សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិស័យរដ្ឋ និងឯកជន ជាពិសេសអ្នកពាក់ព័ន្ធនឹងផលិតកម្មម្រេចកម្ពុជា បានបង្ហាញក្ដីសាទរចំពោះការសម្រេចរបស់រដ្ឋាភិបាលចិនដែលអនុញ្ញាតឱ្យមានការនាំចូលនូវកសិផលម្រេចជាគ្រឿងទេសរបស់កសិករខ្មែរទៅកាន់ទីផ្សារប្រទេសចិន បន្ទាប់ពីកម្ពុជាបានបំពេញគ្រប់លក្ខខណ្ឌបច្ចេកទេសភូតគាមអនាម័យ ស្របតាមការកំណត់របស់ភាគីចិន។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ជំទាវ អ៊ឹម រចនា បានឱ្យដឹងថា មកដល់ពេលនេះ មានក្រុមហ៊ុនចំនួន ៧ហើយ ដែលបានស្នើសុំទៅកាន់ក្រសួងកសិកម្ម ក្នុងការនាំចេញម្រេចទៅកាន់ប្រទេសចិន តែការនាំចេញម្រេចខ្មែរទៅកាន់ទីផ្សារចិន ពុំទាន់បានកំណត់ពេលវេលា និងចំនួនជាក់លាក់នៅឡើយទេសម្រាប់ជើងដំបូង។
ជំទាវ អ៊ឹម រចនា បានបញ្ជាក់ថា ៖
“កម្ពុជាជាភាគីនាំចេញម្រេចទៅកាន់ទៅផ្សារចិន រីឯចិនគេចាំទទួលទិញម្រេចខ្មែរទាំងអស់នៅទូទាំង ២៥ខេត្តក្រុង។ ខ្ញុំសង្ឃឹមថា យើងនឹងមានម្រេចច្រើននាំចេញទៅចិន ព្រោះគេទីផ្សារធំទូលាយ។ កន្លងមកកម្ពុជា បាននាំចេញចេកស្រស់ ស្វាយស្រស់ និងមៀនស្រស់ ជាច្រើនទៅកាន់ទីផ្សារចិន ហើយសម្រាប់ការនាំចេញម្រេចទៅកាន់ទីផ្សារចិននេះ គឺជាលើដំបូង ហើយមិនដូចការនាំចេញទៅកាន់ទីផ្សារអឺរ៉ុបនោះទេ ព្រោះទីផ្សារអឺរ៉ុបគេទទួលទិញតែម្រេចកំពតប៉ុណ្ណោះ។”
អ្នកនាំពាក្យវ័យក្មេងរូបនេះបានគូសបញ្ជាក់ថា ម្រេចខ្មែរមានវត្តមាននៅលើទីផ្សារចិន នឹងជួយលើកកម្ពស់កសិផលរបស់កម្ពុជា ជាពិសេសដំណាំម្រេចនៅតាមបណ្ដាខេត្តផ្សេងៗទៀត ដែលកន្លងមកហាក់ពុំសូវមានការយកចិត្តទុកដាក់ ឬគាំទ្រឱ្យបានច្រើនដូចម្រេចនៅខេត្តកំពតនោះទេ ខណៈខេត្តផ្សេងៗទៀត ក៏មានផលិតផលម្រេច ដែលមានគុណភាពល្អដូចគ្នា។
បើតាមសា្ថនទូតកម្ពុជាប្រចាំនៅប្រទេសចិនបានចុះផ្សាយលើហ្វេសប៊ុកថា ដើម្បីពន្លឿនការអនុវត្តបែបបទលក្ខខណ្ឌតម្រូវភូតគាមអនាម័យ សម្រាប់ការនាំចេញម្រេចពីកម្ពុជាទៅប្រទេសចិន រដ្ឋបាលគយ ស្ថានទូតចិនប្រចាំកម្ពុជា និងក្រសួងកសិកម្មរុក្ខាប្រមាញ់ និងនេសាទកម្ពុជា បានចុះហត្ថលេខារួមគ្នារវាងភាគីចិន-កម្ពុជា កាលពីខែវិច្ឆិកា ឆ្នាំ២០២២ ដោយកាលពីខែមេសាកន្លងទៅនេះ ភាគីកម្ពុជា-ចិន ក៏បានពិនិត្យទីតាំងដាំម្រេច និងរោងចក្រវេចខ្ចប់ម្រេច តាមរយៈ Video Conference ផងដែរ។
