ប្រក្រុង ជារុក្ខជាតិវល្លិ៍ម្យ៉ាងដែលបងប្អូនយើងនិយមយកមកច្របាច់ និងបង្កកឱ្យទៅជាចាហួយ មានសភាពទន់ៗ ពណ៌បៃតង ដែលគេអាចទទួលទានជាបង្អែមក៏បាន និងជាឱសថក្នុងការបន្ថយកម្ដៅក្នុងខ្លួនក៏បាន។ ដោយមើលឃើញពីប្រយោជន៍បែបនេះហើយ មានអាជីវកម្មមួយបានប្រមូលទិញស្លឹកប្រក្រុងពីបងប្អូនដែលរស់នៅក្នុងសហគមន៍តាមបណ្តាខេត្តយកមកផលិតជាចាហួយប្រក្រុងលក់ និងមានទីផ្សារល្អគួរសម។

ប្រក្រុង (BrKrong) ជាយីហោអាជីវកម្មលក់ប្រក្រុងមួយដែលកំពុងមមាញឹកក្នុងការផលិតចាហួយប្រក្រុងពីស្លឹកប្រក្រុងស្រស់ៗ យកទៅក្រុឡុក និងច្រោះយកទឹកដើម្បីផលិតជាចាហួយដ៏មានរសជាតិឆ្ងាញ់ បែបធម្មជាតិពិតៗ ពុំមានលាយម្សៅ ឬសារធាតុដែលអាចបង្កផលប៉ះពាល់ដល់សុខភាពអ្នកទទួលទាននោះទេ។

លោក អ៊ឹង ឱរ៉ុម ជាម្ចាស់សិប្បកម្មខាងលើបានមានប្រសាសន៍ថា ៖

“យើងបង្កើតអាជីវកម្មនេះឡើងក្នុងគោលបំណងចង់កែច្នៃផលិតផលធម្មជាតិមួយឱ្យទៅជាផលិតផលដែលអាចចរាចរណ៍ក្នុងទីផ្សារបាន ហើយក៏ដើម្បីបង្ហាញផលិតផលប្រក្រុងឱ្យក្មេងៗជំនាន់ក្រោយបានស្គាល់ ពិសេសកែច្នៃបន្ថែមទៀតទាក់ទងនឹងផលិតផលពីប្រក្រុងដែលជាផ្នែកមួយជួយដល់បងប្អូនសហគមន៍ដែលជាអ្នកដាំសម្រាប់ផ្គត់ផ្គង់ដល់ដំណើរការអាជីវកម្មមួយនេះផងដែរ។”

លោកបន្ថែមថា ៖

“ប្រក្រុងរបស់យើងអាចលក់បានក្នុងតម្លៃ ២ម៉ឺនរៀលក្នុងមួយគីឡូក្រាម លក់ជាឈុត ប្រក្រុង ទឹកស្ករ ខ្ទិះដូង គ្រាប់ជី ដែលបងប្អូនយើងអាចទិញទៅទទួលទានភ្លាមៗ  ឬអាចរក្សាទុកក្នុងទូរទឹកកកបានយូរ ជាពិសេសអាចទទួលទាននារដូវក្ដៅនេះបានទាំងរសជាតិឆ្ងាញ់ និងល្អចំពោះសុខភាព។”

ចំពោះទីផ្សារប្រក្រុងវិញ លោក ឱរ៉ុម បន្តថា ៖

“យើងមានលទ្ធភាពអាចផលិតបានចន្លោះពី ៥០-៦០គីឡូក្រាមក្នុងមួយថ្ងៃ ក្នុងករណីមានស្លឹកប្រក្រុងគ្រប់គ្រាន់ ជាពិសេសនារដូវវស្សា តែនៅរដូវប្រាំងអាចមានការខ្វះខាតស្លឹក និងអាចផលិតបានតិចជាងនេះ។ ដោយឡែក សម្រាប់អតិថិជនវិញ ភាគច្រើនជាអ្នករស់នៅរាជធានីភ្នំពេញ និងមានវ័យចាប់ពី ៣៥ឆ្នាំឡើងទៅដែលគិតគូរពីសុខភាពផង និងជាអ្នកដែលធ្លាប់ស្គាល់ចាហ៊ួយប្រក្រុងនេះស្រាប់។” 

