ប្រហុកខ្ទិះ ជាឈ្មោះមុខម្ហូបមួយដែលគេនិយមទទួលទាន ពិសេសផ្ទាប់ជាមួយនឹងបន្លែគឺកាន់តែឆ្ងាញ់ពិសា ដែលភាគច្រើនគេដឹងថា វាជាមុខម្ហូបបងប្អូនអ្នកខេត្តកំពង់ចាម និងត្រូវចំណាយពេលយូរដើម្បីធ្វើផងដែរ។ ក្នុងនោះ ដោយមើលឃើញពីភាពពេញនិយមបែបនេះ មានអាជីវកម្មលក្ខណៈគ្រួសារមួយបានច្នៃផលិតប្រហុកខ្ទិះបែបថ្មី រសជាតិប្លែក វេចខ្ចប់បានត្រឹមត្រូវ និងអាចទទួលទានបានភ្លាមៗតែម្ដង។

ម្លិះវិសាល ជាយីហោអាជីវកម្មប្រហុកខ្ទិះមួយកន្លែង ស្ថិតនៅភូមិសាលាបាឡាត់ សង្កាត់អូម៉ាល ក្រុងបាត់ដំបង ខេត្តបាត់ដំបង ដែលកំពុងផលិត និងផ្គត់ផ្គង់ប្រហុកខ្ទិះបែបថ្មី រសជាតិប្លែក ពិសេសមិនមានក្លិនប្រហុកខ្លាំងដែលអាចទទួលទានជាមួយនំប៉័ងក៏បាន។

លោក ឡាយ សុវិសារ ជាស្ថាបនិករបស់អាជីវកម្មខាងលើ បានមានប្រសាសន៍ឱ្យដឹងថា ៖

“យើងបង្កើតអាជីវកម្មនេះឡើងដោយសារយើងចង់ឱ្យមានការចេះសន្សំសំចៃពេលសម្រាប់អ្នកដែលរវល់ការងារខ្លាំង ដែលពួកគាត់បានញ៉ាំនូវប្រហុកខ្ទិះមានរស់ជាតិឆ្ងាញ់ ចំណាយពេលតិច មានរសជាតិដូចស្នាដៃអ្នកផ្ទះតែម្ដង”

លោកបន្តថា ៖

“សម្រាប់ចំណុចពិសេសរបស់ប្រហុកខ្ទិះយើង គឺបងប្អូនអាចញ៉ាំជាមួយនំប៉័ងក៏បាន ដោយសារផលិតផលប្រហុកខ្ទិះរបស់យើងអត់ធុំក្លិនស្អុយប្រហុកនោះទេ ពោលគឺអ្នកទទួលទានអាចញ៉ាំពេញមាត់ ថែមទាំងមានក្លិនឈ្ងុយ បើញ៉ាំជាមួយនឹងបន្លែស្រស់ៗ ស្រួយៗ គឺកាន់តែឆ្ងាញ់។ បន្ថែមលើនេះ ប្រហុកខ្ទិះម្លិះវិសាលក៏អាចរក្សាទុកបានយូរ ដែលយើងអាចទុកនៅក្រៅបានរយៈពេលមួយសប្ដាហ៍ និងទុកក្នុងទូរទឹកកកបានដល់ទៅរាប់ខែ”

ចំពោះតម្លៃរបស់ប្រហុកខ្ទិះនេះវិញ ត្រូវបានគេលក់ក្នុងតម្លៃ ១៤ ០០០រៀលក្នុងមួយកែវដែលមានចំណុះ ២៥០ក្រាម ដែលបងប្អូនអាចទិញទៅភ្លាម និងអាចទទួលទានបានភ្លាមតែម្ដង ហើយអតិថិជនរបស់ប្រហុកខ្ទិះនេះភាគច្រើនអ្នកនៅខេត្តបាត់ដំបងផ្ទាល់ និងអ្នកកម្ម៉ង់ទិញនៅរាជធានីភ្នំពេញផងដែរ។