សូមបញ្ជាក់ថា កម្ពុជាមានទីតាំងដាំដំណាំម្រេចចំនួន ២៨កន្លែង និងរោងចក្រវេចខ្ចប់ចំនួន ៧កន្លែង ដែលត្រូវបានចុះបញ្ជី និងទទួលបានការអនុញ្ញាតក្នុងការនាំចេញពីភាគីចិន និងត្រូវបានអនុញ្ញាតឱ្យនាំចេញទៅប្រទេសចិនក្នុងឆ្នាំ២០២៣នេះ ហើយក៏ជាគ្រឿងទេសដំបូងគេ ដែលត្រូវបានអនុញ្ញាតឱ្យនាំចូលទៅកាន់ទីផ្សារចិនផងដែរ។
លោក ងួន ឡាយ ប្រធានសមាគមលើកស្ទួយម្រេចកំពតបានប្រាប់ AMS ថា លោកស្វាគមន៍ការយល់ព្រមពីប្រទេសចិនសម្រាប់ការនាំចូលម្រេចរបស់ប្រទេសកម្ពុជាទៅកាន់ទីផ្សារប្រទេសរបស់ខ្លួនដោយផ្ទាល់ជាមួយនឹងការបង្ហាញពីទំនុកចិត្ត។
លោក ងួន ឡាយ បានមានប្រសាសន៍ថា ៖
“យើងមានភាពរីករាយសម្រាប់ជោគជ័យកសិកររបស់យើងដែលអាចផលិតបានម្រេចគ្រប់ស្ដង់ដាដែលគេតម្រូវ ដែលអាចនឹងទទួលបានចំណែកទីផ្សារនៅចិនកាន់តែធំ និងមានតម្លៃថ្លៃគួរសមអាចទទួលយកបាន។”
លោកបានបញ្ជាក់ថា ៖
“ម្រេចរបស់យើងនាំចេញទៅកាន់ប្រទេសចិនដោយផ្ទាល់ ដែលជាទីផ្សារដ៏ធំមួយសម្រាប់ប្រទេសកម្ពុជា មានន័យថា ម្រេចរបស់កសិករយើង មានគុណភាពប្រសើរឡើងហើយ ដែលរួមចំណែកដល់ការលើកកម្ពស់ការអភិវឌ្ឍន៍សេដ្ឋកិច្ចរបស់កម្ពុជា ក៏ដូចជាបង្កើតការងារ និងប្រាក់ចំណូលបន្ថែមដល់កសិកររបស់យើងផងដែរ។”
ក្រសួងកសិកម្ម រុក្ខាប្រមាញ់ និងនេសាទ នៅក្នុងរបាយការណ៍រយៈពេល ៣ខែ ដើមឆ្នាំ២០២៣បានបង្ហាញថា ការនាំចេញម្រេចសម្រេចបាន ៨២២,៦៥ តោន ក្នុងនោះនាំចេញទៅប្រទេសវៀតណាមចំនួន ៧៦៥ តោន, អាមេរិក ២៦,១៤តោន, កូរ៉េ ១៦,២ តោន, បារាំង ៩,៥៤ តោន, បែលហ្ស៊ិក ២,៣៦ តោន, ជប៉ុន ១,៣៨តោន, ឥណ្ឌា ០,៩៦ តោន, អាល្លឺម៉ង់ ០,៩០ តោន, សិង្ហបុរី ០,១០ តោន, កោះតៃវ៉ាន់ ០,០៤ តោន, អូស្ត្រាលី ០,០៣ តោន និងប្រទេសម៉ាឡេស៊ី ០,០០២ តោន៕
Account
Security
Favourite Content