សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រោយបញ្ចប់ការវាស់វែងដីធ្លីមានលក្ខណៈជាប្រព័ន្ធ រដ្ឋបាលខេត្តកណ្ដាលបានប្ដេជ្ញាថា នឹងចេញបណ្ណកម្មសិទ្ធិដីធ្លីជូនពលរដ្ឋឱ្យអស់នៅត្រឹមចុងឆ្នាំ ២០២៥នេះ ដើម្បីឱ្យពលរដ្ឋមានភាពកក់ក្ដៅក្នុងការអាស្រ័យផលលើដីធ្លីរបស់ពួកគាត់ និងបញ្ចប់វិវាទ ។
នៅក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋមកពី១៨ភូមិ ក្នុងឃុំចំនួន៣ ចំណុះស្រុកអង្គស្នួល ខេត្តកណ្ដាល កាលពីថ្ងៃទី០៧ ខែតុលា ឆ្នាំ២០២៥ ឯកឧត្តម កួច ចំរើន អភិបាលខេត្តកណ្ដាលបានមានប្រសាសន៍ថា នៅចុងឆ្នាំ២០២៥នេះ ឯកឧត្តមនឹងប្ដេជ្ញាខិតខំពន្លឿនការចេញបណ្ណកម្មសិទ្ធិដីធ្លីជូនពលរដ្ឋក្នុងខេត្តឱ្យអស់ទាំងស្រុង ដោយឯកឧត្តមក៏បានជំរុញឱ្យអាជ្ញាធរមូលដ្ឋាន ត្រូវផ្សព្វផ្សាយឱ្យបានទូលំទូលាយក្នុងការជូនដំណឹងដល់ពលរដ្ឋដែលមិនបានមកទទួលយកបណ្ណកម្មសិទ្ធិដីធ្លី ត្រូវរួសរាន់មកទទួលយកបណ្ណកម្មសិទ្ធិឱ្យបានគ្រប់ៗគ្នាពីមន្ត្រីសុរិយោដីនៅក្នុងមូលដ្ឋានរបស់ខ្លួន តាមការកំណត់របស់មន្ត្រីជំនាញ ជៀសវាងមានការបង់ផាកលើសេវាថែរក្សាបណ្ណជូនម្ចាស់កម្មសិទ្ធិ ។
ឯកឧត្តមមានប្រសាសន៍បន្តថា ៖
«បញ្ហាដីធ្លី រដ្ឋបាលខេត្តកណ្តាល ព្រមទាំងមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្ត បាន និងកំពុងយកចិត្តទុកដាក់ខ្ពស់ ព្រមទាំងប្ដេជ្ញាខិតខំពន្លឿនការចេញប័ណ្ណកម្មសិទ្ធិដីធ្លីជូនប្រជាពលរដ្ឋទូទាំងខេត្តឱ្យបានលឿនរួចរាល់អស់នៅចុងឆ្នាំ២០២៥ នេះ ពីព្រោះការចុះបញ្ជីដីធ្លី គឺជាផ្នែកមួយដ៏មានសារៈសំខាន់ ក្នុងគោលនយោបាយដីធ្លីរបស់រាជរដ្ឋាភិបាល ក្នុងគោលបំណងជាទូទៅ គឺសំដៅពង្រឹងសន្តិសុខកម្មសិទ្ធិដីធ្លី ទីផ្សារដីធ្លី ទប់ស្កាត់ និងដោះស្រាយជម្លោះដីធ្លី គ្រប់គ្រងដីធ្លីប្រកបដោយសមធម៌ និរន្តរភាព និងប្រសិទ្ធភាព» ។
ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានលើកឡើងថា ការបញ្ចប់ការវាស់វែងដីធ្លី ចុះបញ្ជីធ្លី និងចេញបណ្ណកម្មសិទ្ធិដីធ្លីជូនពលរដ្ឋទូទាំងអស់ឱ្យអស់គឺជាការបញ្ចប់នូវវិវាទ បង្កើតការបរិយាកាសរីករាយគ្មានទំនាស់ដីធ្លីក្នុងសហគមន៍ និងលើកស្ទួយសេដ្ឋកិច្ចគ្រួសាររបស់ពលរដ្ឋកម្ពុជាផងដែរ ។
ឯកឧត្តមក៏ធ្លាប់បានលើកឡើងផងដែរថា ការបញ្ចប់ការវាស់វែងដីធ្លីទាំងស្រុងនាពេលនេះ គឺជាប្រវត្តិសាស្ត្រសម្រាប់ប្រទេសកម្ពុជា ហើយបន្ទាប់ពីនេះ ក្រសួងរៀបចំដែនដី នគរូបនីយកម្មនិងសំណង់ នឹងបន្តសមរភូមិថ្មីៗផ្សេងទៀត ដើម្បីបន្តមរតកសុខសន្តិភាព ធ្វើឱ្យមរតកនេះចាក់គ្រឹះក្នុងសង្គមកម្ពុជាកាន់តែខ្លាំង ការពារកុំឱ្យមានការបែកបាក់វិលត្រលប់មកវិញសម្រាប់ប្រជាជនកម្ពុជាជំនាន់ក្រោយៗទៀត ។
គួរបញ្ជាក់ថា ក្រោយបញ្ចប់ការវាស់វែងដីធ្លីមានលក្ខណៈជាប្រព័ន្ធនៅទូទាំងប្រទេស ឃើញថាបណ្ដាខេត្តនានាចាប់ផ្ដើមចែកបណ្ណកម្មសិទ្ធិដីធ្លីជូនពលរដ្ឋដែលចុះបញ្ជីនិងបិទផ្សាយជាសាធារណៈរួចរាល់ ដើម្បីឱ្យពលរដ្ឋអាចយកបណ្ណកម្មសិទ្ធិនោះទៅប្រើប្រាស់តាមតម្រូវការចាំបាច់នានា ៕
Account
Security
Favourite Content