បរទេស៖ យោងតាមប្រភពព័ត៌មានពី CNA បានរាយការណ៍ថា ទំនាក់ទំនងរវាងចិន និង​ឥណ្ឌា កំពុងមានភាពប្រសើរឡើងវិញបន្ទាប់ពីមេដឹកនាំនៃប្រទេសទាំងពីរបានជួបគ្នាកាលពីថ្ងៃអាទិត្យ។

កាលពីថ្ងៃអាទិត្យ ប្រធានាធិបតីចិន លោក Xi Jinping និងនាយករដ្ឋមន្ត្រីឥណ្ឌា Narendra Modi បានជួបប្រជុំក្រៅផ្លូវការនៃកិច្ចប្រជុំរបស់អង្គការសហប្រតិបត្តិការសៀងហៃ (SCO) នៅទីក្រុងធានជីង។ ការ​ជួបប្រជុំក្រៅផ្លូវការនេះ​មាន​រយៈពេល​ជិត​មួយ​ម៉ោង។ ប្រធានាធិបតីចិន Xi បាននិយាយប្រាប់លោក Modi ថា ប្រទេសដែលមានប្រជាជនច្រើនជាងគេលើពិភពលោកទាំងពីរនេះត្រូវតែធ្វើជាមិត្តនឹងគ្នា និងជាអ្នកជិតខាងដ៏ល្អ ដែលដើរតួយ៉ាងសំខាន់នៅក្នុងសកលលោកខាងត្បូង។

លើសពីនេះ លោក Xi បាននិយាយនៅក្នុងការបើកសុន្ទរកថា ៖

«ប្រទេសចិន និងឥណ្ឌា គឺជាប្រទេសពីរដែលមានអរិយធម៌ចាស់បំផុត ហើយយើងក៏ជាប្រទេសដែលមានប្រជាជនច្រើនជាងគេបំផុតរបស់ពិភពលោក និងជាផ្នែកមួយនៃសកលលោកខាងត្បូង … វាមានសារៈសំខាន់ណាស់ក្នុងការធ្វើជាមិត្ត ធ្វើជាអ្នកជិតខាងដ៏ល្អ ប្រៀបដូចជា នាគ និង ដំរី»។

ដោយឡែក លោកនាយករដ្ឋមន្ត្រីឥណ្ឌា Narendra Modi ក៏បានលើកឡើងដែរ​ថា​ ​៖

«យើង​ប្ដេជ្ញា​ចិត្ត​ក្នុង​ការជំរុញ​ទំនាក់ទំនង​របស់​យើង​ទៅ​មុខ​ដោយ​ឈរ​លើ​មូលដ្ឋាន​នៃ​ការ​ជឿ​ទុក​ចិត្ត​ ការ​គោរព​គ្នា​ទៅ​វិញ​ទៅ​មក​។ ​បន្ទាប់​ពី​បញ្ហា​ព្រំដែនធូរស្រាល បរិយាកាស​សន្តិភាព និង​ស្ថិរភាព​ត្រូវ​បាន​បង្កើត​ឡើង»។

គួរឲ្យបញ្ជាក់ដែរថា នេះគឺជាដំណើរទស្សនកិច្ចរបស់លោកនាយករដ្ឋមន្ត្រីឥណ្ឌា Narendra Modi ទៅកាន់ប្រទេសចិនជាលើកដំបូងក្នុងរយៈពេល ៧ ឆ្នាំចុងក្រោយនេះ។ យ៉ាងណាមិញ គេមិនរំពឹងទេថា កិច្ចពិភាក្សារវាងលោក Xi និង Modi អាចដោះស្រាយវិវាទធំៗបានច្រើននោះទេ ប៉ុន្តែវត្តមានរបស់នាយករដ្ឋមន្ត្រីឥណ្ឌាមកកាន់ទីប្រទេសចិន គឺជាសញ្ញានៃការរៀបចំឡើងវិញជាយុទ្ធសាស្រ្តដើម្បីដោះស្រាយភាពងាយរងគ្រោះភូមិសាស្ត្រនយោបាយ។ លើសពីនេះ លោក Modi នឹងមិនចូលរួមជាមួយលោក Xi , ជាមួយប្រធានាធិបតីរុស្ស៊ី លោក Vladimir Putin ក៏ដូចជាមេដឹកនាំកូរ៉េខាងជើង Kim Jong Un សម្រាប់ព្យុហយាត្រាយោធារបស់ចិននៅថ្ងៃពុធខាងមុខនេះទេ។

