ខុសប្លែកកាលពីប៉ុន្មានឆ្នាំមុន ដែលស្ទើរតែគ្រប់ផលិតផល ក៏ដូចជាសម្ភារៈប្រើប្រាស់នានាកើតចេញពីការសូនរូបដោយដៃគួបផ្សំជាមួយនឹងឧបករណ៍ជំនួញមួយចំនួនទៀតដែលគេមិនសូវឱ្យតម្លៃ និងគាំទ្រនោះ បច្ចុប្បន្ន មានការសង្កេតឃើញថា ប្រជាជនក្នុងស្រុក ជាពិសេសអ្នកដែលធ្វើដំណើរកម្សាន្តនៅក្នុងខេត្តសៀមរាប តែងឆ្លៀតចូលមើលពីសកម្មភាពយ៉ាងសកម្មរបស់កម្មករជំនាញ ព្រមទាំងបានហាត់រៀនធ្វើដោយខ្លួនឯងផ្ទាល់ ដើម្បីបានដឹងច្បាស់ពីតម្លៃនៃសិល្បៈសូនរូបខ្មែរ រាប់ទាំងការសូនពីដីតដ្ឋ និងសេរ៉ាម៉ិចផងដែរ។

មរតកសេរ៉ាម៉ិច ជាសិប្បកម្មសូនសម្ភារប្រើប្រាស់ពីសេរ៉ាម៉ិចមួយកន្លែង មានទីតាំងនៅផ្លូវ៦០ម៉ែត្រខាងស្ដាំដៃនៃស្ពាននាគ ទល់មុខអង្គរវីឡាចាស់ ខេត្តសៀមរាប ដែលកំពុងមានសកម្មភាពយ៉ាងមមាញឹកក្នុងការផលិតជាសម្ភារប្រើប្រាស់រាប់រយមុខ ហើយថែមទាំងមានសេវាកម្មបង្រៀនជំនាញពីការស្មូននេះដល់ភ្ញៀវទេសចរដែលមកទស្សនាដោយផ្ទាល់ទៀតផង។

លោក សុន សីហាក់ ជាម្ចាស់សិប្បកម្មខាងលើបានមានប្រសាសន៍ថា៖

«ឥឡូវនេះការលក់របស់យើងមានកើនឡើងជាងមុន មានទាំងការលក់បោះដុំទៅអ្នកយកទៅលក់បន្ត ទាំងការលក់រាយដែលគេទិញយកទៅតាំងនៅតាមសណ្ឋាគារ និងភោជនីយដ្ឋានថ្មីៗ ហើយមួយទៀត ភ្ញៀវទេសចរក៏មានដែរ ត្បិតមិនច្រើនតែមានរាល់ថ្ងៃ ហើយសម្រាប់ទីផ្សារដែលមានភាពទូលាយគឺនៅសៀមរាប និងភ្នំពេញ ខណៈដែលតម្លៃមានចាប់ពី ២ដុល្លាររហូតដល់ ជាង៧០០ដុល្លារ អាស្រ័យតាមប្រភេទ និងទំហំផលិតផលដែលអតិថិជនចង់បាន»។

លោកបានបញ្ជាក់ថា ពាក់ព័ន្ធទៅនឹងការទទួលបង្រៀនទេសចរដែលចង់ចេះ និងអនុវត្តផ្ទាល់គឺមានពេលវេលាច្បាស់ាស់ ជាមួយនឹងការកំណតម្លៃផងដែរ ដោយរយៈពេល២ម៉ោង ១៥ដុល្លារ ខណៈដែលអ្នកហាត់រៀនភាគច្រើនអាចផលិត ឬសូនបានជាផលិតផលចាន ថូផ្កា ឬកែវតូចៗ ហើយអតិថិជន ឬទេសចរដែលបានចំណាយថវិកាហាត់រៀនជំនាញ និងអនុវត្ត អាចទទួលបានផលិតផលរបស់ខ្លួនផលិតបានចំនួន១ ទុកជាអនុស្សាវរីយ៍។

