សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី The Guardian បានរាយការណ៍ថា ធនាគារកណ្តាលអាម៉េរិក (Fed) បន្តរក្សាអត្រាការប្រាក់មិនផ្លាស់ប្តូរ ជាមួយនឹងការព្រមានអំពីការកើនឡើងនូវហានិភ័យនៅក្នុងសេដ្ឋកិច្ចអាម៉េរិក ចំពេលមានភាពចលាចលដោយសារគោលនយោបាយពាណិជ្ជកម្មរបស់ Donald Trump។
ប្រធានធនាគារកណ្តាលអាម៉េរិក លោក Jerome Powell បានព្រមានថា ពន្ធគយរបស់ប្រធានាធិបតីកំពុងជំរុញតម្លៃឡើងថ្លៃ, ធ្លាក់ចុះនៃកំណើន, និងបង្កើនអត្រានៃភាពអត់ការងារធ្វើ។ ជាមួយគ្នានេះស្របពេលដែល Trump ប្រកាសពីការយកពន្ធគយលើទំនិញនាំចូលពីប្រទេសជាច្រើននោះ លោក Powell បានព្រមានពីការបង្កើនតម្លៃ និងកំណើនយឺត ទោះបីជារដ្ឋបាលបានសន្យាក្នុងការធ្វើឱ្យសេដ្ឋកិច្ចសហរដ្ឋអាមេរិករស់ឡើងវិញ និងកាត់បន្ថយថ្លៃដើមរស់នៅសម្រាប់ពលរដ្ឋអាម៉េរិករាប់លាននាក់ក៏ដោយ។ មិនត្រឹមតែប៉ុណ្ណោះ ផលិតផលក្នុងស្រុកសរុប (GDP) របស់សហរដ្ឋអាមេរិកបានធ្លាក់ចុះជាលើកដំបូងក្នុងរយៈពេល ៣ ឆ្នាំ ដែលកាន់តែបង្កើនការភ័យខ្លាចនៃការធ្លាក់ចុះនៃមហាអំណាចសេដ្ឋកិច្ចមួយនេះ។ បន្ថែមពីនេះ អ្នកបង្កើតគោលនយោបាយរបស់ Fed បានព្រមានថា ហានិភ័យនៃអត្រាអត់ការងារធ្វើខ្ពស់ និងអតិផរណាខ្ពស់កំពុងកើនឡើថា ដែលធ្វើឲ្យភាពមិនច្បាស់លាស់អំពីទស្សនវិស័យសេដ្ឋកិច្ចកាន់តែកើនឡើងបន្ថែមទៀត។
ក្នុងប៉ុន្មានខែថ្មីៗនេះ ប្រធានាធិបតីអាម៉េរិក Donald Trump បានទាមទារឲ្យធនាគារកណ្តាលកាត់បន្ថយអត្រាការប្រាក់ម្តងហើយម្តងទៀត ជាមួយនឹងការគំរាមបណ្តេញលោក Powell ថែមទៀតផង។ យ៉ាងណាមិញ ធនាគារកណ្តាលអាម៉េរិកមិនទាន់បានកាត់បន្ថយអត្រាការប្រាក់អស់រយៈពេលជាច្រើនខែមកហើយ ដោយលើកឡើងពីភាពមិនច្បាស់លាស់សេដ្ឋកិច្ចដែលកំពុងកើនឡើង។ កាលពីខែធ្នូ គឺជាពេលវេលាដែលធនាគារកណ្តាលកាត់បន្ថយអត្រាចុងក្រោយបំផុតដែលមានអត្រាចន្លោះពី ៤,២៥% ទៅ ៤,៥%។
បន្ទាប់ពីកិច្ចប្រជុំរបស់ធនាគារកណ្តាល លោក Powell លើកឡើងថា លោកមិនអាចផ្តល់ពេលវេលាច្បាស់លាស់ណាមួយសម្រាប់ការកាត់បន្ថយអត្រាការប្រាក់បាននោះទេ ដោយនឹងត្រូវតាមដានមើលថាតើការផ្លាស់ប្តូរនេះមានលក្ខណៈយ៉ាងណា ប៉ុន្តែក៏មានករណីមួយចំនួនដែលសមស្របសម្រាប់ធនាគារកណ្តាលក្នុងការកាត់បន្ថយអត្រាការប្រាក់នៅឆ្នាំនេះផងដែរ។ ទន្ទឹមនឹងនេះ លោក Powell បន្ថែមថា តម្រូវការរបស់ Trump សម្រាប់ការកាត់បន្ថយអត្រាការប្រាក់មិនអាចប៉ះពាល់ដល់ការសម្រេចចិត្តចុងក្រោយរបស់ធនាគារកណ្តាលនោះទេ៕
Account
Security
Favourite Content