បរទេស៖ យោងតាមប្រភពព័ត៌មានពី BBC បានរាយការណ៍ថា អាម៉េរិកបានគំរាមដំឡើងពន្ធបន្ថែមទៀតលើការនាំចូលពីឥណ្ឌា ប្រសិនបើកិច្ចប្រជុំរវាងប្រធានាធិបតី Donald Trump និងមេដឹកនាំរុស្ស៊ីលោក Vladimir Putin បរាជ័យ។

រដ្ឋមន្ត្រីក្រសួងរតនាគារសហរដ្ឋអាម៉េរិក Scott Bessent បានព្រមានថា ទីក្រុងវ៉ាស៊ីនតោនអាចនឹងដំឡើងពន្ធបន្ថែមទៀតលើឥណ្ឌា ដោយការសម្រេចចិត្តនេះនឹងអាស្រ័យលើលទ្ធផលនៃកិច្ចប្រជុំមេដឹកនាំអាម៉េរិក និងរុស្ស៊ី នៅក្នុងរដ្ឋ Alaska នៅថ្ងៃសុក្រសប្ដាហ៍នេះ។

លោក Bessent លើកឡើងថា ៖

«យើងបានដំឡើងពន្ធបន្ថែមលើឥណ្ឌាពាក់ព័ន្ធនឹងការដែលពួកគេទិញប្រេងពីរុស្ស៊ី។ ខ្ញុំអាចមើលឃើញ ប្រសិនបើអ្វីៗមិនដំណើរការល្អនោះទេ ទណ្ឌកម្ម ឬ ការដំឡើងពន្ធអាចនឹងកើតឡើង»។

កាលពីដើមខែនេះ Trump បានដាក់ពិន័យដោយដំឡើងពន្ធ ២៥% លើឥណ្ឌា បន្ថែមពីលើពន្ធស្រាប់ ២៥% ដោយសារពួកគេទិញប្រេង និងអាវុធពីរុស្ស៊ី ដែលនាំឲ្យពន្ធសរុបមានអត្រា ៥០%។ ប្រសិនបើលទ្ធផលនៃកិច្ចប្រជុំអាម៉េរិក និងរុស្ស៊ីទទួលបរាជ័យ នោះឥណ្ឌាអាចប្រឈមនឹងការដំឡើងពន្ធបន្ថែមទៀតពី Donald Trump។

ថ្មីៗនេះ អាម៉េរិកកំពុងព្យាយាមសម្រុះសម្រួលបទឈប់បាញ់រវាងរុស្ស៊ី និងអ៊ុយក្រែន ដោយ Trump បានព្រមានអំពីផលវិបាកធ្ងន់ធ្ងរ ប្រសិនបើទីក្រុងម៉ូស្គូមិនយល់ព្រមចំពោះកិច្ចព្រមព្រៀងសន្តិភាព។ ជាលួទ្ធផល Trump និង Putin គ្រោងនឹងជួបប្រជុំគ្នានៅរដ្ឋ Alaska នៅថ្ងៃសុក្រនេះ ដើម្បីពិភាក្សាអំពីវិធីបញ្ចប់សង្រ្គាមនៅអ៊ុយក្រែន។

លោក Bessent បាននិយាយថា ៖

«ប្រធានាធិបតី Trump នឹងជួបជាមួយប្រធានាធិបតីពូទីន ហើយអឺរ៉ុបកំពុងគិតអំពីរបៀបដែលគាត់គួរធ្វើ និងអ្វីដែលគាត់គួរធ្វើ។ អឺរ៉ុបត្រូវតែចូលរួមជាមួយពួកយើងនៅក្នុងការដាក់ទណ្ឌកម្មទាំងនេះ និងមានឆន្ទៈក្នុងការដាក់ទណ្ឌកម្មបន្ទាប់បន្សំទាំងនេះ»។

ជារឿយៗ Trump តែងតែលើកឡើងថា ពន្ធគយគឺជាផ្នែកមួយនៃផែនការរបស់រដ្ឋបាលរបស់គាត់ក្នុងការជំរុញសេដ្ឋកិច្ចរបស់អាម៉េរិក និងធ្វើឱ្យពាណិជ្ជកម្មពិភពលោកមានភាពយុត្តិធម៌។ លើសពីនេះ លោកបានហៅឥណ្ឌាម្តងហើយម្តងទៀតថាជា អ្នករំលោភលើពន្ធគយ។ ការចរចាពាណិជ្ជកម្មរវាងទីក្រុងដេលី និងទីក្រុងវ៉ាស៊ីនតោនបានដំណើរការអស់រយៈពេលជាច្រើនខែ ហើយគ្រោងនឹងបន្តចរចារម្តងទៀតនៅថ្ងៃទី ២៥ ខែសីហាខាងមុខនេះ ខណៈដែលអត្រាពន្ធថ្មី ៥០% របស់ Trump លើការនាំចូលពីឥណ្ឌាគ្រោងនឹងចូលជាធរមាននៅថ្ងៃទី ២៧ ខែសីហា។ អ្នកជំនាញលើកឡើងថា ការបដិសេធរបស់ឥណ្ឌាក្នុងការកាត់បន្ថយពន្ធលើវិស័យកសិកម្ម និងផលិតផលទឹកដោះគោពីអាម៉េរិក គឺជាឧបសគ្គដ៏ធំមួយនៅក្នុងការចរចា។ប្រសិនបើពន្ធ ៥០% នេះចូលជាធរមានពិតមែន នោះឥណ្ឌានឹងក្លាយជាដៃគូពាណិជ្ជកម្មអាម៉េរិកដែលជាប់ពន្ធច្រើនជាងគេបំផុតនៅអាស៊ី ហើយបញ្ហានេះនឹងរារាំងយ៉ាងខ្លាំងដល់ការនាំចេញរបស់ខ្លួនរួមមាន វាយនភណ្ឌ និងគ្រឿងអលង្ការ។

ចាប់តាំងពីមានសង្រ្គាមរុស្ស៊ី-អ៊ុយក្រែនមក ឥណ្ឌាបានបង្កើនការនាំចូលប្រេងឆៅដែលមានតំលៃថោកពីរុស្ស៊ី ដែលជាហេតុធ្វើឱ្យទំនាក់ទំនងឥណ្ឌា-អាមេរិកកាន់តែតានតឹង និងរំខានដល់កិច្ចចរចាពាណិជ្ជកម្មដែលកំពុងបន្តជាមួយទីក្រុងវ៉ាស៊ីនតោន។ ការនាំចូលរបស់ឥណ្ឌាពីរុស្ស៊ីបានកើនឡើងពី ៣% ក្នុងឆ្នាំ ២០២១ ដល់ទៅ ៤០% នៅឆ្នាំ ២០២៤។ មិនត្រឹមតែប៉ុណ្ណោះ ទីក្រុងដេលីលើកហាតុផលថា ការទិញប្រេងពីរុស្ស៊ីគឺដើម្បីការពារប្រជាជនឥណ្ឌាក្រីក្ររាប់លាននាក់ពីការកើនឡើងថ្លៃដើម ដោយសារឥណ្ឌាគឺជាអ្នកនាំចូលថាមពលដ៏សំខាន់ ដូច្នោះហើយខ្លួនត្រូវតែទិញប្រេងឆៅដែលមានតម្លៃថោកបំផុត៕