ភ្នំពេញ ៖ ចាប់តាំងពីរាជរដ្ឋាភិបាលកម្ពុជា បានដាក់ចេញនូវកម្មវិធី​ពិសេស​ជំរុញការ​វិនិយោគ​នៅខេត្តភូមិភាគឦសាន​ រហូតមកដល់ពេលបច្ចុប្បន្ននេះបានមើលឃើញថា មានវិនិយោគិនជាច្រើនបានបង្ហាញពីចំណាប់អារម្មណ៍ក្នុងារបណ្តាក់ទុនវិនិយោគជាបន្តបន្ទាប់ ដែលសរុបជាដើមទុនមានទំហំរាប់ពាន់លានដុល្លារ។ ជាក់ស្ដែង គិតមកត្រឹមដំណាច់ខែសីហាកន្លងទៅនេះ មានគម្រោង​វិនិយោគចំនួន១៤ ជាមួយនឹងទំហំដើមទុន​សរុបប្រមាណ ​១,៣ពាន់​លានដុល្លារអាម៉េរិក បាន​ស្នើសុំគោលការណ៍​លើកទឹកចិត្ត​ពីកម្មវិធីពិសេស​របស់រាជរដ្ឋាភិបាល ដើម្បីអនុវត្តគម្រោង​វិនិយោគរបស់ខ្លួននៅពេលឆាប់ៗខាងមុខ ។

យោងតាមរបាយការណ៍របស់ក្រុមការងារ​លេខាធិការ​ដ្ឋាន​នៃកម្មវិធីពិសេស​ជំរុញការ​វិនិយោគ​ភូមិភាគឦសានចេញផ្សាយនៅថ្ងៃទី៣០ ខែសីហា ឆ្នាំ២០២៥ ​បានឱ្យដឹងថា គិតត្រឹម​ចុងខែសីហា ឆ្នាំ២០២៥​ ក្រុម​ការ​ងារ​ជំរុញការវិនិយោគក្នុងភូមិភាគឦសាន បានទទួលការស្នើសុំលើកទឹកចិត្តលើគម្រោងវិនិយោគចំនួន ១៤ ទៅលើវិស័យកសិកម្ម, កសិ-ឧស្សាហកម្ម, ទេសចរណ៍ និងគម្រោងហេដ្ឋារចនាសម្ព័ន្ធសាង​សង់កំពង់ផែពហុបំណង ដែលមានទុនវិនិយោគសរុបប្រមាណ ១,៣ពាន់​លានដុល្លារអាម៉េរិក ។

នៅក្នុង​កិច្ចប្រជុំផ្ទៃក្នុង​របស់លេខាធិការដ្ឋាន​ក្រុមការងារជំរុញការ​វិនិយោគ​ក្នុងភូមិភាគឦសានកាលពីចុងសប្ដាហ៍មុននេះ ឯកឧត្តម​បណ្ឌិត​សភាចារ្យ​ ហ៊ាន សាហ៊ីប ប្រធានក្រុមការងារ បានដឹកនាំកិច្ច​ប្រ​ជុំ​ ដើម្បី​ពិនិត្យ​វឌ្ឍនភាព​នៃការអនុវត្ត​កម្មវិធីពិសេស និងកិច្ចពិភាក្សា​លើ​យន្តការ​សម្របសម្រួល​ការ​វិនិយោគ​ក្នុងភូមិភាគឦសាន ដើម្បីឈានទៅរៀបចំ​ និងអនុវត្តផែនការ​សកម្មភាពកម្មវិធីពិ​សេសឱ្យ​កាន់តែ មានប្រសិទ្ធភាព និងតម្លាភាព សំដៅចូលរួមចំណែក​ក្នុងការ​កសាង​មូលដ្ឋាន​សង្គម-សេដ្ឋកិច្ច និងជាពិសេស​ លើក​កម្ពស់​ជីវភាពពលរដ្ឋ​ក្នុងតំបន់​ឱ្យ​កាន់តែ​ប្រសើរ ។

