បរទេស៖ នៅព្រឹកថ្ងៃទី២៤ ខែតុលា ឆ្នាំ២០២៥នេះ តម្លៃប្រេងសកលបានហក់ឡើងថ្លៃជាង ៥% បន្ទាប់ពីសហរដ្ឋអាម៉េរិកបានសម្រេចដាក់ទណ្ឌកម្មលើក្រុមហ៊ុនផ្គត់ផ្គង់ធំៗរបស់រុស្ស៊ី រួមមាន Rosneft និង Lukoil ពាក់ព័ន្ធនឹងសង្គ្រាមជាមួយនឹងអ៊ុយក្រែន។ នេះបើយោងតាមការរាយការណ៍ពីរ៉យទ័រ។

តម្លៃប្រេងឆៅម៉ាក Brent បានឡើងថ្លៃ ៥,៤% ឬ មានតម្លៃ ៦៥,៩៩ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) ឡើងថ្លៃ ៥,៦% ឬ មានតម្លៃ ៦១,៧៩ ដុល្លារក្នុងមួយបារ៉ែល។ ការឡើងថ្លៃតម្លៃប្រេងទាំងពីរ គឺជាការកើនឡើងក្នុងកម្រិតខ្ពស់បំផុតចាប់តាំងពីខែមិថុនា។ បន្ថែមពីលើការឡើងថ្លៃនៃតម្លៃប្រេងឆៅ តម្លៃប្រេងម៉ាស៊ូតរបស់អាម៉េរិកបានកើនឡើងជិត ៧% ដែលជាកម្រិតខ្ពស់បំផុតចាប់តាំងពីខែកុម្ភៈ ឆ្នាំ២០២៤។

សេដ្ឋវិទូបានព្យាករណ៍ថា ការប្រកាសដាក់ទណ្ឌកម្មដោយសហរដ្ឋអាម៉េរិកលើក្រុមហ៊ុនរុស្ស៊ី Rosneft និង Lukoil គឺជាការកំណត់គោលដៅលើវិស័យថាមពលរបស់រុស្ស៊ី ហើយអាចបណ្តាលឲ្យទីផ្សារប្រេងពិភពលោកមានឱនភាពនៅឆ្នាំក្រោយ។ នៅក្នុងឆ្នាំ២០២៤ រុស្ស៊ី គឺជាប្រទេសផលិតប្រេងឆៅធំបំផុតទី២ របស់ពិភពលោក បន្ទាប់ពីសហរដ្ឋអាម៉េរិក។

លោក Ole Hansen អ្នកវិភាគនៅធនាគារ Saxo Bank បានលើកឡើងថា ការដាក់ទណ្ឌកម្មរបស់អាម៉េរិកមានន័យថា រោងចក្រចម្រាញ់ប្រេងនៅក្នុងប្រទេសចិន និងឥណ្ឌា ដែលជាអ្នកទិញប្រេងធំរបស់រុស្ស៊ី នឹងត្រូវស្វែងរកអ្នកផ្គត់ផ្គង់ជំនួស ដើម្បីជៀសវាងការដកចេញពីប្រព័ន្ធធនាគារលោកខាងលិច។ លើសពីនេះ ក្រុមហ៊ុនប្រេងធំៗរបស់ចិនបានផ្អាកការទិញប្រេងពីរុស្ស៊ី ជាពិសេសពីក្រុមហ៊ុន Rosneft និង Lukoil។ យ៉ាងណាក៏ដោយ សហរដ្ឋ​អាម៉េរិក​បានអះអាងពីការ​​ត្រៀម​ខ្លួនក្នុងការចាត់​វិធានការ​បន្ថែម​ទៀតលើរុស្ស៊ី ខណៈ​រដ្ឋបាលលោក Trump បានព្យាយាម​អំពាវនាវជាច្រើនលើក​ឱ្យទី​ក្រុង​ម៉ូស្គូ​យល់ព្រម​ភ្លាមៗ​ចំពោះ​បទ​ឈប់​បាញ់​នៅ​អ៊ុយក្រែន។

កាលពីសប្តាហ៍មុន ចក្រភពអង់គ្លេសបានដាក់ទណ្ឌកម្មលើក្រុមហ៊ុន Rosneft និង Lukoil ខណៈដែលសហភាពអឺរ៉ុបបានអនុម័តទណ្ឌកម្មជុំទី១៩ ប្រឆាំងនឹងរុស្ស៊ី។ មិនត្រឹមតែប៉ុណ្ណោះ សហភាពអឺរ៉ុបក៏បានបញ្ចូលក្រុមហ៊ុនចម្រាញ់ប្រេងរបស់ចិនចំនួន២ ទៅក្នុងបញ្ជីទណ្ឌកម្មផងដែរ។

លោក Giovanni Staunovo អ្នកវិភាគរបស់ UBS បានលើកឡើងថា ផលប៉ះពាល់នៃការដាក់ទណ្ឌកម្មលើទីផ្សារប្រេងនឹងអាស្រ័យលើរបៀបដែលឥណ្ឌាឆ្លើយតបទៅបញ្ហានេះផងដែរ ខណៈដែលរុស្ស៊ីបន្តស្វែងរកអ្នកទិញជំនួសដោយសារឥណ្ឌាបានក្លាយជាអ្នកទិញដ៏ធំបំផុតចាប់តាំងពីមានសង្គ្រាម។

យ៉ាងណាមិញ​ ប្រធានាធិបតីរុស្ស៊ី លោក Vladimir Putin បង្ហាញភាពជឿជាក់ថា វានឹងត្រូវការពេលវេលាសម្រាប់ទីផ្សារពិភពលោកក្នុងការជំនួសប្រេងរបស់រុស្ស៊ី។ លោកបានលើកឡើងថា ការដាក់ទណ្ឌកម្មផ្សេងៗរបស់អាម៉េរិក និងសហភាពអឺរ៉ុបរហូតមកដល់ពេលនេះ គឺមិនមានឥទ្ធិពលលើសមត្ថភាពលើប្រេងស្ស៊ីនោះទេ ខណៈដែលការនាំចេញរបស់រុស្ស៊ីមានចំណែកប្រហែល ៧% នៃការផ្គត់ផ្គង់ប្រេងសរុបរបស់ពិភពលោក៕