ស្វាយរៀង ៖ ឡឹក ប៊ុនធឿន គឺជាឈ្មោះរបស់កសិករម្នាក់រស់នៅក្នុងឃុំស្វាយរំពារ ស្រុកស្វាយទាប ខេត្ត​ស្វាយរៀង។ ជាមួយនឹងចំណេះដឹងក្នុងការដាំដុះដែលទទួលបានបន្តពីឪពុកម្ដាយ លោក ប៊ុនធឿន បានចាប់យកការធ្វើកសិកម្មនេះ ជាមុខរបរសម្រាប់ចិញ្ចឹមគ្រួសារតែម្ដង ​ដោយចាប់ផ្តើមដាំដុះបន្លែនៅឆ្នាំ២០០៩ លើទំហំផ្ទៃដីប្រមាណជា ២ ០០០ ម៉ែក្រឡា រួមមានដំណាំខ្ទឹមស្លឹក និងត្រសក់ទ្រើងនៅទីវាល។

ក្រោយការចាប់ផ្តើមដាំដុះមិនបានប៉ុន្មានផង ដោយមើលឃើញពីភាពសកម្ម និងការឧស្សាហ៍ព្យាយាម លោក ឡឹក ប៊ុនធឿន ត្រូវបាន​កម្មវិធី ASPIRE ជ្រើសរើសជាប្រធានបណ្តុំអាជីវកម្មផលិតបន្លែនៅឆ្នាំ២០០៩ និងបានផ្តល់​ផ្ទះ​សំណាញ់មួយខ្នង ទំហំ ១០ម៉ែត្រ X ២០ម៉ែត្រ សម្រាប់ផលិតបន្លែសុវត្ថិភាព។ ជាមួយនឹងវិធីសាស្ត្រថ្មីនៃការដាំដុះនេះ លោក ប៊ុនធឿន ទទួលបានជោគជ័យជាទីគាប់ប្រសើរ និងបានទិញផ្ទះសំណាញ់បន្ថែមចំនួន៦ខ្នងទៀត ហើយបានកាត់បន្ថយស្ទើរតែទាំងស្រុង​ចំពោះការដាំដំណាំនៅទីវាល ខណៈដែលចំណូលដែលទទួលបានពីការលក់ទិន្នផលជាមធ្យមយ៉ាងហោចណាស់ ២០០០ដុល្លារក្នុងមួយខែ។

ដោយមើលឃើញពីសមត្ថភាព និងការខិតខំប្រឹងប្រែងរបស់លោក កម្មវិធីគាំទ្រសេដ្ឋកិច្ចជនបទ និងពាណិជ្ជផលិតផលកសិកម្ម (ASPIRE-AT) បានជ្រើសរើសរៀបចំបង្កើតសហគមន៍កសិកម្មនាចុងឆ្នាំ ២០២៣ សម្រាប់គាំទ្រលើផលិតកម្មបន្លែ ដែលមានឈ្មោះថា «សហគមន៍កសិកម្ម​អភិវឌ្ឍន៍បន្លែភូមិស្វាយធំ» ហើយលោកផ្ទាល់ក៏ត្រូវបានជាប់ឆ្នោតជាប្រធានក្រុមប្រឹក្សាភិបាលសហគមន៍កសិកម្មតាំងពីពេលនោះមក។

បើតាមការរៀបរាប់របស់លោក ប៊ុនធឿន បច្ចុប្បន្ន សហគមន៍របស់លោកមានសមាជិកចំនួន ៨៥គ្រួសារ និង​បានចាប់យក​ការដាំដុះ​ប្រភេទដំណាំ​ស្លឹក ដូចជា ស្ពៃក្រញាញ់ ស្ពៃតឿ ស្ពៃចង្កិះ ខ្ទឹម ជីនាងវង ក្រៅពីនោះមានប្រភេទដំណាំយកផ្លែ ដូចជា ត្រសក់ស្រូវ សណ្ដែកគួរ ត្រឡាច ននោង និងម្រះ​ជាដើម។

សម្រាប់លោក ប៊ុនធឿន មិនត្រឹមតែជាប្រធានក្រុមប្រឹក្សាភិបាលសហគមន៍កសិកម្មនោះទេ​ ថែមទាំងជា​អ្នកផលិតបន្លែក្នុងផ្ទះសំណាញ់ច្រើនជាងគេ និងជាឈ្មួញទិញបន្លែពីសមាជិកសហគមន៍យកទៅ​លក់បន្តឱ្យឈ្មួញផ្សេងៗទៀតក្នុងស្រុក (ផ្សារប្រសូត ផ្សារចក និងផ្សារក្រុងស្វាយរៀង) និងក្នុងតំបន់ជារៀងរាល់ថ្ងៃផងដែរ។

លោកបានបន្តឱ្យដឹងថា៖

«ជាមធ្យម សហគមន៍អាចប្រមូលផលបានប្រមាណ ១តោនក្នុងមួយថ្ងៃ សម្រាប់រដូវវស្សា និងអាចបាន២តោន សម្រាប់រដូវប្រាំង ហើយបើគិតតែគ្រួសារខ្ញុំ មួយថ្ងៃ​អាច​ប្រមូលបានប្រហែល ១០០ គីឡូក្រាម បើគិតជាចំណូលប្រហែល ២ពាន់ដុល្លារ ក្នុងមួយខែ»។

យ៉ាងណាក៏ដោយ ជានិច្ចកាល កសិកររូបនេះតែងទទួលបានការផ្តល់ប្រឹក្សា ក៏ដូចជាវិធីសាស្ត្រក្នុងការដាំដុះ និងមើលថែបន្លែសុវត្ថិភាពពីសំណាក់មន្ត្រីកសិកម្ម ជាពិសេស ក្រុមការងាររបស់កម្មវិធី គាំទ្រសេដ្ឋកិច្ចជនបទ និងពាណិជ្ជផលិតផលកសិកម្ម (ASPIRE-AT)

លោកបានបន្តឱ្យដឹងទៀតថា បន្លែសំបូរតែនៅរដូវប្រាំងប៉ុណ្ណោះ រីឯនៅរដូវវស្សា ផ្ទៃដីផលិតកម្មមានការ​ថយចុះ ពោលគឺដាំមិនបានពេញមួយរដូវដូចការដាំក្នុងផ្ទះសំណាញ់ឡើយ។ ជាទស្សនវិស័យនាពេលអនាគត លោក ឡឹក ប៊ុនធឿន ចង់ឱ្យសមាជិកសហគមន៍របស់ខ្លួន បង្វែរការចាប់អារម្មណ៍ពីការដាំដុះនៅទីវាល ងាកមកវិនិយោគការផលិតបន្លែក្នុងផ្ទះសំណាញ់វិញ ដែលគម្រោងដាំដុះបន្ថែមនេះ លោកនៅតែចង់ផ្ដោតទៅលើពពួកបន្លែយកស្លឹក ដើម្បីឱ្យការផលិត​បន្លែបានពេញ​មួយរដូវ ពោលគឺយ៉ាងតិច ៨ដង​ក្នុងមួយឆ្នាំ សម្រាប់ឆ្លើយតបទៅនឹងតម្រូវការទីផ្សារ ជាពិសេសនៅរដូវវស្សា និងអាចឈានទៅដល់​ការធ្វើកិច្ចសន្យារកសិកម្មផងដែរ៕