ឯកឧត្តមបណ្ឌិត​សភាចារ្យ​​ បានណែ និងកំណត់ទិសដៅក្រុមការងារ​លេខាធិការ​ដ្ឋានកម្មវិធីពិសេសជំរុញការ​វិនិយោគនៅភូមិ​ភាគឦសាន​ឱ្យ​ខិត​ខំ​ជំរុញ​ការ​អនុវត្ត​កម្មវិធីពិសេស​នេះឱ្យ​កាន់តែសស្រាក់​សស្រាំ​បន្ថែមទៀត ដោយមិនត្រូវ​ផ្ដោត​សំខាន់​លើ​កិច្ច​ការងារ​សម្របសម្រួល​ និងលើក​ទឹកចិត្ត​គម្រោង​វិនិយោគ​ថ្មីប៉ុណ្ណោះទេ ប៉ុន្តែត្រូវ​យកចិត្តទុកដាក់​ខ្ពស់លើការថែទាំ​គម្រោង​វិនិ​យោគ​​របស់​រោងចក្រ​ សហគ្រាស​ដែលមានស្រាប់​ក្នុង​តំបន់ តាមរយៈការ​ចុះជួប​ផ្ទាល់ និងទទួលស្គាល់​នូវ​រាល់កង្វល់​ និងបញ្ហា​ប្រឈមនានា ពាក់ព័ន្ធនឹង​ការវិនិយោគ ដើម្បីចូលរួម​ដោះស្រាយ​បញ្ហា​ប្រឈម​របស់​រោងចក្រ ​សហគ្រាស ​ក្នុងតំបន់ ក្នុងគោលដៅ​លើកកម្ពស់​ផលិតកម្ម ពិសេស​ផលិតផលជំនួសសម្រាប់​បំពេញតម្រូវការ​ទីផ្សារ​ និងឈានទៅនាំចេញ ស្របតាមបរិការណ៍ដែលកម្ពុជា​កំពុង​មានជម្លោះ​ជាមួយ​ប្រទេសថៃ និងការ​ដែល​ប្រជាពលរដ្ឋកម្ពុជា មានទំនោរ​មិនប្រើប្រាស់ផលិតផលថៃ ។

ឯកឧត្តម ញ៉ែម សំអឿន អភិបាលខេត្តរតនគិរី បានបញ្ជាក់​ថា កម្មវិធីពិសេសជំរុញការ​វិនិយោគ​ក្នុង​ខេត្តទាំង​បួននៅភូមិភាគ​ឦសាន​ដោយក្នុងនោះក៏មាន​ខេត្តរតនគិរី​ផងដែរ បានផ្ដោតលើ​វិស័យសំខាន់ៗ​ដូចជា​ កសិកម្ម កសិ-ឧស្សាហកម្ម​ និងវិស័យទេសចរណ៍ ។ ទន្ទឹមនេះដែរ រាជរដ្ឋាភិបាលក៏បានដាក់ចេញនូវវិធានការគាំទ្រ និងជំរុញការវិនិយោគ ៣ ប្រភេទ រួមមាន៖ ១. វិធានការផ្នែកពន្ធដារ និងពន្ធគយ, ២. ការផ្តល់ហិរញ្ញប្បទានក្រោមអត្រាការប្រាក់សមរម្យ និង ៣. ការជួយកាត់បន្ថយថ្លៃដើមផលិតកម្ម, ការសម្រួលនីតិវិធី និងការគាំទ្រសកម្មភាពវិនិយោគឯកជន ។

គួររំលឹកថា កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាននៃព្រះរាជាណាចក្រកម្ពុជា ឆ្នាំ២០២៥-២០២៨ ត្រូវបានប្រកាសដាក់ឱ្យអនុវត្តជាផ្លូវការ ក្រោមអធិបតីភាពដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាចក្រកម្ពុជា នាថ្ងៃទី ៩ ខែមេសា ឆ្នាំ២០២៥ ។ ខេត្តទាំង​បួន​នេះតំបន់ភូមិភាគឦសាន​នេះរួមមាន​ ខេត្ត​ក្រចេះ ស្ទឹងត្រែង មណ្ឌល​គិរី និងរតនគិរី ដែលខេត្តទាំង​នេះ មានសក្ដានុពលខ្ពស់លើវិស័យកសិកម្ម កសិ-ទេសចរណ៍ វិស័យទេសចរណ៍ និង​ថាមពល​ជាដើម ។

ជាកត់សម្គាល់ តាមរយៈកម្មវិធីពិសេសជំរុញការ​វិនិយោគ​នៅតាមបណ្ដាខេត្ត​សក្ដានុពល បាន​ និងកំពុង​ហុច​ផល​ដល់​បណ្ដាខេត្តទាំង​នោះ ជាក់ស្ដែង​កម្មវិធីពិសេស​ជំរុញ​ការ​វិនិយោគ​ក្នុង​ខេត្តព្រះសីហនុ បានទាក់ទាញ​ចំណាប់អារម្មណ៍វិនិយោគិន​ជាច្រើន​ចូលបណ្ដាក់ទុនវិនិយោគ​​ ដែលជាសកម្មភាពមួយដ៏សំខាន់ក្នុងការគាស់នូវភាពស្ងប់ស្ងាត់ក្នុងតំបន់ឱ្យមានភាពសកម្ម និងមមាញឹកឡើងវិញ ទាំងពាណិជ្ជកម្ម ទាំងការវិនិយោគ៕