បរទេស៖ យោងតាមប្រភពព័ត៌មានពី Investing បានរាយការណ៍ថា​ ទីផ្សារប្រេងឆៅមានការប្រែប្រួលជាញឹកញាប់ ខណៈដែលការព្យាករណ៍មិនអាចទាយទុកជាមុនបានដោយសារស្ថានភាពបច្ចុប្បន្នមានភាពមិនច្បាស់លាស់។.ទន្ទឹមនឹងនេះ តម្លៃប្រេងឆៅម៉ាក WTI មានតម្លៃ ៧៧,៧៧ ដុល្លារក្នុងមួយបារ៉ែល ខណៈដែលប្រេងឆៅម៉ាក Brent មានតម្លៃ ៨២,៩៥ ដុល្លារក្នុងមួយបារ៉ែល ហើយប្រសិនបើ OPEC + ពង្រីកការកាត់បន្ថយផលិតកម្មរបស់ខ្លួនក្នុងសប្តាហ៍នេះ WTI អាចឡើងថ្លៃដល់ ៨០ ដុល្លារក្នុងមួយបារ៉ែល។

ស្របពេលនេះដែរ វិនិយោគិនសកលកំពុងតាមដានយ៉ាងដិតដល់នូវសកម្មភាពដែលអាចនឹងត្រូវធ្វើឡើងនៅក្នុងកិច្ចប្រជុំ OPEC+ ក្នុងខែវិច្ឆិកានេះ ដែលនឹងផ្តល់ព័ត៌មានបន្ថែមអំពីជំហានបន្ទាប់របស់ប្រទេសផលិតប្រេងសំខាន់ៗទាំងនោះ។ ការព្រួយបារម្ភពីការធ្លាក់ចុះតម្លៃ និងការភ័យខ្លាចអំពីតម្រូវការនៅឆ្នាំក្រោយ អង្គការនៃប្រទេសនាំចេញប្រេង និងសម្ព័ន្ធមិត្តដែលដឹកនាំដោយប្រទេសរុស្ស៊ី (OPEC+) មានគំរោងប្រជុំពិភាក្សាគ្នាអំពីការកាត់បន្ថយផលិតកម្មកាលពីសប្តាហ៍មុន។ ទោះជាយ៉ាងណាក្តី ក្រុមនេះបានពន្យារពេលកិច្ចប្រជុំដល់ថ្ងៃព្រហស្បតិ៍នេះ ដើម្បីទុកពេលបន្ថែមទៀតក្នុងការដោះស្រាយការខ្វែងគំនិតគ្នាលើកម្រិតទិន្នផលសម្រាប់អ្នកផលិតអាហ្វ្រិក។ ទន្ទឹមនេងនេះ មានការលើកឡើងថា ការខ្វែងគំនិតគ្នាមានភាពលំបាកក្នុងការដោះស្រាយ ហើយអាចនឹងពន្យារពេលបន្ថែមទៀតតាមដែលអាចធ្វើទៅបាន។

លើសពីនេះ គេយល់ឃើញថា OPEC+ មានអំណាចក្នុងការដើរតួជាប្លុកតែមួយក្នុងការបង្កើន ឬបន្ថយផលិតកម្មដោយឯកឯង ដើម្បីគ្រប់គ្រងតម្លៃប្រេង។ ដូច្នេះហើយ អ្នកវិភាគរំពឹងថា ពួកគេនឹងបន្តពន្យាពេលក្នុងការព្រមព្រៀងគ្នាលើការកាត់បន្ថយទិន្នផល ដើម្បីទប៉ទល់ពីការឡើងតម្លៃប្រេង។ យ៉ាងណាមិញ ហានិភ័យនៃការបរាជ័យក្នុងការសម្រេចបានកិច្ចព្រមព្រៀងអាចធ្វើឲ្យតម្លៃមិនមានការប្រែប្រួលនៅក្នុងទីផ្សារប្រេង។ មិនត្រឹមតែប៉ុណ្ណោះ ការសម្រេចចិត្តរបស់ OPEC+ មានសារៈសំខាន់ចំពោះទីផ្សារប្រេង ពីព្រោះវាមានឥទ្ទិពលចំពោះការផ្គត់ផ្គង់ប្រេងពិភពលោក និងតម្លៃប្រេង ខណៈដែលពួកគេមានចំណែក ៦០ ភាគរយនៃពាណិជ្ជកម្មប្រេងអន្តរជាតិ ក៏ដូចជា ៨០ ភាគរយនៃទុនបម្រុងប្រេងសរុប។

ដូច្នោះហើយ អំឡុងពេលនៃតម្រូវការ និងតម្លៃប្រេងធ្លាក់ចុះ ពួកគេអាចសម្រេចចិត្តកាត់បន្ថយការផលិត ដើម្បីជំរុញតម្លៃប្រេង។ កាលពីខែមិថុនាកន្លងទៅនេះ អារ៉ាប៊ីសាអូឌីតប្រកាសកាត់បន្ថយផលិតកម្មប្រេងដោយស្ម័គ្រចិត្តចំនួន ១ លានបារ៉ែលក្នុងមួយថ្ងៃ ហើយរុស្ស៊ីសម្រេចចិត្តកាត់បន្ថយទិន្នផលបន្ថែមទៀតចំនួន ៣ សែនបារ៉ែលក្នុងមួយថ្ងៃ។ នៅក្នុងកិច្ចប្រជុំនាពេលខាងមុខ គេរំពឹងថា រុស្ស៊ីនឹងពិនិត្យមើលឡើងវិញនូវគោលនយោបាយនេះ ហើយសម្រេចចិត្តថាតើត្រូវកាត់បន្ថយបន្ថែមទៀត ឬបង្កើនផលិតកម្មឡើងវិញ ?