សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនភតិសន្យាហិរញ្ញវត្ថុ គឺសំដៅទៅដល់ក្រុមហ៊ុនដែលផ្ដល់សេវាកម្ចីសម្រាប់បង់រំលោះទៅលើសម្ភារៈមួយចំនួន ដូចជា ទូរស័ព្ទ ឡាន ម៉ូតូ និងគ្រឿងអេឡិចត្រូនិកជាដើម។ ក្រុមហ៊ុនភតិសន្យាហិរញ្ញវត្ថុ គឺជាក្រុមហ៊ុនស្របច្បាប់ដែលស្ថិតនៅក្រោមអាណាព្យាបាលរួមជាមួយធនាគារដែរ គឺធនាគារជាតិនៃកម្ពុជា។
ស្ថិតនៅក្រោមការគ្រប់គ្រងរបស់ធនាគារជាតិ ក៏មានន័យថាក្រុមហ៊ុនភតិសន្យាហិរញ្ញវត្ថុ ក៏ត្រូវតែប្រតិបត្តិតាមការតម្រូវនានា ដើម្បីអាចក្លាយជាស្ថាប័នស្របច្បាប់មួយ។ យ៉ាងណាមិញ បច្ចុប្បន្ននេះ សេវាកម្មបង់រំលោះសម្ភារៈប្រើប្រាស់មានការពេញនិយមយ៉ាងខ្លាំងពីសំណាក់ប្រជាពលរដ្ឋ រហូតដល់មានករណីមួយចំនួនដែលអតិថិជនបង់រំលោះជាមួយហាងលក់សម្ភារៈផ្ទាល់តែម្ដង។
ទាក់ទិននឹងចំណុចនេះ លោក ហួរ ពុទ្ធី ប្រធានជាន់ខ្ពស់ផ្នែករៀបចំយុទ្ធសាស្ត្រឥណទាននៃធនាគារអ៉ីអនបានឱ្យដឹងថា ការប្រើសេវាបង់រំលោះរបស់ក្រុមហ៊ុនភតិសន្យាហិរញ្ញវត្ថុ គឺស្មើនឹងការធានាសុវត្ថិភាពរបស់អតិថិជនខ្លួនឯងទៅវិញទេ។
កាលណាអតិថិជនប្រើប្រាស់សេវាកម្មរបស់ស្ថាប័នស្របច្បាប់បែបនេះ ពួកគេទទួលបានកិច្ចការពារពីច្បាប់នៅពេលពួកគេមានបញ្ហាណាមួយ។ ផ្ទុយទៅវិញ ប្រសិនបើអតិថិជនមិនបានប្រើសេវាពីក្រុមហ៊ុនស្របច្បាប់នោះទេ អាចនឹងបណ្ដាលឱ្យមាននូវបញ្ហាដែលតែងតែប្រទះឃើញ ដូចជាការរឹបអូសសម្ភារៈជាដើម។ នេះជាការបញ្ជាក់បន្ថែមរបស់លោក ហួរ ពុទ្ធី។
ជាក់ស្ដែង លោក សៀង លី ដែលជាអ្នកប្រើប្រាស់សេវាកម្មបង់រំលោះជាមួយក្រុមហ៊ុនភតិសន្យាបានរៀបរាប់ថា ដោយសារតែលោកមិនមានលទ្ធភាពនៅក្នុងការទិញម៉ូតូដោយប្រើប្រាស់ថវិកាទាំងស្រុង ដូច្នេះលោកមានភាពចាំបាច់ក្នុងការប្រើប្រាស់សេវាបង់រំលោះ។ យ៉ាងណាមិញ ការប្រើប្រាស់សេវាបង់រំលោះនេះបានជួយសម្រាលជីវភាពរបស់លោកបានមួយ ផ្នែកធំ ដោយសារតែលោកមានតម្រូវការប្រើប្រាស់ម៉ូតូជាមធ្យោបាយសម្រាប់ទៅធ្វើការ។
លោក សៀង លី បានឱ្យដឹងទៀតថា លោកតែងតែជជែកជាមួយនឹងស្ថាប័ន នៅពេលដែលលោក ជួបបញ្ហាណាមួយពាក់ព័ន្ធនឹងការសងត្រឡប់ ហើយភាគីគ្រឹះស្ថានវិញក៏បើកចំហរនៅក្នុងការជជែក ដើម្បីរកដំណោះស្រាយផងដែរ។
ទាក់ទិននឹងនិតិវិធីដោះស្រាយបញ្ហានេះ លោក ហួរ ពុទ្ធី បានបន្តឱ្យដឹងថានិតិវិធីរបស់ក្រុមហ៊ុនភតិសន្យាគឺដូចទៅនឹងគ្រឹះស្ថានធនាគារ និងមីក្រូហិរញ្ញវត្ថុផងដែរ ពោលគឺប្រសិនបើអតិថិជនជួបបញ្ហាមិនមានលទ្ធភាពសង គ្រឹះស្ថានព្យាយាមរកដំណោះស្រាយជូន ហើយមិនមានដាច់ខាត នូវយន្ដការរឹបអូសសម្ភារៈពីអតិថិជនមកវិញ។ ហេតុនេះហើយ ក្នុងនាមជាអ្នកជំនាញ លោកលើកទឹកចិត្តឱ្យប្រជាជនដែលមានតម្រូវការបង់រំលោះ សូមឱ្យប្រើប្រាស់សេវាកម្មនេះជាមួយស្ថាប័នស្របច្បាប់ ដែលមានអាជ្ញាធរគ្រប់គ្រងត្រឹមត្រូវ។
បន្ថែមពីលើនេះ លោកក៏បានក្រើនរំលឹកទៅដល់ប្រជាជន ឱ្យមានការថ្លឹងថ្លែងឱ្យបានល្អិតល្អន់មុន សម្រេចចិត្តទិញសម្ភារៈអ្វីមួយ ជាពិសេសគឺការទិញដោយប្រើប្រាស់សេវាបង់រំលោះនេះតែម្ដង។ ថ្លឹងថ្លែងនៅត្រង់នេះ លោកចង់សំដៅទៅលើការគិតគូទៅលើកម្រិតនៃភាពចាំបាច់ នៅក្នុងការទិញ របស់នោះ ថាតើទិញមកគ្រាន់តែដើម្បីបំពេញចំណង់ទេ ឬក៏ដើម្បីបង្កើនចំណូល៕
Account
Security
Favourite Content