សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអំពាវនាវដល់បណ្តាផលិតករ ឧស្សាហករ និងសិប្បករកម្ពុជាក្នុងស្រុកទាំងអស់ ត្រូវចាប់យកស្តង់ដារគុណភាព និងសុវត្ថិភាពជាចម្បង ដើម្បីអាចជំរុញឱ្យមានកំណើនខ្សែច្រវាក់ផលិតកម្ម ដើម្បីកែច្នៃបន្ថែម ខណៈដែលពួកគេកំពុងខិតខំបង្កើនសមត្ថភាពផលិត ដើម្បីផ្គត់ផ្គង់តម្រូវការទីផ្សារ។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា ពេលនេះគឺជាឱកាសមាសដែលក្រសួងសុំលើកទឹកចិត្តដល់បណ្តាផលិតករ ឧស្សាហករ និងសិប្បករទាំងអស់ ចាប់យកឱ្យបានជាប់ស្តង់ដារគុណភាព និងសុវត្ថិភាពជាចម្បង ដើម្បីធ្វើឱ្យទំនិញខ្មែរ និងសម្ភារៈប្រើប្រាស់ ដែលបានផលិតអាចឈរជើងបានយូរ ដោយហេតុថា បច្ចុប្បន្ន កម្លាំងសាមគ្គីភាព និងការគាំទ្រផលិតផលក្នុងស្រុក បាន និងកំពុងជំរុញឱ្យមានកំណើនទាំងការប្រើប្រាស់ ទាំងការពង្រីកខ្សែច្រវាក់ផលិតកម្ម កែច្នៃបន្ថែម និងការចាប់ផ្តើមនូវអាជីវកម្មថ្មី ក៏ដូចជាការផលិត ដើម្បីជំរុញដល់ការផ្គត់ផ្គង់ក្នុងស្រុកដែលកំពុងមានតម្រូវការខ្ពស់។
ឯកឧត្តម រដ្ឋមន្ត្រី បានគូសបញ្ជាក់ថា ៖
«ការចាប់យកបានជាប់នូវកម្រិតស្ដង់ដារ ជាពិសេសទំនុកចិត្តរបស់អ្នកប្រើប្រាស់នៅក្នុងខណៈពេលនេះគឺជាឱកាសដែលអាចពង្រីកខ្សែផលិតកម្មពីតូចទៅធំ ដែលការងារទាំងអស់នេះ ទាមទារនូវគុណភាព សុវត្ថិភាព និងស្តងដារ ដើម្បីឱ្យទំនិញ សម្ភារៈប្រើប្រាស់របស់យើងទាំងអស់អាចឈរជើងនៅក្នុងទីផ្សារ។ នៅពេលដែលយើងធ្វើតិចៗ នៅក្នុងខ្នាតគ្រួសារ ខ្នាតលក់ដូរធម្មតា នោះមិនមានបញ្ហាទេ ប៉ុន្តែនៅពេលដែលយើងចាប់ផ្ដើមពង្រីកខ្សែច្រវាក់ផលិតកម្មក្នុងទំហំធំ ការទុកដាក់លទ្ធផលប្រកបដោយគុណភាព និងប្រសិទ្ធភាពខ្ពស់ វាគឺជាការបញ្ជាក់ពីសមត្ថភាពមានការប្រែប្រួលកាន់តែប្រសើរជាងមុន»។
ឯកឧត្តម ហែម វណ្ណឌី ក៏បានគូសបញ្ជាក់ថា ក្រសួងបានរៀបចំរចនាសម្ព័ន្ធគុណភាពជាច្រើន ដើម្បីគាំទ្រនូវការងារនេះ ដោយក្នុងនោះមានទាំងមន្ទីរពិសោធន៍ម្ហូបអាហារ គ្រឿងភេសជ្ជៈ និងគ្រឿងប្រើប្រាស់មួយចំនួនទៀត។ បន្ថែមពីនេះ ក្រសួងនៅមានវិទ្យាស្ថាន វិទ្យាសាស្ត្របច្ចេកវិទ្យា នវានុវត្តន៍ ដែលក្នុងនោះមជ្ឈមណ្ឌលបច្ចេកវិទ្យាម្ហូបអាហារ ដែលអាចជួយបងប្អូននៅក្នុងការអភិវឌ្ឍកែច្នៃ ម្ហូបអាហារ និងធ្វើពិសោធន៍ផ្សេងៗបានច្រើន ។ ចំណែក វិទ្យាស្ថានស្តង់ដារជាតិ ដែលអាចជួយចុះបញ្ជីផលិតផលដើម្បីធានាបាននូវស្តង់ដារ សុវត្ថិភាពក្នុងការជឿជាក់ពីអតិថិជន ។ ក្រៅពីនេះក៏មានមជ្ឈមណ្ឌលវិទ្យាសាស្ត្រជាតិ ជាអ្នកជួយបងប្អូននៅក្នុងការធ្វើប្រជាសកម្ម រង្វាស់រង្វាល់ ដើម្បីឱ្យខ្នាតក្រឹត្យក្រមធានាបាននូវការទុកចិត្ត។
ឯកឧត្តម ហែម វណ្ណឌីថា បានមានប្រសាសន៍ថាបញញជាក់ដែរថា ៖ រចនាសម្ព័ន្ធគុណភាពជាតិទាំងអស់នេះនឹងជួយបងប្អូនដែលជាផលិតករ សហគ្រិនករ ក៏ដូចជាម្ចាស់សហគ្រាសផ្សេងៗអាចសម្រេចបាននូវខ្សែច្រវាក់ផលិតកម្ម និងជាផលិតផលមួយ ដែលធានាបាននូវគុណភាព សុវត្ថិភាពជូនអ្នកប្រើប្រាស់៕
Account
Security
Favourite Content