ភ្នំពេញ ៖ សហគ្រិនដែលជាម្ចាស់អាជីវកម្មរាប់រយនាក់បានប្រមូលផ្ដុំគ្នា និងនាំយកនូវផលិតផលដែលជាសមិទ្ធផលរបស់ខ្លួនសរុបជាង២០០០ប្រភេទមកដាក់តាំងបង្ហាញនៅក្នុងទិវាប្រព័ន្ធអេកូឡូស៊ីសហគ្រិនភាព២០២៤ ក្រោមការរៀបចំដោយសហគ្រិនខ្មែរ (Khmer Enterprise) ហៅកាត់ KE នៅមជ្ឈមណ្ឌលសន្និបាត និងពិព័រណ៍កោះពេជ្រ នាថ្ងៃទី២៤-២៥ ខែវិច្ឆិកា ឆ្នាំ២០២៤ ក្រោមអធិបតីភាព ឯកឧត្តមអគ្គបណ្ឌិត​សភា​ចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រមទាំងមានការចូលរួមពីភាគីពាក់ព័ន្ធក្នុងប្រព័ន្ធអេកូឡូស៊ីសហគ្រិនភាពនេះផងដែរ។

តាមរយៈកម្មវិធីមួយនេះ ម្ចាស់អាជីវកម្មទាំងឡាយពិតជាមានសុទិដ្ឋិនិយម និងពោរពេញទៅមោទនភាព ដែលបានដាក់តាំងបង្ហាញនូវផលិតផលបង្កប់ដោយគំនិតច្នៃប្រឌិត ក៏ដូចជាសេវាកម្មផ្សេងៗសរុបច្រើនជាង ២០០០ប្រភេទ។ ក្រៅពីនេះ ក៏មានការតាំងបង្ហាញនូវគម្រោងបច្ចេកវិទ្យាដ៏អស្ចារ្យពីសិស្ស-និស្សិតនៅក្នុងតំបន់ផ្សារភ្ជាប់នវានុវត្តន៍ រួមមាន បទពិសោធន៍ VR (Virtual Reality) និងផលិតផលច្នៃប្រឌិតបែបវិទ្យាសាស្រ្តជាច្រើនមុខផ្សេងទៀតដោយមានការគាំទ្រពីសំណាក់សហគ្រិនខ្មែរផងដែរ។

កញ្ញា ឡាង ស៊ុយគាង ជាស្ថាបនិកអាជីវកម្មយីហោសម្លៀកក្នុងស្រុក BELEZA បានបង្ហាញក្ដីរីករាយ និងចំណាប់អារម្មណ៍ថា កម្មវិធីថ្ងៃមួយនេះ ពិតជាល្អមែនទែន ដោយសារមានអ្នកចូលរួមច្រើន មានទាំងសហគ្រិនជាម្ចាស់អាជីវកម្ម មានទាំងអ្នកទិញជាតំណាងចែកចាយនៅលើទីផ្សារបន្ត ក៏ដូចជាមន្ត្រីជំនាញមកពីស្ថាប័នពាក់ព័ន្ធ។ ពិសេសជាងនេះ ក្ឬៅពីជាឱកាសបង្ហាញផលិតផល និងសេវាកម្ម ដែលជាម៉ាកសញ្ញាផលិតឡើងនៅក្នុងស្រុក ថែមទាំងមានឱកាសទាក់ទងដៃគូធ្វើពាណិជ្ជកម្មផងដែរ។

កញ្ញាបន្ថែមថា ៖ «តាមរយៈវេទិកាមួយនេះ សម្រាប់អាជីវកម្មយើងផ្ទាល់ បានចូលរួមសកម្មភាពច្រើនជាមួយ KE ដែលយើងទទួលបានពានរង្វាន់នៅក្នុងឆ្នាំនេះផង និងបានចូលរួមវគ្គបណ្ដុះបណ្ដាល ទាំងផ្នែកអាជីវកម្ម ក៏ដូចជាការរៀបចំខ្លួនដើម្បីទទួលបានការវិនិយោគផងដែរ។ ដោយឡែក ពានរង្វាន់ដែលយើងទទួលបាន គឺជាកញ្ចប់ជំនួយឥតសំណង ហើយយើងក៏បានយកមកអភិវឌ្ឍន៍ម៉ាកសម្លៀកបំពាក់របស់យើងបន្ថែមទៀត ដូចជា ការរៀបចំជា Studio សម្រាប់ថតម៉ូដសម្លៀកបំពាក់ថ្មីៗ ដែលជួយសម្រួលដល់ការងារផ្សព្វផ្សាយក្នុងអាជីវកម្មរបស់ខ្ញុំបានច្រើន»។

