សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជាធម្មតា នៅតាមទីក្រុង និងទីប្រជុំជននានា រាល់កាកសំណល់, ទឹកកខ្វក់ដែលបានប្រើប្រាស់ហើយ ត្រូវបានបង្ហូរទៅតាមប្រព័ន្ធលូទៅកាន់ប្រភពណាមួយ ក៏ប៉ុន្តែសម្រាប់ទីក្រុងនៅជាប់ឆ្នេរសមុទ្រ គេមិនអាចបង្ហូរទឹកកខ្វក់ទាំងនោះទៅកាន់សមុទ្រដោយផ្ទាល់នោះទេ ដែលគេតម្រូវឱ្យមានកន្លែងមួយដើម្បីសម្អាតទឹកកខ្វក់ជាមុនសិនទើបអាចបង្ហូរចូលសមុទ្របាន ដោយកន្លែងដែលទទួលទឹកកខ្វក់ទាំងនោះគេហៅថា ស្ថានីយ៍ប្រព្រឹត្តិកម្មទឹកកខ្វក់។
បើតាមលោក សុខ សុវណ្ណរិទ្ធ ជាអ្នកសម្របសម្រួលនៅក្នុងការដ្ឋានសាងសង់ស្ថានីយ៍ប្រព្រឹត្តកម្មទឹកកខ្វក់ទី៣ នៅក្រុងព្រះសីហនុបានប្រាប់ AMS ឱ្យដឹងថា ដំណើរប្រព្រឹត្តិកម្មទឹកកខ្វក់ពិតជាមានសារៈប្រយោជន៍ខ្លាំងណាស់ចំពោះបរិស្ថាន ក៏ដូចជាសេដ្ឋកិច្ចរបស់ក្នុងតំបន់ផងដែរ តួយ៉ាងសម្រាប់បរិស្ថានគឺគ្មានការបំពុលប្រភពទឹក កាត់បន្ថយការចម្លងជម្ងឺ និងជួយការពារប្រព័ន្ធអេកូឡូស៊ី។ ចំណែកចំពោះសេដ្ឋកិច្ចវិញ ទឹកដែលសម្អាតហើយគឺជាទឹកស្អាត អាចប្រើប្រាស់ឡើងវិញបាន ដែលមិនប៉ះពាល់ដល់សោភ័ណភាពឆ្នេរ និងអាចទាក់ទាញភ្ញៀវទេសចរថែមទៀត។
លោកពន្យល់ទៀតថា ស្ថានីយ៍ប្រព្រឹត្តិកម្មទឹកកខ្វក់ គឺស្ថានីយ៍ដែលទទួលទឹកកខ្វក់ពីបណ្តាគេហដ្ឋាន សណ្ឋារគារ ភោជនីយដ្ឋាននានា ដើម្បីដកសមាសធាតុពុលមុនពេលបង្ហូរចូលទៅក្នុងលូសាធារណៈ ព្រែក ស្ទឹង បឹងបួរ ទន្លេ ឬសមុទ្រ។ ជាទូទៅ ស្ថានីយ៍ប្រព្រឹត្តិកម្មទឹកកខ្វក់ភាគច្រើនជាប្រភេទប្រព្រឹត្តិកម្មបែបជីវសាស្រ្ត ដោយប្រើធាតុសំខាន់២គឺ ភក់សកម្ម និងខ្យល់អុកស៊ីសែនដើម្បីដកសមាសធាតុពុល។ ចំពោះស្ថានីយ៍ប្រព្រឹត្តិកម្មទឹកទាំង៣នៅក្រុងព្រះសីហនុវិញ ត្រូវបានបំពាក់បច្ចេកវិទ្យាចុងក្រោយ MABR ដែលដំណើរការប្រកបដោយប្រសិទ្ធភាពខ្ពស់ គ្មានសំឡេងរំខាន គ្មានក្លិនប៉ះពាល់ដល់អ្នករស់នៅជុំវិញ សាងសង់លើផ្ទៃដីតូច លទ្ធផលមានស្ថិរភាព និងសន្សំសំចៃថាមពល។
ជាមួយគ្នានេះ ដើម្បីឱ្យដំណើរការសម្អាតទឹកកខ្វក់នេះឱ្យកាន់តែមានប្រសិទ្ធភាព ប្រជាជនជាកត្តាចម្បងក្នុងការចូលរួមចំណែកក្នុងដំណើរការនេះ ដែលពួកគាត់មិនគួរចាក់ប្រេង រឺខ្លាញ់ចូលទៅក្នុងលូ ហើយក៏ត្រូវចូលរួមតភ្ជាប់បណ្តាញលូទឹកកខ្វក់ដោយមិនត្រូវបង្ហូរដោយផ្ទាល់ចូលក្នុងព្រែក ឬប្រលាយសារធារណៈនោះឡើយ។
ចំពោះដំណើរការប្រព្រឹត្តិកម្មនេះ មានចំនួន៨ដំណាក់កាលសំខាន់ៗរួមមាន ៖
១.ដំណាក់កាលដកសំរាមដែលមានទំហំជាង ២០មម ៦មម នឹង ១មម
២.ដំណាក់កាលដកខ្សាច់
៣.អាង Selector
៤.អាង MABR
៥.អាង CAS
៦.អាងពង្រ
៧.អាងបន្តក់សារធាតុគីមី (បន្តក់សារធាតុគីមីក្នុងករណីទឹកមានស្ថានភាពល្អក់ខ្លាំង ដើម្បីឆ្លើយតបនឹងស្តង់ដារនៃការបញ្ចេញសំណល់រាវរបស់ក្រសួងបរិស្ថាន)
៨.ប្រព័ន្ធ UV
គួរបញ្ជាក់ដែរថា ស្ថានីយ៍ប្រព្រឹត្តិកម្មទឹកកខ្វក់ទាំង ៣ នៅខេត្តព្រះសីហនុ មានលទ្ធភាពអាចសម្អាតបានប្រមាណ ៣២ ៤០០ម៉ែត្រគូបក្នុងមួយថ្ងៃ។ យ៉ាងណាមិញ ការសម្អាតទឹកកខ្វក់ក៏អាចជួបនូវកត្តាប្រឈមផងដែរដូចជា ការបង្ហូរកាកសំណល់ប្រេង ឬ ខ្លាញ់ចូលលើសលប់ដោយលើសពីស្តង់ដារដែលបានកំណត់របស់ក្រសួងបរិស្ថាន វាធ្វើអោយប៉ះពាល់ដល់ដំណើរការ និងប្រសិទ្ធភាពរបស់ស្ថានីយ៍ផ្ទាល់តែម្ដង។
ចុងក្រោយ លោក សុខ សុវណ្ណរិទ្ធ នឹងក្រុមការងារទាំងអស់គ្នាមានក្តីរំពឹងយ៉ាងមុតមាំថា ប្រទេសកម្ពុជាយើងមានស្ថានីយប្រព្រឹត្តិកម្មទឹកកខ្វក់នៅគ្រប់ខេត្តក្រុង ហើយសាងសង់ដោយកូនខ្មែរ ព្រោះស្ថានីយ៍ប្រព្រឹត្តិកម្មទឹកកខ្វក់ពិតជាមានសារៈសំខាន់ណាស់សំរាប់បរិស្ថាន និងសំរាប់សុខភាពប្រជាជនយើង៕
Account
Security
Favourite Content