អាជីវកម្មបែបធម្មជាតិមួយនេះ ក្រៅពីផលិតចាហ៊ួយប្រក្រុង ក៏មានលក់កូនរុក្ខជាតិប្រក្រុងដែលអតិថិជនអាចទិញយកទៅដាំខ្លួនឯងបាន ប៉ុន្តែចំពោះស្លឹកប្រក្រុងដែលជាវត្ថុធាតុដើមផ្ទាល់ គឺប្រមូលទិញពីបងប្អូនរស់នៅក្នុងសហគមន៍តាមបណ្ដាខេត្តមួយចំនួនដែលមានដាំដូចជា ខេត្តក្រចេះ និងតាកែវ ជាដើម។

សម្រាប់ការធ្វើប្រក្រុង ម្ចាស់អាជីវកម្មរូបនេះរៀបរាប់ថា ទាក់ទងនឹងការផលិត តួយ៉ាងការផលិតលក្ខណៈគ្រួសារ គេត្រូវបេះស្លឹក និងលាងសម្អាតឱ្យស្អាត បន្ទាប់មកគេអាចបុក កិន ឬច្របាច់ស្លឹកប្រក្រុងជាមួយនឹងទឹកស្អាត ដោយបរិមាណដែលអាចផលិតប្រក្រុងបានល្អគឺ ស្លឹក៣ខាំ ទឹក៦លីត្រ។ សម្រាប់ការច្របាច់គេត្រូវប្រើរយៈពេលប្រមាណ ១០-២០នាទី ទើបស្លឹកម៉ដ្ឋល្អ និងត្រូវច្រោះកាកចេញ ២ដង ធ្វើឱ្យប្រក្រុងមានពណ៌ស្អាត ហើយការច្រោះនេះទៀតសោតត្រូវប្រើក្រណាត់ ឬស្បៃត្រង ហើយទុកឱ្យវាហូរតាមសម្រួលចៀសវាងច្របាច់ធ្វើឱ្យមានពពុះ និងទុករយៈពេលប្រមាណ ៣ទៅ៤ម៉ោង ចាហួយនេះកកល្អ ដែលគេអាចយកទៅទទួលទាន ឬលក់បាន។

គួរបញ្ជាក់ថា លោក អ៊ឹង ឱរ៉ុម បានចាប់ផ្ដើមអាជីកម្មនេះនៅចុងឆ្នាំ២០១៩ ដោយការចាប់ផ្ដើមនេះតាំងពីការផលិតច្របាច់ដោយដៃផ្ទាល់ រហូតដល់មានម៉ាស៊ីនជំនួយក្នុងការក្រឡុក ធ្វើឱ្យការផលិតកើនឡើង និងអាចផ្គត់ផ្គង់តម្រូវការអតិថិជនបានកាន់តែច្រើន។ ចំណែកផលលំបាកដែលគេជួបប្រទះភាគច្រើនគឺការខ្វះខាតស្លឹកប្រក្រុងតែម្ដង។

សម្រាប់ថ្ងៃអនាគត លោក អ៊ឹង ឱរ៉ុម ក៏មានគម្រោងចង់ពង្រីកការលក់បន្ថែម និងបង្កើនការផ្គត់ផ្គង់ផលិតផលប្រក្រុង ក៏ដូចជាជំរុញការគាំទ្រកសិផលក្នុងស្រុករបស់ប្រជាកសិករខ្មែរ ធ្វើយ៉ាងណាជួយរកទីផ្សារឱ្យបងប្អូនសហគមន៍កាន់តែច្រើន និងជាផ្នែកមួយជួយលើកកម្ពស់ជីវភាពមូលដ្ឋានផ្ទាល់តែម្ដង៕