បរទេស ៖ យោងទៅតាមប្រភពព័ត៌មានពីរ៉យទ័របានរាយការណ៍ថា ទីក្រុងម៉ូស្គូបានបង្វែរទិសដៅនៃការនាំចេញប្រេងរបស់ខ្លួនពីរដ្ឋមួយចំនួនទៅកាន់ទីផ្សារថ្មីៗដូចជា ​អាស៊ី អាហ្រ្វិក អាមេរិក​ឡាទីន និង​មជ្ឈិមបូព៌ា។

រដ្ឋមន្ត្រីថាមពលរុស្ស៊ី លោក Nikolay Shulginov បាននិយាយថា រុស្ស៊ី​បាន​គ្រប់​គ្រង​ការ​បង្វែរ​ទិសដៅ​នៃ​ការ​នាំ​ចេញ​​ទាំងស្រុង​ ដែល​ដំបូង​ធ្លាក់​ចុះ​ដោយ​សារ​ការ​ដាក់​ទណ្ឌកម្ម ប៉ុន្តែមិនមានការថយចុះនៃការលក់ទេ។ ស្របពេលនេះដែរ ឧបនាយករដ្ឋមន្ត្រីរុស្ស៊ី លោក Aleksandr Novak ក៏បានកត់សម្គាល់ថា បរិមាណនៃការនាំចេញទៅកាន់ប្រទេសឥណ្ឌាតែម្នាក់ឯងបានកើនឡើង ២២ ដងកាលពីឆ្នាំ ២០២២ កន្លងទៅនេះ។ មិនត្រឹមតែប៉ុណ្ណោះ ប្រទេសរុស្ស៊ីក៏បានក្លាយជាអ្នកផ្គត់ផ្គង់ប្រេងកំពូលរបស់ប្រទេសចិនក្នុងរយៈពេលពីរខែដំបូងនៃឆ្នាំ២០២៣នេះ ដែលបានកើនឡើង ២៣,៨ ភាគរយ។

លើសពីនេះទៅទៀត ប្រទេសរុស្ស៊ីមានបំណងជំរុញការផលិតហ្គាសរាវធម្មជាតិ (LNG) និងបង្កើនការនាំចេញរបស់ខ្លួនបន្ថែមទៀត ដើម្បីបំពេញការធ្លាក់ចុះនៃការផ្គត់ផ្គង់ហ្គាសទៅកាន់អឺរ៉ុប។ លោក NovaK បានបន្ថែមដែរថា ការពង្រីកទីផ្សារ LNG សកលគួរតែក្លាយជាអាទិភាពមួយសម្រាប់គោលនយោបាយថាមពលរបស់រុស្ស៊ី ដែលជំរុញឱ្យការផលិតប្រេងឥន្ធនៈត្រូវបានបង្កើនឡើងផងដែរ ព្រោះវាគឺជាកិច្ចការសំខាន់នៅក្នុងលក្ខខណ្ឌបច្ចុប្បន្ន ដោយសាររុស្ស៊ីបានបាត់បង់ការនាំចេញហ្គាសទៅកាន់អឺរ៉ុបក្នុងបរិមាណច្រើនផងដែរ។ មិនត្រឹមតែប៉ុណ្ណោះ រុស្ស៊ីកំពុងផ្តល់អាទិភាពដល់គម្រោង LNG បន្ទាប់ពីការផ្គត់ផ្គង់ហ្គាសទៅកាន់អឺរ៉ុបបានធ្លាក់ចុះដល់កម្រិតទាបក្នុងរយៈពេលប៉ុន្មានខែថ្មីៗនេះ ដោយសារតែសម្ពាធទណ្ឌកម្ម និងការបំផ្លិចបំផ្លាញនៃបំពង់បង្ហូរ Nord Stream ។