យ៉ាណាក៏ដោយ ម្ចាស់សិប្បកម្មរូបនេះបានបញ្ជាក់ឱ្យដឹងថា យ៉ាងហោចណាស់ក្នុងមួយថ្ងៃមានអ្នកមកចូលទស្សនា និងហាត់រៀនកម្សាន្តប្រមាណចន្លោះពី១០-១៥នាក់ ខណៈដែលប្រភេទផលិតផលដែលសិប្បកម្មផលិតមានរហូតដល់ទៅជាង១០០មុខឯណោះ។

គួរកត់សម្គាល់ថា ស្ទើរតែគ្រប់ផលិតផលនីមួយៗដែលត្រូវបានផលិត និងស្មូនចេញពីសេរ៉ាម៉ិចមានសោភ័ណភាព និងគុណភាពល្អត្រូវការចំណាយពេលយូរជាងសូនពីដីឥដ្ឋធម្មតា ដោយសារគេត្រូវការពេល ចាប់ពី ១៤ថ្ងៃឡើងទៅក្នុងការធ្វើ អាស្រ័យទៅលើទំហំសម្ភារៈតូច ឬធំ។ ដោយឡែក ពាក់ព័ន្ធនឹងការផលិតទៀតសោត គេត្រូវសូនឱ្យចេញជារូបរាងកែវ ឬថូ ហើយទុកឱ្យស្ងួតល្អទើបអាចមកយកកាត់ អារ ឬឆ្លាក់ថែមថយជាម៉ូដផ្សេងៗរួចយកទៅដុតឱ្យឆ្អិនសាច់ល្អ។ បន្ទាប់ពីដុតរួចម្ដង វា​មាន​ពណ៌ក្រហមដូចស្មូនដីធម្មតា ទើបគេអាចយកវាទៅលាបពណ៌ ហើយដុតក្នុងឡម្ដងទៀតទើបរួចជាស្រេច ដែលដំណើរការបែបនេះហើយទើបធ្វើឱ្យវាមានគុណភាពមាំ និងធន់ជាងផលិតផលសូនរូបធម្មតា។

យ៉ាងណាមិញ អាជីវកម្មមួយនេះក៏ប្រឈមមុខនឹងបញ្ហាមួយចំនួនដែរ ជាពិសេស​បញ្ហាតម្លៃ ព្រោះវាជាផលិតផលធ្វើឡើងដោយដៃខុសប្លែកពីផលិតផលបរទេសដែលមានពុម្ពស្រាប់ ម៉្យាងទៀត នៅពេលមានបម្រែបម្រួលអាកាសធាតុក៏អាច​ធ្វើ​ឱ្យពណ៌របស់ផលិតផលប្រែប្រួលបាត់បង់សោភ័ណភាព និងធ្លាក់តម្លៃផងដែរ។

គួររំឭកដែរថា សិប្បកម្ម មរតកសេរ៉ាម៉ិច បានបើកដំណើរការអស់រយៈពេលជាង ៩ឆ្នាំ​មកហើយ និងទទួលបានការគាំទ្រច្រើន ទាំងជនបរទេស និងជនជាតិខ្មែរ ជាពិសេសអ្នកដែលស្រឡាញ៉ផលិតផលដែលផលិតឡើងដោយដៃ និងមានសិល្បៈ បង្កប់អត្ថន័យ វប្បធម៌ ។

ចុងក្រោយ លោក សីហាក់ ក៏បានសម្ដែងនូវក្ដីរីករាយ និងថ្លែងអំណរគុណដល់គ្រប់អតិថិជនទាំងអស់ ដែលតែងគាំទ្រដល់ផលិតផលស្មូនរបស់សិប្បកម្ម មរតកសេរ៉ាម៉ិច នាពេលកន្លងមក ក៏ដូចជាបច្ចុប្បន្ន ហើយក៏សូមអំពាវនាវដល់បងប្អូនប្រជាខ្មែរទាំងក្នុង និងក្រៅស្រុក បន្តគាំទ្រផលិតផលខ្មែរ ដើម្បីអាចរក្សាបាននូវកេរដំណែលនៃសិល្បៈខ្មែរ ក៏ដូចជាជួយជំរុញនូវកម្រិតជីវភាពប្រជាសហគមន៍ដែលជាអ្នកផលិតផលដែរ៕