វត្តមានរបស់ក្រុមហ៊ុនកសិកម្មដ៏ធំមួយនៅភូមិភាគឦសាននៃប្រទេសកម្ពុជា កំពុងរួមចំណែកយ៉ាងសំខាន់ក្នុងការអភិវឌ្ឍន៍សេដ្ឋកិច្ច និងសង្គមកិច្ចក្នុងតំបន់ តាមរយៈការផ្តល់ឱកាសការងាររាប់ពាន់កន្លែងសម្រាប់ប្រជាជនកម្ពុជា និងអត្ថប្រយោជន៍សេដ្ឋកិច្ចប្រកបដោយសុខុមលភាពសង្គមជាច្រើនសម្រាប់កម្មករ និងសហគមន៍។

ក្រុមហ៊ុន ភាគហ៊ុនកសិកម្ម THACO AGRI ជាក្រុមហ៊ុនកសិកម្មដ៏ធំមួយ បាន និងកំពុងវិនិយោគរាប់ពាន់លានដុល្លារលើវិស័យកសិកម្មនៅក្នុងប្រទេសជាច្រើន ហើយឥឡូវនេះមានវត្តមាននៅក្នុងតំបន់ភូមិភាគឦសាននៃប្រទេសកម្ពុជា។

យោងតាមផែនការក្រុមហ៊ុន THACO AGRI កំពុងវិនិយោគលើការអភិវឌ្ឍន៍កសិកម្មទ្រង់ទ្រាយធំលើផ្ទៃដី ១ម៉ឺនហិកតា នៅក្នុងខេត្តក្រចេះ តាមរយៈក្រុមហ៊ុនចំនួន ៣ (១- ក្រុមហ៊ុនទទួលខុសត្រូវមានកម្រិត Eastern Rubber, ២- ក្រុមហ៊ុន Binh Phuoc Kratie 2, ៣- ក្រុមហ៊ុន Sovannvuthy)។ ក្រុមហ៊ុនក៏បានវិនិយោគលើផ្ទៃដី ២៥០០០ ហិកតា ក្នុងខេត្តរតនគិរី តាមរយៈក្រុមហ៊ុនចំនួន ៣ (១- ក្រុមហ៊ុន ហ័ង អាញ់អណ្តូងមាស, ២- ក្រុមហ៊ុន ហ័ង អាញ់ លំផាត់ និងទី៣- ក្រុមហ៊ុន ដូនពេញ អាហ្គ្រីកូ) ។

ជាការគួរកត់សម្គាល់ ដោយសារលក្ខណៈនៃកត្តាភូមិសាស្ត្រ បានធ្វើឱ្យជីវភាពរស់នៅរបស់ប្រជាពលរដ្ឋក្នុងតំបន់ភូមិភាគឦសានមួយចំនួននៅមានការជួបផលលំបាក។ ដូច្នេះហើយ ដើម្បីចូលរួមជួយលើកកម្ពស់ជីវភាពរស់នៅរបស់ប្រជាពលរដ្ឋនៅទីនេះ ក្រុមហ៊ុនបានយកចិត្តទុកដាក់លើការកសាងបណ្តាញហេដ្ឋារចនាសម្ព័ន្ធបម្រើដល់វិស័យដឹកជញ្ជូន កន្លែងព្យាបាល បណ្តាញទឹកស្អាត មានបង្កើតថ្នាក់បឋមសិក្សា… ហើយក្រៅពីនេះ ក្រុមហ៊ុនក៏បានបង្កើតការងារជូនប្រជាពលរដ្ឋរាប់ពាន់នាក់ផងដែរ (កម្មករខ្មែរប្រមាណ ១ម៉ឺននាក់ កំពុងធ្វើការនៅក្នុងកសិដ្ឋានដាំដុះ និងកសិដ្ឋានចិញ្ចឹមសត្វរបស់ក្រុមហ៊ុន) ហើយក្រុមហ៊ុនក៏ត្រូវការជ្រើសរើសបុគ្គលិករាប់ម៉ឺននាក់បន្ថែមទៀត។ ជាពិសេស ក្រុមហ៊ុនក៏នឹងបណ្តុះបណ្តាលប្រជាពលរដ្ឋលើបច្ចេកទេសកសិកម្ម ដើម្បីបំពេញតម្រូវការអភិវឌ្ឍន៍ការងារ និងសង្គម។