យោងតាមលោក ​Novak ដដែលបានឱ្យដឹងថា ផែនការអភិវឌ្ឍន៍ LNG របស់រុស្ស៊ីត្រូវការធនធានហ្គាសបន្ថែមទៀត ដើម្បីជំរុញការផលិតបន្ថែម ៣៤ លានតោនទៀតក្នុងមួយឆ្នាំ ជាមួយនឹងគោលដៅនៃការឈានដល់កម្រិតទិន្នផលយ៉ាងហោចណាស់ ១០០ លានតោនត្រឹមឆ្នាំ២០៣០។

ទោះជាយ៉ាងណាក្តី បន្ទាប់ពីសហភាពអឺរ៉ុបផ្អាកការនាំចូលប្រេងពីរុស្ស៊ី គឺសហរដ្ឋអាមេរិកបានក្លាយជាប្រទេសនាំចេញប្រេងកំពូលជំនួសប្រទេសរុស្ស៊ីទៅកាន់សហភាពអឺរ៉ុប។ យោងតាមទិន្នន័យបានឱ្យដឹងថាការផ្គត់ផ្គង់របស់រុស្ស៊ីទៅកាន់តំបន់នេះបានធ្លាក់ចុះពី ៣១ ភាគរយក្នុងខែមករាឆ្នាំ២០២២ មកត្រឹមតែ ៤ ភាគរយប៉ុណ្ណោះកាលពីខែធ្នូកន្លងទៅនេះ។ យ៉ាងណាមិញ ការនាំចូលប្រេងពីសហរដ្ឋអាមេរិកក្នុងអំឡុងពេលដូចគ្នានោះបានកើនឡើងពី ១៣ ភាគរយទៅដល់ ១៨ ភាគរយ ដោយសារបណ្តាប្រទេសសហភាពអឺរ៉ុបបានកាត់បន្ថយការនាំចូលប្រេងឆៅរបស់រុស្ស៊ី។ ទោះជាយ៉ាងណាក្តី បន្ទាប់ពីសង្គ្រាមរវាងរុស្ស៊ី-អ៊ុយក្រែន បានបង្កឱ្យមានភាពចលាចលនៅលើទីផ្សារប្រេងរបស់ពិភពលោក។

កាល​ពី​ចុង​ឆ្នាំ​២០២២ កន្លងទៅនេះ សហភាព​អឺរ៉ុប​បាន​បញ្ឈប់នាំចូល​ប្រេង​រុស្ស៊ី​ដឹក​តាម​សមុទ្រ ខណៈ​ដែលក្រុម ​G7 បាន​កំណត់​តម្លៃ​ប្រេងឆៅ​រុស្ស៊ី​ដឹកតាម​សមុទ្រ​ចំនួន ៦០ ដុល្លារ​ក្នុង​មួយ​បារ៉ែល។ ជាការឆ្លើយតប ប្រទេសរុស្ស៊ីបានហាមឃាត់ការដឹកជញ្ជូនប្រេងទៅឱ្យអ្នកទិញបរទេសដែលដាក់កំណត់តម្លៃ។ លើសពីនេះ ទីក្រុងប្រ៊ូសែលបានដាក់ទណ្ឌកម្មលើការនាំចូលផលិតផលប្រេងពីរុស្សីដឹកតាមសមុទ្រ និងដាក់កំណត់តម្លៃត្រឹម ១០០ ដុល្លារក្នុងមួយបារ៉ែល។

ទោះបីជាមានការដាក់ទណ្ឌកម្មក៏ដោយ រុស្ស៊ីបានបង្កើនទាំងការនាំចេញប្រេង និងផលិតកម្មប្រេងឆៅ ៧,៦ ភាគរយ និង ២ ភាគរយរៀងគ្នាកាលពីឆ្នាំមុនកន្លងទៅនេះ។ នៅឆ្នាំនេះផងដែរ ក្រុមហ៊ុនថាមពលរុស្ស៊ីបាននឹងកំពុងបង្កើនទិន្នផលបន្ថែមទៀត ជាមួយនឹងការផលិតជាមធ្យមប្រចាំថ្ងៃនៃប្រេងឆៅកើនឡើងជិត ២ ភាគរយនៅកាលពីខែកុម្ភៈ៕