បរទេស ៖ នៅក្នុងជំនួបកំពូលមួយជាមួយនឹងប្រទេសបារាំងដែលបានប្រព្រឹត្តទៅនៅក្នុងទីក្រុងប៉េកាំងកាលពីសប្តាហ៍មុន មន្ត្រីជាន់ខ្ពស់របស់ចិន និងជារដ្ឋមន្ត្រីការបរទេស លោក Wang Yi បានធ្វើសេចក្តីថ្លែងការណ៍មួយចំពោះបញ្ហាជម្លោះពាណិជ្ជកម្មរវាងរដ្ឋាភិបាលទីក្រុងប៉េកាំង និងតំបន់សហគមអឺរ៉ុប។

លោក Wang Yi បានលើកឡើងពីលទ្ធផលដែលអាចកើតមានចំពោះជម្លោះដែលនៅកំពុងបន្តនេះដោយការព្រមានថា នឹងមិនមានអ្នកណាទទួលបានជ័យជំនះឡើយ ពោលគឺភាគីទាំងពីរនឹងធ្លាក់ចុះទៅក្នុងស្ថានភាពបរាជ័យដូចគ្នា (Lose-Lose) ប៉ុន្តែលោកបានអំពាវនាវឲ្យភាគីទាំងសងខាងបន្តកិច្ចពិភាក្សគ្នា និងបង្កើនកិច្ចសហប្រតិបត្តិការជិតស្និទ្ធរួមគ្នាឡើងវិញ។

ថ្លែងនៅក្នុងកិច្ចជំនួបពិភាក្សាជាយុទ្ធសាស្ត្ររវាងប្រទេសចិន និងប្រទេសបារាំងលើកទី២៦នៅទីក្រុងប៉េកាំង កាលពីថ្ងៃសៅសប្ដាហ៍កន្លងទៅ លោក Wang Yi បានបញ្ជាក់នូវការមើលឃើញរបស់ចិនចំពោះបញ្ហាជម្លោះនេះទៅកាន់សមភាគី លោក Emmanuel Bonne ទីប្រឹក្សាជាន់ខ្ពស់តំណាងឲ្យប្រធានាធិបតីបារាំងលោក Emmanuel Macron។

មន្ត្រីទូតកំពូលរូបនេះបានពោលថា ៖

«សង្គ្រាមពាណិជ្ជកម្មមួយនេះបានត្រឹមធ្វើឲ្យភាគីទាំងពីរធ្លាក់ចុះក្នុងស្ថានភាព Lose-Lose ទាំងដែលចិនកន្លងមកគឺជាអ្នកព្យាយាមយ៉ាងខ្លាំងក្លាក្នុងកិច្ចការពារចំពោះប្រព័ន្ធធ្វើពាណិជ្ជកម្មសេរីរវាងគ្នា ហើយក៏តែងតែប្រឆាំងដាច់ខាតចំពោះការប្រើប្រាស់នយោបាយមកធ្វើការចំពោះមុខបញ្ហាពាណិជ្ជកម្ម និងសេដ្ឋកិច្ច»។

គួររំលឹកដែរថា ចិន និងតំបន់អឺរ៉ុប រហូតមកដល់នេះបានបន្តជាប់គាំងទំនាក់ទំនងពាណិជ្ជកម្មដោយសារបញ្ហាតម្លើងពន្ធ និងត្រួតពិនិត្យទំនិញនាំចូលរវាងគ្នា។ នៅដើមឆ្នាំកន្លងមកនេះ ប្រទេសជាសមាជិកអឺរ៉ុបទាំង២៧ បានធ្វើការសម្រេចចិត្តរួមគ្នាក្នុងការដាក់ពន្ធបន្ថែមទៅលើទំនិញជារថយន្តរបស់ចិនគ្រប់ប្រភេទដោយចោទថាពួកគេបានកេងចំណេញទៅលើការប្រកួតប្រជែងលើទីផ្សារដោយសារតែមានការគាំទ្រខ្លាំងពីសំណាក់រដ្ឋាភិបាលក្រុងប៉េកាំង ហើយជាលទ្ធផល ប្រទេសចិនបានធ្វើការឆ្លើយតបតាមរយៈការបើកការស៊ើបអង្កេតទៅលើទំនិញមួយចំនួនរបស់អឺរ៉ុប ដូចជា សាច់ជ្រូក និងទឹកដោះគោផងដែរ។

យ៉ាងណាក្តី សម្រាប់កិច្ចពិភាក្សាទ្វេភាគីជាមួយនឹងបារាំង លោក Wang yi បានបង្ហាញថា មានសញ្ញាវិជ្ជមាន និងចាប់ផ្តើមានទំនាក់ទំនងល្អឡើងមកវិញ ដោយសារតែភាគីទាំងពីរបានបញ្ចេញមតិយោបល់ដូចគ្នាច្រើនទៅលើបញ្ហាសំខាន់ៗរបស់សកលលោកដែលរួមមានទាំងបច្ចេកវិទ្យាឆ្លាតវ៉ៃ បញ្ហាគ្រប់គ្រងប្រទេស និងបញ្ហានៅមជ្ឈឹមបូព៍ាផងដែរ។

ជាចុងក្រោយ លោក Wang Yi បាននិយាយថា លោកសង្ឃឹមថាប្រទេសចិន និងបារាំងអាចបន្តរបៀបវារៈវិជ្ជមាននៅឆ្នាំក្រោយ ជំរុញកិច្ចសហប្រតិបត្តិការ និងស្វែងរកឱកាសក្នុងវិស័យផ្សេងៗ ដូចជាថាមពលនុយក្លេអ៊ែរ និងលំហអាកាស បញ្ញាសិប្បនិមិត្ត សម្ភារៈថ្មី ឧបករណ៍ទំនើប កិច្ចការពារបរិស្ថាន និងបច្ចេកវិទ្យាថែទាំសុខភាពបន្ថែមទៀត៕