នាយកក្រុមហ៊ុន Thaco Agri ប្រចាំនៅស្រុកស្នូល ខេត្តក្រចេះបានឱ្យដឹងថា គិតត្រឹមតែនៅក្នុងស្រុកស្នូល ក្រុមហ៊ុនក៏មានកម្មករសរុបជិត ៣ពាន់នាក់ ហើយត្រូវការជ្រើសរើសកម្មករច្រើនថែមទៀត ដើម្បីពង្រីកគោលដៅអភិវឌ្ឍន៍វិស័យកសិកម្មនៅតំបន់ភូមិភាគឦសាននៃប្រទេសកម្ពុជា។

លោកក៏បានឱ្យដឹងទៀតថា ក្រៅពីបើកប្រាក់ឈ្នួល២ដងក្នុងមួយខែសំរាប់កម្មករ ក្រុមហ៊ុនក៏ផ្តល់កន្លែងស្នាក់នៅ មានបណ្តាញទឹកស្អាត និងបណ្តាញអគ្គិសនីសម្រាប់ប្រើប្រាស់ដោយមិនគិតថ្លៃផងដែរ។ បន្ថែមពីនេះ ក្រុមហ៊ុនក៏មានកន្លែងថែទាំសុខភាពសម្រាប់កម្មករផងដែរ ហើយកូន ឬចៅ សាច់ញាតិរបស់កម្មករក៏ទទួលបានការអប់រំនៅនឹងកន្លែងផងដែរ ខណៈដែលក្រុមហ៊ុនបានបង្កើតសាលារៀននៅក្នុងបរិវេណក្រុមហ៊ុន ហើយកម្មវិធីសិក្សាគឺស្របតាមបទដ្ឋានរបស់ក្រសួងអប់រំ យុវជន និងកីឡា ក្រោមការបង្ហាត់បង្រៀនពីសំណាក់លោកគ្រូ អ្នកគ្រូ ដែលកំពុងបម្រើការងារនៅសាលារដ្ឋផងដែរ។

លោក ស៊ា សំណាង ដែលជាកម្មករម្នាក់បម្រើការងារនៅក្នុងក្រុមហ៊ុនកសិកម្ម Thaco Agriculture ប្រចាំស្រុកស្នួល ខេត្តក្រចេះបានឱ្យដឹងថា លោកបានចូលធ្វើការជាកម្មករចំការចេករបស់ក្រុមហ៊ុននេះតាំងពីជាង៣ឆ្នាំមុន ពោលគឺនៅពេលវិបត្តិកូវីដ១៩ ដែលកាលនោះមានមនុស្សជាច្រើនបាត់បង់ការងារដោយសារតែកូវីដ១៩ ។

លោកបន្តថា ៖

“ខ្ញុំមិនមែនជាអ្នកខេត្តក្រចេះនេះទេ គឺមកពីខេត្តផ្សេង ហើយបានឮគេនិយាយថាក្រុមហ៊ុនត្រូវការកម្មករធ្វើការនៅចំការចេក ដោយផ្ដល់កន្លែងស្នាក់នៅអត់គិតថ្លៃ។ នៅពេលដំបូង ខ្ញុំមកតែ២នាក់ប្រពន្ធទេ ហើយក្រោយមកទៀត ដោយឃើញថាការងារនៅក្នុងក្រុមហ៊ុនមិនពិបាក រួមទាំងមានផ្ដល់កន្លែងស្នាក់នៅផងនោះ ខ្ញុំក៏បានហៅអ្នកស្រុក អ្នកភូមិមកធ្វើការជាមួយជាបន្តបន្ទាប់។ សម្រាប់ការងារនៅទីនេះ គឺអត់ពិបាកទេ ដូចឃើញជាក់ស្ដែងហើយ អត់មានការងារធ្ងន់ៗនោះទេ។ នៅទីនេះ ចូលធ្វើការនៅព្រឹកម៉ោង៧ សម្រាកម៉ោង១០ និង៤៥នាទី និងចូលពេលរសៀលម៉ោង១ សម្រាកម៉ោង៤ និង៤៥នាទី ល្ងាច ដោយទទួលបានប្រាក់ខែសមរម្យ៕”