ភ្នំពេញ ៖ ស្ថានភាពបំណុលសាធារណៈកម្ពុជា នៅតែស្ថិតក្នុងភាពគ្រប់គ្រងបាន ពោលគឺនៅតែមាន “ចីរភាព និងហានិភ័យកម្រិតទាប” បើទោះបីជាសេដ្ឋកិច្ចកម្ពុជាទទួលរងផលប៉ះពាល់ពីការរីករាលដាលនៃវិបត្តិជំងឺកូវីដ១៩ និងកត្តាខាងក្រៅផ្សេងទៀតក្តី ខណៈអ្នកជំនាញសេដ្ឋកិច្ច និងហិរញ្ញវត្ថុ ក៏បានលើកឡើងដែរថា កម្រិតបំណុលរបស់កម្ពុជាមិនទាន់ខ្ពស់គួរឱ្យបារម្ភនោះទេ។

លោក ង៉ែត ជូ អ្នកជំនាញសេដ្ឋកិច្ច និងហិរញ្ញវត្ថុ បានលើកឡើងនៅថ្ងៃទី២១ ខែកញ្ញា ឆ្នាំ២០២៣ ថា ជាទូទៅមិនថាគ្រួសារ ក្រុមហ៊ុនឯកជន និងប្រទេសនោះទេ ការខ្ចីបុលប្រាក់ពីប្រភពដទៃដើម្បីវិនិយោគ និងអភិវឌ្ឍសេដ្ឋកិច្ចរបស់ខ្លួនគឺជារឿងធម្មតា ហើយក៏មិនមែនជាការខុសឆ្គងអ្វីដែរ ប្រសិនបើកំរិតបំណុលនោះមិនធំហួសពីលទ្ធភាពរបស់ខ្លួន និងប្រើប្រាស់មានប្រសិទ្ធិភាព។ នៅក្នុងក្របខណ្ឌប្រទេស បន្ថែមលើកំរិតបំណុលធៀបនឹងទំហំសេដ្ឋកិច្ច និងប្រសិទ្ធភាពនៃការវិនិយោគសារធារណៈ តម្លាភាពនៃការគ្រប់គ្រងថវិកាជាតិក៏សំខាន់ណាស់ដែរដែលជារើយៗពលរដ្ឋតែងចង់ដឹងចង់ឮ។

លោកបានលើកឡើងជាសំនួរថា មជ្ឈដ្ឋានទូទៅតែងសម្តែងក្តីបារម្ភថាកម្ពុជាជំពាក់បរទេសច្រើន តើកម្រិតបំណុលរបស់កម្ពុជានាពេលបច្ចុប្បន្នច្រើនគួរឱ្យបារម្ភដែរឬទេ? ទន្ទឹមនេះ លោកបានលើកពីបណ្តាប្រទេសដែលមានកម្រិតបំណុលខ្ពស់ជាងគេទាំង១២ ក្នុងនោះប្រទេសវេនីស៊ូអេឡា គឺជាប្រទេសដែលមានបំណុលខ្ពស់លំដាប់លេខ១ក្នុងពិភពលោកគឺរហូតដល់ទៅ៣៥០%នៃទំហំសេដ្ឋកិច្ចរបស់ខ្លួន (សូមបញ្ជាក់ដែរថាសេដ្ឋកិច្ចរបស់ប្រទេសនេះបានដួលរលំទៅហើយ)។

លោកបានថ្លែងបន្តថា ក្នុងចំណោមប្រទេសទាំង១២ យើងក៏សង្កេតឃើញមានប្រទេសដែលមានសេដ្ឋកិច្ចរីកចម្រើនខ្លាំងដែលយើងតែងសរសើរ ក៏មានកម្រិតបំណុលខ្ពស់ខ្លាំងណាស់ដែរ ដូចជាប្រទេសជប៉ុន (២៦៦%) ប្រទេសសឹង្ហបុរី (១៣១%) និងសហរដ្ឋអាមេរិក (១២៨%)។

លោក ង៉ែត ជូ បានបញ្ជាក់ថា ៖«ដោយឡែកបើក្រឡេកមកមើលកម្រិតបំណុលរបស់ប្រទេសកម្ពុជាវិញគឺនៅមានកម្រិតទាបបំផុតធៀបនឹងបណ្តាប្រទេសនានាក្នុងតំបន់។ កម្ពុជាមានកម្រិតបំណុលត្រឹមតែ ២៩,៤% នៃទំហំសេដ្ឋកិច្ចរង្វង់ ៣០ ពាន់លានដុល្លាអាមេរិក។ គឺទាបជាងប្រទេសវៀតណាម ឡាវ ម៉ាឡេស៊ី ចិន មីយ៉ានម៉ា ថៃ ហ្វីលីពីន និងឥណ្តូនេស៊ី។ ដូច្នេះកម្រិតបំណុលរបស់កម្ពុជាមិនទាន់ខ្ពស់គួរឱ្យបារម្ភនោះទេ»។

