សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ចាប់ពីថ្ងៃទី១៤ ដល់ថ្ងៃទី ១៧ កញ្ញា ឆ្នាំ២០២៣ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើទស្សនកិច្ចផ្លូវការទៅកាន់សាធារណរដ្ឋប្រជាមានិតចិន។ ក្នុងដំណើរទស្សនៈកិច្ចនេះ ថ្នាក់ដឹកនាំកម្ពុជា-ចិន បានពិភាក្សាគ្នាជាច្រើនលើប្រយោជន៍សេដ្ឋកិច្ច ជាជាងនយោបាយ។
ឯកឧត្តម ហ្សង់ហ្រង់ស្វ័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស និងសហប្រតិបត្តិការអន្តរជាតិ បានឱ្យដឹងពីសមិទ្ធផលធំៗចេញពីដំណើរទស្សនៈកិច្ចរបស់នាយករដ្ឋមន្ត្រីកម្ពុជាទៅកាន់ប្រទេសចិនយ៉ាងដូច្នេះថា ៖
ចំណុចសំខាន់ទី១ គឺ កម្ពុជា និងចិន ប្ដេជ្ញាបន្តទំនាក់ទំនងមិត្តភាពយូរអង្វែងដែលជាមរតកអ្នកដឹកនាំជំនាន់មុន ខណៈដែលបច្ចុប្បន្នជាមិត្តភាពដែកថែប។
ទី២គឺ កម្ពុជា និងចិន ឯកភាពគ្នាបន្តធ្វើឱ្យស៊ីជម្រៅ និងបន្ស៊ីចូលគ្នានូវយុទ្ធសាស្ត្របញ្ចកោណរបស់ប្រទេសកម្ពុជា និងគំនិតផ្ដួចផ្ដើមក្រវាត់ និងផ្លូវរបស់ចិនដែលមានជាអាថិ៍ នៅលើវិស័យកសិកម្ម ថាមពល និងការផ្លាស់ប្ដូរប្រជាជន និងប្រជាជន។
សមិទ្ធផលទី៣គឺ កម្ពុជាតាមរយៈសម្ដេចធិបតីបានបញ្ជាក់ជាថ្មីជូនមេដឹកនាំចិន នូវជំហររបស់កម្ពុជា ដែលប្រកាន់ខ្ជាប់នូវគោលនយោបាយចិនតែមួយ។
ចំណុចបន្ទាប់ទៀតគឺ ភាគីចិន-កម្ពុជា បានចុះហត្ថលេខាលើឯកសារចំនួន ១៥ ដែលក្នុងនោះរួមមានឯកសារផែនការសកម្មភាពក្នុងការកសាងសហគមន៍វាសនារួមកម្ពុជា សម្រាប់២០២៤ ២០២៨។ ជារួមលទ្ធផលនៃជំនួបរវាងថ្នាក់ដឹកនាំនេះ សុទ្ធសឹងតែជាគោលការណ៍ ដែលត្រូវផ្ដល់សន្ទុះដល់ទំនាក់ទំនងរវាងប្រទេសទាំងពីរឱ្យក្លាយទៅជាត្បូងពេជ្រពិតប្រាកដ។
ដោយឡែក នៅក្នុងដំណើរទស្សនៈកិច្ចចំនួន៤ថ្ងៃនេះផងដែរ សម្ដេចធិបតីបានអញ្ជើញចូលរួមក្នុងពិធីសម្ពោធបើកពិព័រណ៍ចិន-អាស៊ានផងដែរ ដែលពិព័រណ៍នេះផ្ដោតសំខាន់លើសេដ្ឋកិច្ច ប្រយោជន៍ពាណិជ្ជកម្ម ដែលតំបន់ខ្វាងស៊ី និងកម្ពុជាអាចទាញរួមគ្នាពីសហប្រតិបត្តិការជិតស្និទ្ធនឹងគ្នា។
បើតាមការបញ្ជាក់បន្ថែមរបស់ឯកឧត្តម ហ្សង់ហ្វ្រង់ស្វ័រ តាន់ គ្រាន់តែតំបន់ខ្វាងស៊ីរបស់ចិនមួយនេះមានប្រជាជនរហូតដល់ ៥៨លាននាក់ រីឯ GDP នៃតំបន់នេះ គឺមានទំហំ៥ដងលើសប្រទេសកម្ពុជា បានន័យថាទីផ្សារនៃតំបន់នេះមានទំហំ៣ដង ធំលើសទីផ្សារកម្ពុជា ម្លោះហើយ ទំនាក់ទំនងសហប្រតិបត្តិការរវាងតំបន់ និងកម្ពុជាក៏អាចហុចប្រយោជន៍មកឱ្យកម្ពុជាដែរ។
ជារួមទស្សនៈកិច្ច៤ថ្ងៃនេះ ភាគីទាំងសងខាងមិនបានអង្គុយជជែកគ្នាលើរឿងនយោបាយនោះទេ ពោលគឺ ៧០% ជជែករួមគ្នាពីបញ្ហាសេដ្ឋកិច្ច ពាណិជ្ជកម្ម ក្នុងគោលដៅអនុញ្ញាតឱ្យប្រទេសកម្ពុជា និងចិនទាញយកប្រយោជន៍ទៅវិញទៅមក ដើម្បីនាំមកនូវឧត្តមប្រយោជន៍ជាតិសម្រាប់សាកល្បងធ្វើឱ្យជីវភាពប្រជាជនកម្ពុជារីកចម្រើនទៅមុខ៕
Account
Security
Favourite Content