ស្រដៀងគ្នានេះដែរ លោក ហ៊ គីមស៊ ជា Associate Marketing Manager នៃក្រុមហ៊ុន KHMER HOUSEHOLD & HEALTHCARE (KHH) Co., Ltd បានរៀបរាប់ដែរថា៖ទិវានេះគឺជាឱកាសល្អសម្រាប់ការដាក់តាំងបង្ហាញនូវផលិតផលក្នុងស្រុកដែលពោរពេញទៅដោយគុណភាពមិនចាញ់ផលិតផលដែលនាំចូលនោះទេ។

លោកបានសង្កត់ធ្ងន់ថា ៖ «កាលពីប៉ុន្មានឆ្នាំមុន យើងទទួលស្គាល់ថា អតិថិជនក្នុងស្រុកភាគច្រើនមានទំនោរគាំទ្រទៅលើផលិតផលនាំចូល ដោយតែបញ្ហាគុណភាពរបស់គេល្អជាង។ ប៉ុន្តែ បច្ចុប្បន្ននេះ ម្ចាស់អាជីវកម្មដែលជាអ្នកផលិតបានសិក្សា និងមានបទពិសោធន៍ច្បាស់ពីការផលិត ជាពិសេសទទួលបាននូវការជួយជ្រោមជ្រែងពីសហគ្រិនខ្មែរ KE ទាំងបច្ចេកទេស ទាំងដើមទន់ ដែលអាចឱ្យការផលិតនូវផលិតផលក្នុងស្រុកមានគុណភាពខ្ពស់មិនចាញ់របស់ដែលនាំចូលនោះឡើយ ហើយអ្នកទិញយកទៅប្រើប្រាស់ផ្ទាល់ ឬដៃគូពាណិជ្ជម្មយកទៅលក់បន្តក៏អាចភ្លក្ស ឬធ្វើតេស្តបានភ្លាមៗនៅនឹងកន្លែងដាក់តាំងបង្ហាញ»។

ឆ្លៀតនៅក្នុងឱកាសនេះ លោក ហ៊ គីមស៊ ក៏បានបញ្ចេញជាទស្សនទានផ្ទាល់ខ្លួនថា ចំពោះម្ចាស់អាជីវកម្មផ្សេងៗទៀត គួរតែចូលរួមសកម្មភាព ជាមួយសហគ្រិនខ្មែរ (Khmer Enterprise) ឬហៅថា KE ទាំងអស់គ្នា ត្បិតថាអាចទទួលបានផលប្រយោជន៍យ៉ាងច្រើន ទាំងចំណេះដឹងនៃការគ្រប់គ្រង ការធ្វើទីផ្សារ ការសហការស្វែងរកដៃគូផ្គត់ផ្គង់ ជាពិសេស ពួតដៃគ្នាក្នុងការផលិត និងកែច្នៃផលិតផលក្នុងស្រុកឱ្យកាន់តែមានគុណភាព គុណប្រយោជន៍ដែលទាក់ទាញអតិថិជនក្នុងស្រុកជឿទុកចិត្តក្នុងការប្រើប្រាស់ កាត់បន្ថយការនាំចូល ព្រោះផលិតក្នុងស្រុកក៏មានគុណភាព និងស្តង់ដារត្រឹមត្រូវ។

សូមជម្រាបផងដែរថា នៅក្នុងព្រឹត្តិការណ៍ដ៏អស្ចារ្យប្រចាំឆ្នាំ២០២៤មួយនេះ ក្រៅពីមានការដាក់តាំងបង្ហាញនូវរាល់ផលិតផលចម្រុះសរុបជាង២០០០ប្រភេទ ក៏មានការប្រកួតប្រជែងសង្វៀនរ៉ូបូត (BATTLEBOTX), ការសម្ពោធកម្មវិធីសហគ្រិនមហាវិទ្យាល័យរដូវកាលទី៣, កម្មវិធីប្រកួតគំរូធុរកិច្ច Y2B HACKATHON , វេទិកាផ្សារភ្ជាប់អ្នកផលិត និងទីផ្សារ, សន្និសីទវិនិយោគប្រកបដោយនិរន្តភាព, សន្និសីទប្រព័ន្ធអេកូឡូស៊ីសហគ្រិនភាព និងពិធីប្រគល់ពានរង្វាន់សហគ្រិនខ្មែរឆ្នាំ២០២៤ផងដែរ ៕