ភ្នំពេញ ៖ មនុស្សស្ទើរតែគ្រប់គ្នាសុទ្ធតែបានដឹងហើយថា ការជាប់កម្ចី ឬឥណទាន ដែលប្រជាជនតែងតែហៅជាភាសាសាមញ្ញថា “បំណុល” នោះ ជាធម្មតាមានទាំងល្អ និងភាពអាក្រក់។ ភាពល្អនោះគឺនៅពេលបើប្រាស់បំណុលត្រូវតាមគោលដៅ វានឹងអាចបង្កើនចំណូល និងផលចំណេញត្រឡប់មកវិញ ប៉ុន្តែភាពអាក្រក់នោះគឺការប្រើប្រាស់បំណុលមិនចំគោលដៅ ឬទិញរបស់របរដែលបង្កើនបន្ទុកបំណុលបន្ថែម ដូចជារបស់របរបង្អួតគ្នាជាដើម។

ទន្ទឹមនេះ មានសំនួរលើកឡើងថា តើអ្វីទៅជាបំណុលល្អ និងបំណុលអាក្រក់?

បំណុលល្អគឺជា​បំណុលដែលជួយផ្ដល់ផលចំណេញដល់យើងសម្រាប់ពេលបច្ចុប្បន្ន និងពេលអនាគត។ បំណុលល្អអាចជួយបង្កើនលុយឱ្យយើងដល់យើងកាន់តែច្រើនថែមទៀត នៅពេលដែលយើងប្រើប្រាស់កម្ចីត្រូវទៅតាមគោលដៅ ហើយលើសពីនេះ បំណុលល្អជាទូទៅមានការប្រាក់ទាប ឬកម្ចីផ្លូវការពីធនាគារ និងគ្រឹះស្ថានហិរញ្ញវត្ថុស្របច្បាប់។

ឧទាហរណ៍ ៖ បំណុលល្អ គឹយើងយកលុយទាំងអស់នោះទៅទិញផ្ទះ ឬអចលនទ្រព្យ ព្រោះវាមិនត្រឹមតែផ្ដល់ភាពងាយស្រួលដល់ការរស់នៅរបស់យើងនោះទេ វាថែមទាំងកើនតម្លៃពីមួយឆ្នាំទៅមួយឆ្នាំទៀតផង។ មួយទៀតគឺការវិនិយោគលើការសិក្សា គឺជាការវិនិយោគទៅលើអនាគតរបស់អ្នក ហើយបុគ្គលជោគជ័យគ្រប់ៗរូបតែងតែចង់បង្កើនចំណេះដឹង ព្រោះផលតបស្នងរបស់វាវិញ គឺច្រើនលើសលប់ប្រសិនបើយើងប្រើវាបានត្រឹមត្រូវ។ ការខ្ចីបំណុលដើម្បីពង្រីកអាជីវកម្មក៏គឺជាបំណុលល្អដែរ ហើយគ្រប់អាជីវកម្មទាំងអស់ទាមទារដើមទុនដើម្បីចាប់ផ្ដើមរកស៊ី និងរកផលចំនេញ។ នៅពេលដែលអ្នកអាចរកផលចំណេញបានហើយអ្នកអាចបង់រំលោះបំណុល ហើយថែមទាំងមានអាជីវកម្មសម្រាប់រកចំណូលអោយមួយទៀត។

បំណុលអាក្រក់៖ បំណុលអាក្រក់គឺបង្កើនបន្ទុកបន្ថែមដល់យើង ហើយវាមានការប្រាក់របស់វាក៏ខ្ពស់ផងដែរ ដូចជាកម្ចីក្រៅផ្លូវការ ឬចងការអ្នកផ្តល់កម្ចីក្រៅផ្លូវការ ដែលអាចឱ្យយើងធ្លាក់ចូលទៅក្នុងអន្ទាក់បំណុល និងពិបាកទូទាត់សង ដោយសារការប្រាក់ខ្ពស់ និងការជំរិតទារប្រាក់ជាដើម។ មួយវិញទៀត ការចំណាយទៅលើរបស់របរដែលឆាប់ធ្លាក់ថ្លៃ ហើយទាមទារឱ្យយើងអ្នកចំណាយទៅលើវាជាប្រចាំថែមទៀតផង ដោយឧទាហរណ៍មានដូចជាការទិញឡាន (បើយើងទិញឡានដើម្បីបម្រើដ​ល់គោលបំណងអាជីវកម្ម នោះវាអាចជាបំណុលល្អ) ព្រោះពេលខ្លះអ្នកអាចខ្ចីលុយគេ ដើម្បីមកទិញជាមួយការប្រាក់ខ្ពស់ ហើយអ្នកក៏ត្រូវចំណាយលើវាជាប្រចាំផងដែរ ដូចជាទៅលើការចាក់សាំងម៉ាស៊ូត ការជួសជុលជាដើម ក្រៅពីនេះតម្លៃរបស់វាគឺមានតែចុះមិនងាយនឹងកើនឡើងនោះទេ។ និយាយរួម គឺផលប្រយោជន៍ដែលឡានផ្ដល់ឱ្យ គឺតិចជាការចំណាយទៅលើវាដែលអ្នកអាចចាត់ទុកវាថាជាបំណុលអាក្រក់។ មួយទៀតនោះគឺការទិញដោយបង់រំលោះ ព្រោះថាបើអ្នកគិតទាំងលុយដែលបង់និងការប្រាក់ នៅពេលបង់រួច គឺការប្រាក់របស់វាខ្ពស់មែនទែនធៀបទៅនឹងតម្លៃដើមរបស់វា។ និយាយរួម ការចំណាយទៅលើអ្វីដែលក្រោយពេលទិញវា ហើយធ្វើឱ្យលុយចេញពីហោប៉ៅរបស់អ្នកបន្ថែមទៀត នោះហើយគឺជាបំណុលអាក្រក់៕