អ្នកជំនាញសេដ្ឋកិច្ច និងហិរញ្ញវត្ថុរូបនេះ បានលើកឡើងថា ផ្ទុយទៅវិញគឺកម្ពុជានៅមានឱកាសអាចខ្ចីមកវិនិយោគបន្ថែមទៀត។ ប៉ុន្តែអ្វីដែលត្រូវផ្តោតការយកចិត្តទុកដាក់ខ្ពស់គឺប្រសិទ្ធិភាព និងតម្លាភាពនៃការប្រើប្រាស់បំណុលទាំងនោះ។

ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា លទ្ធផលមឋមនៃការវិភាគចីរភាពបំណុលរហូតដល់ដំណាច់ឆ្នាំ២០២៣ បង្ហាញថា បើទោះបីជាសេដ្ឋកិច្ចកម្ពុជាទទួលរងផលប៉ះពាល់ពីការរីករាលដាលនៃវិបត្តិជំងឺកូវីដ១៩ និងកត្តាខាងក្រៅផ្សេងទៀតក្តី ក៏ស្ថានភាពបំណុលសាធារណៈកម្ពុជា នៅតែស្ថិតក្នុងភាពគ្រប់គ្រងបាន ពោលគឺនៅតែមាន “ចីរភាព និងហានិភ័យកម្រិតទាប” ដដែល ដោយរាល់សួចនាករបំណុលគន្លឹះៗទាំងអស់ សុទ្ធតែស្ថិតក្រោមអនុបាតគោល ក្នុងនោះសួចនាករសំខាន់ជាងគេ គឺអនុបាតតម្លៃបច្ចុប្បន្ន នៃបំណុលសាធារណៈក្រៅប្រទេស ធៀបនឹង ផ.ស.ស មានត្រឹមកម្រិត ២៤,២% ធៀបនឹងអនុបាតគោល ៤០%។

ក្នុងឆមាសទី១ ឆ្នាំ២០២៣ រាជរដ្ឋាភិបាលបានចុះកិច្ចព្រមព្រៀងឥណទានសម្បទានថ្មី ជាមួយដៃគូអភិវឌ្ឍន៍នានាសរុបជិត ៧៨០ លានដុល្លារអាមេរិក ស្មើនឹងប្រមាណ ៣៥% នៃពិតានដែលច្បាប់អនុញ្ញាត ក្នុងគោលបំណងសំដៅរួមចំណែកទ្រទ្រង់ចីរភាពនៃកំណើនរយៈវែង និងបង្កើនផលិតភាពសេដ្ឋកិច្ច ឬផលិតភាពផលិតកម្ម។ នេះបើយោងតាមព្រឹត្តិ​បត្រ​ស្ថិតិ​បំណុល​សាធារណៈ​កម្ពុជា ចេញផ្សាយ​លើក​ទី១៩ – ទិន្នន័យ​ត្រឹម​ដំណាច់ត្រីមាសទី២ ឆ្នាំ២០២៣ ចេញផ្សាយកាលពីថ្មីៗនេះ។

គួរបញ្ជាក់ផងដែរថា ដោយគិតទាំងបំណុលមរតក ត្រឹមដំណាច់ត្រីមាសទី២ ឆ្នាំ២០២៣ កម្ពុជាមានសន្និធិបំណុលសាធារណៈសរុបចំនួន ១០,៧២ ពាន់លានដុល្លារអាមេរិក ក្នុងនោះ ៩៩,៦៧% ត្រូវនឹងប្រមាណ ១០,៦៧ ពាន់លានដុល្លារអាមេរិក ជាបំណុលសាធារណៈក្រៅប្រទេស (ក្របខ័ណ្ឌទ្វេភាគីប្រមាណ ៦៤% និងក្របខ័ណ្ឌពហុភាគីប្រមាណ ៣៦%) និង ០,៤៣% ត្រូវនឹងប្រមាណ ៤៦,៥១ លានដុល្លារអាមេរិក ជាសាធារណៈក្នុងប្រទេស។

ផលិតផលសរុបក្នុងស្រុករបស់កម្ពុជា (ផ.ស.ស) ត្រូវបានរំពឹងថានឹងឈានដល់ ៣១.៨៨ ពាន់លានដុល្លារអាមេរិកនៅចុងឆ្នាំ២០២៣។ នេះបើយោងតាមការព្យាកររបស់ស្ថាប័ន Trading Economics៕