បរទេស ៖ ស្ថានភាពពង្រឹងសន្តិសុខថ្នាក់ដឹកនាំកំពូលនៅក្នុងប្រទេសហ្វីលីពីនបានអនុវត្តទៅដល់កម្រិតខ្ពស់បំផុតក្រោយពេលដែលមានការកើនឡើងកំដៅដាក់គ្នារវាងថ្នាក់ដឹកនាំកំពូលរបស់ប្រទេសដែលជាក្រុមគ្រួសារអ្នកនយោបាយដ៏មានឥទ្ធិពលចំនួន២ គឺត្រកូល Marcos និងត្រកូល Duterte។

ជម្លោះជាពាក្យសំដីឌឺដងដាក់គ្នារវាងត្រកូល Marcos គឺលោកប្រធានាធិបតីហ្វីលីពីន Ferdinand Marcos Jr. ជាមួយនឹងត្រកូល Durtete ដែលមានលោកស្រី Sara Duterte ត្រូវជាកូនស្រីលោក Rodrigo Duterte អតីតប្រធានាធិបតី ហ្វីលីពីន បានឈានទៅដល់ការប្រើប្រាស់សំដីគំរាមធ្វើឃាតគ្នាទៅវិញទៅមកនៅក្នុងរយៈពេលប៉ុន្មានថ្ងៃចុងក្រោយនេះ។

យោងតាមការចេញផ្សាយរបស់កាសែតរ៉យទ័របានឱ្យដឹងថា លោកស្រី Sara Duterte ដែលបច្ចុប្បន្នមានតួនាទីជាអនុប្រធានាធិបតីនោះបានថ្លែងដោយកំហឹងថា លោកស្រីនឹងប្រើមនុស្សឲ្យធ្វើឃាតលោក Ferdinand Marcos Jr. ក្នុងករណីប្រសិនបើលោកស្រីផ្ទាល់នឹងត្រូវទទួលរងនូវការធ្វើឃាតណាមួយ។

ក្រោយសង្គ្រាមដោយពាក្យសំដីបានផ្ទុះឡើងរួចមក វាបានបណ្តាលឲ្យមានការរឹតបន្តឹងកាន់តែខ្លាំងពីសំណាក់ទីភ្នាក់ងាររដ្ឋទទួលបន្ទុកកិច្ចការងារសន្តិសុខជាតិនៅទូទាំងប្រទេស ជាពិសេសចំពោះមេដឹកនាំកំពូលទាំង២តែម្តង។

ថ្លែងទៅកាន់វេទិកាសារព័ត៌មានប្រចាំថ្ងៃមួយ លោកស្រី Sara បានបញ្ជាក់ថា លោកស្រីបានរៀបចំផែនការជាមួយនឹងឃាតករម្នាក់រួចទៅហើយថា ត្រូវតែសម្លាប់លោក Marcos និងភរិយារបស់គេឲ្យបានប្រសិនបើលោកស្រីត្រូវបានគេធ្វើឃាតជាមុន ហើយអះអាងពាក្យទាំងនេះគឺមិនមែនជាពាក្យសំដីលេងសើចនោះទេ។

ការលើកឡើងរបស់លោកស្រីគឺជាការឆ្លើយតបទៅនឹងអ្នកគាំទ្រលើបណ្តាញសង្គមម្នាក់ដែលបានស្នើសុំឲ្យនាងបន្តថែរក្សាសុវត្ថិភាពឲ្យបានខ្ពស់ ពីព្រោះថានាងស្ថិតនៅក្នុងគោលដៅរបស់សត្រូវរួចទៅហើយ។លោកស្រី Sara មុននេះបន្តិចក៏បានអះអាងដែរថា បានសម្ងំនៅក្នុងអគារសភាជាន់ទាបពេញមួយយប់ជាមួយនឹងក្រុមមន្ត្រីជាន់ខ្ពស់របស់នាង ប៉ុន្តែមិនបានបញ្ជាក់អំពីករណីគំរាមកំហែងណាមួយទេមកលើនាងឡើយនៅយប់នោះ។

ចំពោះបញ្ហានេះ មេបញ្ជាការសន្តិសុខសម្រាប់ប្រធានាធិបតីបាននិយាយថា អង្គភាពបានបង្កើន និងពង្រឹងប្រព័ន្ធសន្តិសុខរួចហើយ ដោយពួកគេកំពុងធ្វើការសម្របសម្រួលយ៉ាងជិតស្និទ្ធជាមួយភ្នាក់ងារអនុវត្តច្បាប់ ដើម្បីស្វែងរក ទប់ស្កាត់ និងការពារ ប្រឆាំងនឹងការគំរាមកំហែងណាមួយចំពោះប្រធានាធិបតី និងគ្រួសារ ។

ដោយឡែក មេប៉ូលីសហ្វីលីពីន លោក Rommel Francisco Marbil បាននិយាយថា គាត់បានបញ្ជាឱ្យមានការស៊ើបអង្កេតជាបន្ទាន់ដោយបន្ថែមថានឹងអាចមានការគំរាមកំហែងដោយផ្ទាល់ ឬដោយប្រយោលចំពោះជីវិតរបស់ប្រធានាធិបតី ហើយត្រូវតែដោះស្រាយជាមួយនឹងការងារអាទិភាពកម្រិតខ្ពស់បំផុត។

គួរឲ្យដឹងដែរថា ជាទូទៅនៅប្រទេសហ្វីលីពីន អនុប្រធានាធិបតីត្រូវបានជ្រើសរើសដាច់ដោយឡែកពីប្រធានាធិបតី ហើយមិនមានភារកិច្ចផ្លូវការទេ ប៉ុន្តែ អនុប្រធាន​ជាច្រើន​បាន​បន្ត​សកម្មភាព​អភិវឌ្ឍន៍​សង្គម ខណៈ​ខ្លះ​ទៀតត្រូវបាន​តែងតាំង​ឱ្យ​កាន់តំណែង​ក្នុង​គណៈរដ្ឋមន្ត្រី៕