សូមបញ្ជាក់ថា ចំណងមិត្តភាពរវាងប្រទេសទាំងពីរកាន់តែតានតឹងខ្លាំងឡើង បន្ទាប់ពីការប៉ះទង្គិចគ្នានៅតាមព្រំដែនក្នុងឆ្នាំ២០២០ ប៉ុន្តែទីក្រុងប៉េកាំង និងទីក្រុងញូវដែលីបានព្យាយាមជួសជុលទំនាក់ទំនងនេះឡើងវិញកាលពីឆ្នាំមុន។ ក្នុងឆ្នាំ២០២៥ នេះ​ សង្គ្រាមពន្ធគយរបស់ប្រធានាធិបតីអាម៉េរិក Donald Trump គឺជាឱកាសសម្រាប់ប្រទេសទាំងពីរផ្សះផ្សារទំនាក់ទំនងឡើងវិញ ពិសេសទាំងចិន និង ឥណ្ឌាសុទ្ធតែត្រូវប្រឈមមុខនឹងពន្ធខ្ពស់។ ទីក្រុងវ៉ាស៊ីនតោនបានចំណាយពេលជាច្រើនឆ្នាំក្នុងការកាត់ក្តីឈរខាងទីក្រុងញូវដែលីប្រឆាំងនឹងទីក្រុងប៉េកាំង ប៉ុន្តែកិច្ចខិតខំប្រឹងប្រែងទាំងនោះត្រូវបានបំផ្លាញនៅឆ្នាំនេះ ដោយសារអាម៉េរិកសម្រេចចិត្តដាក់ពន្ធ ៥០% លើការនាំចូលពីឥណ្ឌា។ ការដំឡើងពន្ធ​នេះ​ គឺជាការ​ដាក់​ទណ្ឌកម្ម​ឥណ្ឌា​សម្រាប់​ការ​ទិញ​ប្រេង​ពី​រុស្ស៊ី ខណៈដែលទី​ក្រុង​ដេលីជារឿយៗអះអាងថា ការ​ទិញ​ប្រេងនេះគឺដើម្បី​ការពារ​ផលប្រយោជន៍​ជាតិ​ និង​ឈាន​ទៅ​រក​ដៃគូ​ពាណិជ្ជកម្ម​ផ្សេង​ទៀត។

ជាក់ស្តែង មុនពេលដែលលោក Modi ធ្វើដំណើរមកកាន់ប្រទេសចិន លោកបានជួបគ្នាជាមួយនឹងនាយករដ្ឋមន្ត្រីជប៉ុន Shigeru Ishiba ដើម្បីចុះហត្ថលេខាលើគំនិតផ្តួចផ្តើមសន្តិសុខសេដ្ឋកិច្ចសម្រាប់ប្រទេសទាំងពីរ និង ធ្វើការរួមគ្នាលើឧបករណ៍អេឡិចត្រូនិក បញ្ញាសិប្បនិម្មិត សារធាតុរ៉ែសំខាន់ៗ ថាមពលស្អាត និងឱសថជាដើម។ មិនត្រឹមតែប៉ុណ្ណោះ ទីក្រុងតូក្យូក៏បានសន្យាថានឹងផ្តល់ប្រាក់ចំនួន ៦៧ ពាន់លានដុល្លារសម្រាប់វិនិយោគនៅក្នុងប្រទេសឥណ្ឌាក្នុងរយៈពេលមួយទសវត្សរ៍ខាងមុខ និងផ្ទេរបច្ចេកវិទ្យារថភ្លើងល្បឿនលឿន Shinkansen “E10 series” ៕