សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឆ្នាំថ្មី ឆ្នាំសកល ២០២៤ កាន់តែខិតជិតមកដល់ហើយ។ សម្រាប់ឆ្នាំថ្មីនេះ មនុស្សជាច្រើនតែងតែចង់បានការផ្លាស់ប្តូរទៅរកភាពវិជ្ជមានទៅតាមក្តីប្រាថ្នារបស់ខ្លួន ពិសេសកែប្រែពីទម្លាប់អាក្រក់មួយចំនួននៅឆ្នាំចាស់ ទៅជាទម្លាប់ល្អនៅឆ្នាំថ្មីនេះ។ ប៉ុន្តែ បើចង់បានផ្លាស់ប្តូរ លុះត្រាណាតែមនុស្សម្នាក់ៗចាប់ផ្តើមរៀបចំផែនការ និងធ្វើសកម្មភាព ឧទាហរណ៍ដូចជាការចាប់ផ្តើមសន្សំសម្រាប់ឆ្នាំថ្មី។
កន្លងមក AMS Economy ធ្លាប់បានលើកឡើងមកហើយពីសារៈសំខាន់នៃការសន្សំ។ ការសន្សំអាចជួយឱ្យមនុស្សម្នាក់ៗ ឬក្រុមគ្រួសារនីមួយៗសម្រេចបានក្តីស្រមៃ ដូចជាសន្សំសម្រាប់ការចូលនិវត្តន៍ ការទិញលំនៅដ្ឋាន ការសិក្សារបស់កូនៗ រថយន្តថ្មី និងរបស់របរដែលខ្លួនចង់បានជាដើម។ ខាងក្រោមនេះ គឺជាគន្លឹះមួយចំនួនដែលអ្នកគួរស្វែងយល់ សម្រាប់ការសន្សំ ៖
១. អនុវត្តទៅតាមផែនការហិរញ្ញវត្ថុ ៖ ការអនុវត្តទៅតាមផែនការហិរញ្ញវត្ថុគឺជាគន្លឹះសន្សំប្រាក់ដ៏សំខាន់បំផុតមួយសម្រាប់មូលដ្ឋានគ្រឹះហិរញ្ញវត្ថុដែលមានសុខភាពល្អ។ យើងដឹងហើយថា ការរៀបចំផែនការហិរញ្ញវត្ថុអាចស្តាប់ទៅគួរឱ្យធុញ ឬរឹតត្បិតសម្រាប់ខ្លួនឯង ប៉ុន្តែផែនការហិរញ្ញវត្ថុគឺជាឧបករណ៍មួយជួយឱ្យអ្នកកំណត់បានលើចំណូលចំណាយរបស់អ្នក ហើយថែមទាំងអាចជួយឱ្យអ្នកសន្សំបានទៀងទាត់បន្ទាប់ពីអ្នកកំណត់ចំណូលចំណាយប្រចាំថ្ងៃ ខែ ឆ្នាំ បានច្បាស់លាស់។
២. ចាប់ផ្តើមសន្សំ ៖ សម្រាប់ឆ្នាំថ្មី ការសន្សំហាក់ដូចជាកិច្ចការមួយលំបាក ប៉ុន្តែការសន្សំលុយតែ ២០ ទៅ ៤០ ម៉ឺនរៀលក្នុងមួយខែ ក៏អាចមានផ្តល់អត្ថប្រយោជន៍សម្រាប់អ្នកនាពេលអានាគតផងដែរ។ ចូរពិនិត្យចំណូលរបស់អ្នកដើម្បីមើលថា តើលុយប៉ុន្មានដែលអ្នកអាចបញ្ចូលទៅក្នុងគណនីសន្សំរបស់អ្នកក្នុងមួយខែ។ យើងសូមលើករូបមន្តសន្សំមួយ ដែលអ្នកអាចយកទៅអនុវត្តបាន។ ប្រសិនបើអ្នកមិនប្រាកដថា អ្នកមិនដឹងសន្សំប៉ុន្មាននោះទេ អ្នកជំនាញបានណែនាំឱ្យសន្សំមួយភាគបីនៃប្រាក់ចំណូលរបស់អ្នកប្រសិនបើអ្នកអាចធ្វើបាន។ តាមរយៈការសន្សំប្រាក់មួយភាគបីនៃចំណូលរបស់អ្នកនេះ ឧទាហរណ៍ថា ក្នុងមួយសប្តាហ៍ អ្នករកចំណូលបាន ៣០ ម៉ឺនរៀល នោះអ្នកអាចទុក ១០ ម៉ឺនរៀលសម្រាប់សន្សំ។ បើអ្នកអាចធ្វើបាន នោះអ្នកកំពុងធ្វើឱ្យខ្លួនអ្នកកាន់តែងាយស្រួលក្នុងការរួចផុតពីការលំបាកផ្នែកហិរញ្ញវត្ថុនាពេលអនាគត ដូចជាការបាត់បង់ការងារ និងការចំណាយចាំបាច់មួយចំនួនដែលអ្នកមិនដឹងទុកជាមុន។
៣. បង្កើតកញ្ចប់សន្សំសម្រាប់គ្រាអាសន្នណាមួយ ៖ មធ្យោបាយដ៏ល្អមួយទៀតដើម្បីសន្សំសម្រាប់គ្រាលំបាកផ្នែកហិរញ្ញវត្ថុ នោះគឺត្រូវចាប់ផ្តើមបង្កើតគណនីសន្សំនៅគ្រឹះស្ថានធនាគារ និងហិរញ្ញវត្ថុផ្លូវការ តែត្រូវប្រាកដថា គណនីសន្សំនោះ អ្នកអាចដកលុយបានគ្រប់ពេល ព្រោះថាបញ្ហាផ្នែកហិរញ្ញវត្ថុអាចកើតឡើងគ្រប់ពេលដែលអ្នកមិនអាចមើលឃើញ។
៤. សន្សំប្រាក់នៅគ្រឹះស្ថានធនាគារ និងហិរញ្ញវត្ថុផ្លូវការ ៖ ការសន្សំប្រាក់នៅគ្រឹះស្ថានធនាគារ និងហិរញ្ញវត្ថុផ្លូវការមិនត្រឹមតែអាចជួយឱ្យប្រព័ន្ធហិរញ្ញវត្ថុរបស់លោកអ្នកកាន់រឹងមាំនោះទេ ហើយថែមទាំងជួយឱ្យលោកអ្នកបង្កើតផែនការហិរញ្ញវត្ថុត្រឹមត្រូវ ពិសេសសម្រាប់គ្រួសាររបស់អ្នកនាពេលអនាគត ឬ ប្រើប្រាស់ចាំបាច់ក្នុងនាគ្រាអាសន្ននាមួយផងដែរ។ មួយវិញទៀតគឺអ្នកទទួលបានការប្រាក់ខ្ពស់ទៀតផងនាពេលបច្ចុប្បន្ន។
អ្នកជំនាញផ្នែកហិរញ្ញវត្ថុបានបញ្ជាក់ថា ការសន្សំប្រាក់មិនត្រឹមតែជួយឱ្យមានបង្កើតប្រព័ន្ធហិរញ្ញវត្ថុរបស់បុគ្គលម្នាក់ៗឱ្យកាន់រឹងមាំនោះទេ ហើយលើសពីនេះ ការសន្សំនៅគ្រឹះស្ថានធនាគារ និងហិរញ្ញវត្ថុផ្លូវការនឹងរួមចំណែកជួយដល់ការអភិវឌ្ឍសង្គមសេដ្ឋកិច្ចផងដែរ៕
Account
Security
Favourite Content