ពាក់ព័ន្ធនឹងការផលិតវិញ ត្រូវបានស្ថាបនិកខាងលើរៀបរាប់បន្ថែមទៀតថា ៖

“ការផលិតរបស់យើងមានដំណាក់កាលធំៗ ដូចជា ការត្រៀមវត្ថុធាតុដើមរួមមានដូចជាប្រហុក សាច់ជ្រូក៣ជាន់ ម្ទេសក្រៀម ស្លឹកក្រូចសើច ខ្ទិះដូង គល់ស្លឹកគ្រៃ ល្មៀត រំដេង ខ្ទឹមស ស្ករ ប្រេងឆា បន្ទាប់មកយើងរៀបចំជ្រើសយកតែវត្ថុធាតុដើមណាដែលមានគុណភាពល្អយកទៅលាងសម្អាត ចិញ្ច្រាំសាច់ ចិញ្ច្រាំប្រហុក ពូតខ្ទិះដូង ទើបយើងចាប់ផ្ដើមចម្អិនដោយលីងគ្រឿងទាំងអស់ចូលគ្នារហូតដល់ស្ងួតទឹកល្អ ទើបយើងអាចធ្វើការវេចខ្ចប់ឱ្យបានត្រឹមត្រូវល្អ។ ដោយឡែក ចំពោះលទ្ធភាពក្នុងការផលិតវិញ ដោយសារយើងជាសិប្បកម្មលក្ខណៈគ្រួសារ គឺពុំទាន់អាចផលិតបានច្រើននៅឡើយទេ ពោលគឺមួយថ្ងៃយើងអាចផលិតបានយ៉ាងច្រើន ១០០កែវប៉ុណ្ណោះ”

គួរបញ្ជាក់ដែរថា សម្រាប់ការចាប់ផ្ដើមដំបូង គឺតាំងពីមុនការរីករាលដាលនៃជំងឺកូវីដ១៩ ដែលលោកបានចំណាយដើមទុនប្រមាណ ៥០០ ដុល្លារដែលត្រូវចំណាយទៅលើឧបករណ៍ប្រើប្រាស់ លុះពេលផលិតត្រូវចំណាយលើវត្ថុធាតុដើម និងសម្ភារសម្រាប់វេចខ្ចប់ផងដែរ។ សម្រាប់ផលិតផលរបស់ ម្លិះវិសាល ក្រៅពីប្រហុកខ្ទិះ ក៏មានផលិតនូវអាហារចម្អិនស្រាប់ផ្សេងទៀត ដូចជា សណ្ដែកដីបំពងគ្រឿង ត្រីបណ្ដូលអំពៅបំពងគ្រឿង និងម្ទេសគ្រឿងផងដែរ។

ទន្ទឹមគ្នានេះដែរ ផលលំបាករបស់អាជីវកម្មខាងលើភាគច្រើនទាក់ទងនឹងការធ្វើទីផ្សារ ក៏ដូចជាការផ្សព្វផ្សាយមិនទាន់បានទូលំទូលាយនៅឡើយ ដោយសារជាអាជីវកម្មថ្មីផង ហើយណាមួយអតិថិជននៅមានផ្នត់គំនិតមួយឱ្យឮតែពាក្យថា ប្រហុក គឺគេតែងតែរអារ។ ចុងក្រោយ ស្ថាបនិកប្រហុកខ្ទិះ ម្លិះវិសាល ក៏មានចក្ខុវិស័យចង់ពង្រីកអាជីវកម្មនេះឱ្យកាន់តែធំ អាចដាក់លក់នៅលើទីផ្សារ និងតាមបណ្ដាផ្សារទំនើបនានា ពិសេសក្លាយជាម៉ាកផលិតផលមួយដែលបងប្អូនយើងស្គាល់ និងគិតដល់ជានិច្ចនៅពេលចង់ញ៉ាំប្រហុកខ្ទិះដែលមានរសជាតិឆ្ងាញ់៕