សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សួនផ្កាផ្ទះបៃតង គឺជាឈ្មោះរបស់អាជីវកម្មខ្នាតតូចមួយកន្លែង ដែលទទួលទិញផលិតផលខ្មែរជាច្រើនមុខយកមកលក់ចែកវចាយបន្តយ៉ាងសកម្មនៅក្នុងស្រុក។ ផលិតផលខ្មែរដែលមានលក់នៅក្នុងហាងនេះ សុទ្ធតែជាផលិតផលដែលផលិតចេញពីសហគមន៍ មានគុណភាពខ្ពស់ និងមានការទទួលស្គាល់ត្រឹមត្រូវតាមស្តង់ដារ។
សព្វថ្ងៃនេះ ផលិតផលដែលកំពុងតាំងលក់នៅក្នុងហាង សួនផ្កាផ្ទះបៃតង រួមមានដូចជា ប្រេងខ្យល់ ប្រេងក្រឡា បន្លែសុវត្ថិភាព ផ្លែឈើ ប្រហុក ផ្អក ត្រីងៀត សាច់គោងៀត និងអាហារកែច្នៃជាច្រើនប្រភេទទៀត ដែលយកចេញពីប្រភពផ្សេងៗគ្នា។
អ្នកស្រី យ៉ែម ណារឿន ជាម្ចាស់ហាងសួនផ្កាផ្ទះបៃតងបានប្រាប់ AMS ថា ៖
“យើងមានលក់ផលិតផលសឹងតែគ្រប់មុខដែលយកមកពីកសិករ និងសហគមន៍កសិកម្ម ២៥ខេត្តក្រុង។ និយាយទៅឲ្យតែជាផលិតផលខ្មែរមានស្តង់ដារ មានការវេចខ្ចប់ត្រឹមត្រូវ គឺយើងយកមកលក់ទាំងអស់ ហើយ ដើម្បីអាចធានានូវសុវត្ថិភាពនៃផលិតផលទាំងនោះបានត្រូវឆ្លងកាត់ការត្រួតពិនិត្យគុណភាព សុវត្ថិភាព ពោលគឺមុនយកចូលហាង គឺខាងសហគមន៍ដែលជាអ្នកផ្គត់ផ្គង់ត្រូវមានការត្រួតពិនិត្យ។”
អ្នកស្រីបានបន្តថា ៖
“សម្រាប់ផលិតផលបន្លែស្រស់ ភាគច្រើនយើងនាំយកមកពីសហគមន៍១នៅខេត្តកណ្ដាល រីឯអាហារក្រៀម ដូចជា ត្រីងៀត សាច់គោងៀត ប្រហុក ផ្អក និងមាំ យើងនាំយកពីសៀមរាប ពោធិ៍សាត់ និងបាត់ដំបងជាដើម។”
យ៉ាងណាមិញ ដើម្បីប្រមូលទិញផលិតផលពីគ្រប់ខេត្ត អ្នកស្រីមានបណ្ដាញដែលចាំទទួលទិញតែម្ដង ជាក់ស្ដែងដូចជានៅខេត្តពោធិ៍សាត់ អ្នកស្រីមានទីស្នាក់ការជាអ្នករៀបចំប្រមូលយកកសិផលមក។
អ្នកស្រីបានបញ្ជាក់ទៀតថា ៖
“ចំណែកតែនៅខេត្តមណ្ឌលគិរី យើងមានអ្នករៀបចំត្រួតពិនិត្យឱ្យហើយមុនយកមកចែកចាយនៅទីស្នាក់ការកណ្ដាល ដូចជា ផលិតផលអង្ករ និងបន្លែមើមដូចជាការ៉ុត ឆៃថាវ ហូរហែអញ្ចឹងទៅ និយាយរួមតាមតំបន់ ផលិតផលណាដែលល្អយើងយកមកលក់ ដែលយើងមានបណ្ដាញផ្គត់ផ្គង់មក។”
តាមរយៈបទពិសោធន៍អាជីវកម្មមួយនេះ អ្នកស្រីក៏សំណូមពរដល់រាជរដ្ឋាភិបាល អង្គការ និងដៃគូពាក់ព័ន្ធនានា សូមជួយពិនិត្យមើលទៅលើផ្នែកកង្វះខាតមួយចំនួនដែលជាឧបសគ្គដូចជា ការវេចខ្ចប់ ការដឹកជញ្ជូន បច្ចេកទេសកសិកម្ម ដើម្បីអាចមានលទ្ធភាពផ្គត់ផ្គង់នៅក្នុងស្រុកពេញលេញ ហើយអាចនាំយកចេញទៅក្រៅប្រទេសបានទៀតផង ព្រោះសព្វថ្ងៃនេះអាជីវកម្មមួយនេះផ្គង់ផ្គង់តម្រូវការក្នុងស្រុកមិនទាន់គ្រប់គ្រាន់នៅឡើយនោះទេ៕
Account
Security
Favourite Content