សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា រុស្ស៊ី និងអ៊ីរ៉ង់ បានបញ្ឈប់ការប្រើប្រាស់ប្រាក់ដុល្លារអាមេរិកក្នុងពាណិជ្ជកម្មទ្វេភាគី ដោយប្តូរទៅជាប្រើប្រាស់រូបិយប័ណ្ណជាតិរបស់ពួកគេវិញ។
យោងតាមការបញ្ជាក់របស់លោក Mohammad-Reza Farzin អភិបាលធនាគារកណ្តាលអ៊ីរ៉ង់ (CBI) បានឲ្យដឹងថា វិធានការនេះគឺជាផ្នែកមួយនៃផែនការដើម្បីប្រឆាំងនឹងទណ្ឌកម្មអយុត្តិធម៌។ អ៊ីរ៉ង់ បានចុះកិច្ចព្រមព្រៀងរូបិយប័ណ្ណជាមួយរុស្ស៊ី និងបញ្ឈប់ការប្រើប្រាស់ប្រាក់ដុល្លារ ដោយប្តូរមកប្រើប្រាស់រូបិយប័ណ្ណ រូប៊លរុស្ស៊ី និងរៀលអ៊ីរ៉ង់ប៉ុណ្ណោះ។ មិនត្រឹមតែប៉ុណ្ណោះ អាជ្ញាធរហិរញ្ញវត្ថុរបស់ប្រទេសទាំងពីរបានព្រមព្រៀងលើអត្រាប្តូរប្រាក់ដើម្បីប្រើប្រាស់ក្នុងប្រតិបត្តិការពាណិជ្ជកម្មបរទេសផងដែរ។
កាលពីខែកក្កដា ឆ្នាំ២០២២ អ៊ីរ៉ង់ និងរុស្សី ដែលជាប្រទេសនៅក្រោមទណ្ឌកម្មរបស់សហរដ្ឋអាមេរិក បានប្រកាសពីផែនការប្រើប្រាស់រូបិយប័ណ្ណជាតិរៀងៗខ្លួន ជំនួសប្រាក់ដុល្លារអាម៉េរិកនៅក្នុងពាណិជ្ជកម្ម។ កាលពីខែធ្នូ ឆ្នាំ២០២៣ ភាគីទាំងពីរបានសម្រេចនូវកិច្ចព្រមព្រៀងមួយដើម្បីជួញដូរប្រាក់រូប៊លរុស្ស៊ី និងប្រាក់រៀលអ៊ីរ៉ង់។ លើសពីនេះ កិច្ចព្រមព្រៀងនេះអនុញ្ញាតឱ្យធនាគារ និងម្ចាស់អាជីវកម្មប្រើប្រាស់ប្រព័ន្ធផ្ញើប្រាក់ដែលមិនមែនជា SWIFT និងកម្មវីធីធនាគារ ឬ ហិរញ្ញវត្ថុជំនួសផ្សេងទៀត។ លោក Farzin បានលើកឡើងដែរថា ទីក្រុងម៉ូស្គូ និងទីក្រុងតេអេរ៉ង់បានបញ្ចប់ជាផ្លូវការនូវការផ្គូរផ្គងប្រព័ន្ធទូទាត់ជាតិរបស់ពួកគេ ដែលនឹងអនុញ្ញាតឱ្យពលរដ្ឋមកពីប្រទេសទាំងពីរប្រើប្រាស់ប័ណ្ណឥណពន្ធក្នុងស្រុករបស់ពួកគេសម្រាប់ការទិញពេលកំពុងធ្វើដំណើរនៅក្នុងប្រទេសអ៊ីរ៉ង់ ឬរុស្ស៊ី។ បន្ថែមពីនេះ ទីក្រុងតេអេរ៉ង់អាចប្រើប្រាស់ប្រព័ន្ធទូទាត់ប្រាក់ Mir របស់រុស្ស៊ីសម្រាប់ការទូទាត់ជាមួយដៃគូអន្តរជាតិផ្សេងទៀតផងដែរ។
ស្របពេលដែលប្រទេសទាំងពីរស្ថិតនៅក្រោមទណ្ឌកម្មលោកខាងលិច ទីក្រុងម៉ូស្គូ និងក្រុងតេអេរ៉ង់បានពង្រឹងទំនាក់ទំនងដោយជំរុញកិច្ចសហប្រតិបត្តិការពាណិជ្ជកម្ម និងហិរញ្ញវត្ថុរវាងពួកគេទាំងពីរ។ កាលពីខែតុលា វិមានក្រឹមឡាំងបង្ហាញថា ទំហំពាណិជ្ជកម្មទ្វេភាគីរវាងរុស្ស៊ី-អ៊ីរ៉ង់បានកើនឡើង ១២,៤ ភាគរយក្នុងរយៈពេល៨ខែដំបូងនៃឆ្នាំនេះ។ ទន្ទឹមនឹងនេះ បណ្តាសាធារណរដ្ឋឥស្លាមកំពុងខិតខំប្រឹងប្រែងក្នុងការជំរុញពាណិជ្ជកម្ម និងកិច្ចសហប្រតិបត្តិការក្នុងប្លុកសេដ្ឋកិច្ច BRICS ផងដែរ។ កាលពីខែមករា អ៊ីរ៉ង់ អេហ្ស៊ីប អេត្យូពី និងអារ៉ាប់រួម បានក្លាយជាសមាជិកផ្លូវការរបស់ BRICS៕
Account
Security
Favourite Content