សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រៃវែង ៖ ក្នុងឱកាសជួបសំណេះសំណាលជាមួយសិស្ស និស្សិត និងលោកគ្រូ អ្នកគ្រូ នៅមជ្ឈមណ្ឌលអប់រំ និងបណ្ដុះបណ្ដាល ជា ស៊ីម កំចាយមារ នាព្រឹកថ្ងៃទី ៣ ខែកក្កដា ឆ្នាំ២០២៥ នេះ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានគូសបញ្ជាក់អំពីអត្ថប្រយោជន៍ផ្នែកសេដ្ឋកិច្ចចេញពីការបើកច្រកព្រំដែន ម៉ឺនជ័យ ដែលជាច្រកព្រំដែនអន្តរជាតិរវាងកម្ពុជា និងវៀតណាម ដោយភាគីទាំងពីរបានស្រុះស្រួលគ្នាក្នុងការទម្លាក់ខ្សែព្រំដែនទៅក្នុងជ្រលងទឹកជ្រៅ ហើយធានាថា ប្រជាជនទាំងសងខាងមានទឹកប្រើប្រាស់អាចនេសាទបាន និងយកទឹកដើម្បីទៅបង្កបង្កើនផលបាន។
សម្ដេចបានមានប្រសាសន៍ថា ៖ ការបើកច្រកម៉ឺនជ័យ មានសារៈសំខាន់ គឺជំរុញការតភ្ជាប់សេដ្ឋកិច្ច ដែលបញ្ហាពាណិជ្ជកម្ម ការផ្លាស់ប្ដូរទំនិញ ការទៅមករកគ្នាគឺជាគោលដៅធំ ហើយសង្ឃឹមថានៅក្នុងខេត្តព្រៃវែង នឹងមានការផ្លាស់ប្ដូរពាណិជ្ជកម្មកើនឡើងតាមរយៈការបើកច្រកអន្តរជាតិថ្មី។
សម្ដេចបញ្ជាក់ថា ៖
«ដោយសារបច្ចុប្បន្ន ច្រកព្រំដែននេះមិនទាន់សម្ពោធ ដូច្នេះ អ្នករកស៊ី ឬវិនិយោគិននៅមិនទាន់ដឹង ប៉ុន្តែនៅពេលបើកសម្ពោធផ្លូវការហើយ យើងនឹងអាចទាក់ទាញការវិនិយោគ ឬប្រើប្រាស់ការដឹកជញ្ជូនតាមច្រកមួយនេះ ដើម្បីទៅមករកគ្នាក្នុងការផ្លាស់ប្ដូរពាណិជ្ជកម្ម»។
ទន្ទឹមគ្នានេះ សម្ដេចក៏បានគូសបញ្ជាក់ផងដែរថា ទំហំពាណិជ្ជកម្មរវាងកម្ពុជា-វៀតណាម គឺបានឆ្លងផុតហួសពីកម្រិតពាន់លានដុល្លារហើយ។ ជាក់ស្ដែង កាលពីថ្ងៃទី ២៩ ខែមេសា មុនខួបលើកទី៥០ឆ្នាំ នៃការរំដោះភាគខាងត្បូងវៀតណាមមួយថ្ងៃ រដ្ឋមន្ត្រីពាណិជ្ជកម្មកម្ពុជា គឺលោកជំទាវ ចម និម្មល បានចុះហត្ថលេខាជាមួយរដ្ឋមន្ត្រីវៀតណាមក្នុងការតម្លើងកម្រិតគោលដៅ និងដាក់ចេញគោលដៅ ២០ពាន់លានដុល្លារ។
សម្ដេចតេជោ បានបញ្ជាក់ទៀតថា ៖
«ពីមុនភាគច្រើនយើងនាំចូលពីវៀតណាម ហើយយើងនាំចេញទៅវិញតិចជាង ប៉ុន្តែឥឡូវនេះ តួរលេខឆ្នាំ២០២៤ យើងនាំចេញទៅវៀតណាមច្រើនជាងពីវៀតណាមចូលមក។ ច្រកព្រំដែនអន្តរជាតិម៉ឺនជ័យ នឹងរួមចំណែកយ៉ាងសំខាន់ក្នុងការដោះដូរទំនិញរវាងប្រទេសទាំងពីរ កម្ពុជា-វៀតណាម ជាពិសេសផលិតកសិផលកសិកម្មរបស់ប្រជាពលរដ្ឋដែលស្ថិតនៅជាប់ព្រំដែននៃប្រទេសទាំងពីរតែម្ដង»។
យ៉ាងណាមិញ ទីស្នាក់ការច្រកទ្វារព្រំដែនអន្តរជាតិ ម៉ឺនជ័យ-តឺនណាម (កម្ពុជា-វៀតណាម) ដំបូងឡើយ ជាទីតាំងច្រករបៀងដែលប្រជាជនរស់នៅទាំងសងខាងតែងតែដោះដូរទំនិញ និងកសិផលទៅវិញទៅមក ហើយដោយសារទំនាក់ទំនងល្អផ្នែកសេដ្ឋកិច្ចបែបនេះ ក្នុងអំឡុងឆ្នាំ២០១០ រាជរដ្ឋាភិបាលកម្ពុជាបានបង្កើតជាច្រកទ្វារតំបន់ព្រំដែនម៉ឺនជ័យ ហើយនៅថ្ងៃទី៣០ ខែមេសា ឆ្នាំ២០១៤ រាជរដ្ឋាភិបាលកម្ពុជា បានសម្រេចដំឡើងកម្រិតច្រកទ្វារតំបន់ ព្រំដែនម៉ឺនជ័យ ទៅជា “ច្រកទ្វារព្រំដែនអន្តរជាតិម៉ឹនជ័យ” ។
គួរបញ្ជាក់ផងដែរថា ច្រកទ្វារព្រំដែនអន្តរជាតិនេះ មានទំហំផ្ទៃដីសរុបចំនួន ៨៩,៥៧៧ម៉ែត្រការេ ដោយបានដោះស្រាយផលប៉ះពាល់ជូនអ្នកពាក់ព័ន្ធបានរួចរាល់នៅឆ្នាំ២០២០ និងបានរៀបចំឱ្យមានហេដ្ឋារចនាសម្ព័ន្ធដូចខាងក្រោម៖ អគារបំពេញបែបបទចេញ-ចូលបណ្តោះអាសន្នចំនួន០១ខ្នង ទំហំ៤៥x៧,៣ម៉ែត្រ ស្មើនឹង០៦បន្ទប់ សាងសង់ក្នុងឆ្នាំ២០១៩។ ខ្លោងទ្វាររូបប្រាសាទអង្គរវត្តចំនួន០១ ប្រវែង២២,៤ម៉ែត្រ កម្ពស់១៧ម៉ែត្រ សាងសង់ក្នុងឆ្នាំ២០២០។ អគារបំពេញបែបបទចេញ-ចូលជាសំណង់រឹងមាំ ចំនួន០២ខ្នង ដោយមួយខ្នងមានទំហំ ៤៤x១៥ម៉ែត្រ ស្មើនឹង ១៤បន្ទប់ សាងសង់នៅឆ្នាំ២០២០៕
Account
Security
Favourite Content