន ៣៤០,៥៧៧ តោន ការនាំចេញស្រូវបានកើនឡើងជាង២ លានតោន និងការនាំចេញអង្ករកើនឡើងចំនួន ១៥០,៤៣០ តោន។
ឯកឧត្តម ងិន ឆាយ បានបញ្ជាក់ថា ៖
«ចំណូលសរុប ពីការនាំចេញផលិតផលដំណាំ ឡើងដល់ចំនួនប្រមាណ ៣,៨៩ ពាន់ លាន ដុល្លារ ក្នុងនោះ ដំណាំមិនមែនស្រូវមានប្រមាណ ២,៣៨ ពាន់លានដុល្លារ និងស្រូវចំនួន១,០៥ ពាន់លានដុល្លារ និងអង្ករចំនួនប្រមាណ ៤៥៥ លានដុល្លារ»។
ឯកឧត្តម អគ្គនាយក បានបន្តថា ទោះបីជាការនាំចេញសរុបកើនឡើង ៣០,៤៣ ភាគរយក៏ដោយ ក៏ផលិតផលមួយចំនួនបានធ្លាក់ចុះ។ ការនាំចេញដំឡូងមីស្រស់បានធ្លាក់ចុះជិត ១៧ ភាគរយ។ ទោះយ៉ាងណាក៏ដោយ ការនាំចេញដំឡូងមីស្ងួត និងម្សៅដំឡូងមីបានកើនឡើង ខណៈដែលកសិករបានផ្លាស់ប្តូរពីដំឡូងមីស្រស់ទៅជាទម្រង់ក្រៀមស្ងួត និងកែច្នៃជាម្សៅ សម្រាប់អាចរក្សាទុកបានយូរ និងមានតម្លៃខ្ពស់។ ជាក់ស្តែង ក្នុងរយៈពេល៩ខែ ឆ្នាំ២០២៥នេះ ការនាំចេញដំឡូងមីក្រៀមកើនឡើងចំនួន ៥៧.៦២% និងម្សៅដំឡូងមីកើនឡើងចំនួន ៨៣.៤៩% បើធៀបនឹង រយៈពេលដូចគ្នានៅឆ្នាំ២០២៤។ ចំណែក ការនាំចេញផ្លែស្វាយស្រស់បានថយចុះជាង ៤ ភាគរយ ដោយសាររោងចក្រដំណាប់ស្វាយក្នុងស្រុកបានប្រមូលទិញផ្លែ ស្វាយស្រស់មកកែច្នៃទៅជាដំណាប់ស្វាយ ស្វាយស្ងួតសម្រាប់នាំចេញទៅក្រៅប្រទេស។ ជាលទ្ធផល គិតត្រឹមរយៈពេល៩ខែ ឆ្នាំ២០២៥នេះ ការនាំចេញដំណាប់ស្វាយ មានការកើនឡើងចំនួន ២៧.៥៤% បើធៀបនឹងរយៈពេលដូចគ្នាឆ្នាំ២០២៤ ការនាំចេញស្វាយស្ងួតបានកើនឡើង ២៧,៥៤ ភាគរយធៀបនឹងឆ្នាំមុន។
Account
Security
Favourite Content