សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សហគមន៍តំបន់ការពារធម្មជាតិភ្នំទ័ពជាង មានទីតាំងស្ថិតនៅភូមិព្រះអង្គកែវ និងភូមិបាក់អង្រុត ក្នុងឃុំដងពែង ស្រុកស្រែអំបិល ខេត្តកោះកុង ដែលមានផ្ទៃដីទំហំ ៣០៩៣ហិកតា និងមានប្រជាជនរស់នៅ ២៨១គ្រួសារ ស្មើនឹង ១៣៣០នាក់។ នៅក្នុងតំបន់ដ៏មានសក្តានុពលទេសចរណ៍បែបធម្មជាតិមួយនេះមានដូចជា ភ្នំយាយជី ឆាយខ្សែភ្លើង ថ្មវិហារ រូងតាងួន វាលថ្មអណ្តើក វាលស្មៅពណ៌មាស ស្ទឹងពង្រូលក្រោមស្ទឹងពពក និងស្ថានីយវារីអគ្គិសនីជាដើម ដែលជាតំបន់ទេសចរណ៍ធម្មជាតិដ៏ល្អដែលអាចទាក់ទាញភ្ញៀវទេសចរ។
លោក ឡុង ណេត អនុប្រធានសហគមន៍តំបន់ការពារធម្មជាតិភ្នំទ័ពជាងបានប្រាប់ AMS ថា វិស័យទេសចរណ៍នៅតំបន់នេះអាចជួយជំរុញដល់សេដ្ឋកិច្ចគ្រួសារនៃសហគមន៍ក្នុងតំបន់ការពារធម្មជាតិភ្នំទ័ពជាងបានប្រសើរ ព្រោះមានផលិតផលទេសចរណ៍ដូចជា ការបោះតង់ ការផ្តល់សេវានាំភ្ញៀវចូលព្រៃ ការជិះគោយន្ត និងការផ្គត់ផ្គង់ម្ហូបអាហារនៅក្នុងតំបន់។ ក្រៅពីនេះសហគមន៍ក៏មានផលិតផលអនុស្សាវរីយ៍ផងដែរ ដូចជា កន្រ្តកឫស្សី និងជើងធូកធ្វើអំពីឫស្សី តុ-កៅអីធ្វើអំពីឫស្សី និងផលិតផលទឹកឃុំព្រៃធម្មជាតិជាដើម។
លោក ឡុង ណេត បានមានប្រសាសន៍ថា ៖
“កាលពីពេលចូលឆ្នាំកន្លងទៅនេះ យ៉ាងហោចណាស់ទេសចរមកកម្សាន្តជាង១០០ នាក់ ដែលក្នុងនោះភ្ញៀវទេសចរបរទេសមានប្រមាណជាង២០នាក់ដែរ។ ភ្ញៀវមកភាគច្រើន គាត់មកលេងនៅតំបន់ស្ទឹងពង្រួល ហើយអ្នកដែលចង់ស្នាក់នៅគឺគេងនៅស្ទឹងពពក ដោយឡែកតំបន់ដែលទាក់ទាញទេសចររួមមាន ស្ទឹងពង្រួល វាលថ្មអណ្ដើក វាលស្មៅពណ៌មាស ថ្មវិហារ រូងតាងួន និងទំនប់អគ្គិសនីជាដើម។”
លោកអនុប្រធានសហគមន៍ភ្នំទ័ពជាងបានបញ្ជាក់ថា ៖
“សហគមន៍របស់យើងនៅថ្ងៃខាងមុខនេះនឹងមានភ្ញៀវទេសចរជាតិ- អន្តរជាតិ មកលេងកាន់តែច្រើន ដោយសារនៅតំបន់នេះមានសក្តានុពលខ្លាំង ជាតំបន់ទេសចណ៍ធម្មជាតិ អេកូទេសចរណ៍ អំណោយផលពីធម្មជាតិ ជាមួយសម្រស់ធម្មជាតិយ៉ាងស្រស់ស្អាតគ្រប់កន្លែង។”
គួររំលឹកដែរថា តំបន់ទេសចរណ៍ «ស្ទឹងពពក» មានសក្តានុពលទេសចរណ៍ដ៏អស្ចារ្យ ដោយភ្ញៀវទេសចរអាចគយគន់ទេសភាពពពករសាត់ដេដាសសក្បុស យ៉ាងស្រស់ស្អាត ជាផ្ទាំងទស្សនីយភាពថ្មីមួយសម្រាប់អ្នកទេសចរដែលបានទៅដល់តំបន់ «ស្ទឹងពពក» ជាពិសេសនៅដើមខែវស្សា និងដើមរដូវរងារ។ ក្រៅពីនេះ អ្នកទេសចរអាចទស្សនាដងព្រែកអមដោយព្រៃព្រឹក្សាដ៏ត្រឈឹងត្រឈៃ គយគន់ទេសភាពទឹកជ្រោះឬទឹកធ្លាក់, ព្រៃភ្នំ ដោយអាចហែលទឹក ឬលេងទឹក ពិកនិច, ឡើងភ្នំ, រៀបចំដំណើរកម្សាន្ត, ដើរថ្មើរជើង, បោះជំរុំ ឬបោះតង់,គយគន់ថ្ងៃលិច,ដើរទស្សនាកសិដ្ឋាន, ញុំអាហារ, ជិះកង់, ជិះត្រាក់ទ័រសណ្តោង ឬរ៉ឺម៉ក, គយគន់ថ្ងៃរះ, ឬចងអង្រឹងស្នាក់នៅក្នុងតំបន់ទេសចរណ៍ធម្មជាតិដ៏ស្ងប់ស្ងាត់។
Account
Security
Favourite Content