បរទេស ៖ យោងតាមប្រភពព័ត៌មានពី BBC បានរាយការណ៍ថា តម្លៃប្រេងបានធ្លាក់ចុះបន្ទាប់ពីប្រទេសអង់ហ្គោឡាបានប្រកាសថា ខ្លួននឹងចាកចេញពីក្រុមប្រទេសផលិតប្រេង OPEC ជុំវិញជម្លោះលើបញ្ហាកូតាទិន្នផល។

ទន្ទឹមនឹងនេះ តម្លៃប្រេងម៉ាក Brent ធ្លាក់ចុះ ១ ដុល្លារ ឬនៅសល់ ៧៨,៥ ដុល្លារក្នុងមួយបារ៉ែល ខណៈដែលតម្លៃប្រេងម៉ាក WTI ធ្លាក់ចុះ ០,៣៣ សេន ឬនៅសល់ ៧៣,៨៩ ដុល្លារក្នុងមួយបារ៉ែល។

បច្ចុប្បន្ននេះ ប្រទេសអង់ហ្គោឡាមានលទ្ធភាពអាចផលិតបានប្រេងប្រហែល ១,១ លានបារ៉ែលក្នុងមួយថ្ងៃ ។ យ៉ាងណាមិញ អង់ហ្គោឡា បានសម្រេចចិត្ដដកខ្លួនចេញពី OPEC នៅក្នុងកិច្ចប្រជុំគណៈរដ្ឋមន្ត្រីកាលពីថ្ងៃព្រហស្បតិ៍កន្លងទៅនេះ។

លោក Diamantino Azevedo  រដ្ឋមន្ត្រីក្រសួងធនធានរ៉ែ និងប្រេងអង់ហ្គោឡា បាននិយាយថា ៖

«យើងមានអារម្មណ៍ថា នៅពេលនេះ អង់ហ្គោឡា មិនទទួលបានអ្វីទាំងអស់នៅក្នុងអង្គការនេះ ហើយដើម្បីការពារផលប្រយោជន៍របស់ខ្លួន អង់ហ្គោឡា បានសម្រេចចិត្តចាកចេញ។ ប្រសិនបើយើងនៅតែស្ថិតក្នុងអង្គការ OPEC អង់ហ្គោឡា នឹងត្រូវបង្ខំឱ្យកាត់បន្ថយការផលិត ដែលផ្ទុយទៅនឹងគោលនយោបាយរបស់យើងក្នុងការជៀសវាងការធ្លាក់ចុះ។ ការ​សម្រេច​ចិត្ត​នេះ​មិន​មាន​លក្ខណៈ​ងាយស្រួល​នោះទេ»។

ស្របពេលនេះដែរ អង់ហ្គោឡា និងនីហ្សេរីយ៉ា គឺជាប្រទេសនាំចេញប្រេងធំបំផុតទីពីរនៅអនុតំបន់អាហ្រ្វិក សាហារ៉ា ប៉ុន្តែប្រទេសទាំងពីរមិនសប្បាយចិត្តដែលត្រូវបានស្នើសុំរបស់ OPEC ឱ្យកាត់បន្ថយផលិតកម្មនោះទេ ដោយសារពួកគេត្រូវការបង្កើនប្រាក់ចំណូលរូបិយប័ណ្ណបរទេសរបស់ពួកគេ។

គួរឲ្យបញ្ជាក់ដែរថា អង់ហ្គោឡា មានធនធានរ៉ែ និងប្រេងដ៏ច្រើនសន្ធឹកសន្ធាប់ ហើយសេដ្ឋកិច្ចរបស់ប្រទសនេះស្ថិតក្នុងចំណោមប្រទេសដែលមានកំណើនលឿនបំផុតនៅក្នុងពិភពលោក ប៉ុន្តែមានភាពមិនច្បាស់លាស់ខ្លាំង។ បន្ថែមពីនេះ ធនធានប្រេងភាគច្រើនរបស់អង់ហ្គោឡាស្ថិតនៅក្នុងខេត្ត Cabinda ដែលបានផ្ដាច់ខ្លួនដាច់ដោយឡែកចេញពីជម្លោះអស់រយៈពេលជាច្រើនទសវត្សរ៍មកហើយ។

យ៉ាងណាមិញ អង់ហ្គោឡាដែលជាសមាជិកអង្គការ OPEC អស់រយៈពេល ១៦ ឆ្នាំ មិនមែនជាប្រទេសដំបូងដែលចាកចេញពីក្រុមជួញដូរនោះទេ ពីព្រោះអេក្វាឌ័រ ឥណ្ឌូនេស៊ី និងកាតា សុទ្ធតែបានធ្វើដូចគ្នា។ អង្គការ OPEC គឺជាក្រុមអ្នកផលិតប្រេងដែលសម្រេចថា តើត្រូវលក់ប្រេងឆៅប៉ុន្មាននៅលើទីផ្សារពិភពលោក រួមជាមួយនឹងក្រុមសម្ព័ន្នមួយទៀតហៅថា OPEC+។ កាលពីខែមុន ក្រុមសមាជិកចំនួន ១៣ និងប្រទេសសម្ព័ន្ធមិត្តចំនួន ១០ បានសម្រេចចិត្តរួមគ្នាដើម្បីកាត់បន្ថយផលិតកម្មប្រេងបន្ថែមទៀតនៅឆ្នាំ ២០២៤ ដើម្បីជំរុញតម្លៃសកល។

បន្ទាប់ពីការលុកលុយរបស់រុស្ស៊ីលើអ៊ុយក្រែនក្នុងខែកុម្ភៈ ឆ្នាំ២០២២ តម្លៃប្រេងបានឡើងថ្លៃខ្លាំងដល់ជាង ១២០ ដុល្លារក្នុងមួយបារ៉ែលកាលពីខែមិថុនាឆ្នាំមុន ប៉ុន្តែបានធ្លាក់ចុះមកសល់ត្រឹម ៧០ ដុល្លារក្នុងមួយបារ៉ែលក្នុងខែឧសភាឆ្នាំនេះ។ ទោះជាយ៉ាងណាក្តី តម្លៃប្រេងបានបន្តកើនឡើងជាលំដាប់ចាប់តាំងពីពេលនោះមក ដោយសារអ្នកផលិតបានព្យាយាមរឹតបន្តឹងទិន្នផលដើម្បីគាំទ្រទីផ្សារ និងបន្ទាប់ពីការវាយប្រហារលើនាវាដឹកទំនិញនៅសមុទ្រក្រហមនាពេលថ្មីៗនេះ៕