សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កណ្តាល ៖ ដោយចង់កែប្រែដីទំនេរឱ្យមានប្រយោជន៍ កសិករមួយគ្រួសារបានរៀបចំដីតូចមួយកន្លែងក្បែរផ្ទះ មានទំហំ ១២ ម៉ែត្រ គុណនឹង ៤០ម៉ែត្រ ដើម្បីដាំត្រសក់ចំណារសម្រាប់ហូបខ្លួនឯងផង និងសម្រាប់លក់ចេញទៅទីផ្សារខាងក្រៅផង ដោយអាចរកចំណូលបានគួរសម ពោលគឺលក់ចេញបានចន្លោះពី ៨ម៉ឺនរៀល ទៅដល់ ១០ម៉ឺនរៀលក្នុងមួយថ្ងៃ។
កសិករឈ្មោះ គឹម យ៉េង ដែលបានដាំត្រសក់ចំណារនៅក្នុងឃុំកោះចិន ស្រុកពញ្ញាឮ ខេត្តកណ្តាល បានឱ្យដឹងថា ដោយសារឃើញដីទំនេរទុកចោលមិនដឹងធ្វើអី ក៏សាករៀបចំដីដាំត្រសក់ចំណារនេះឡើង ក្រែងអាចរកចំណូលបានគ្រាន់ដោះស្រាយជីវភាពគ្រួសារ ប៉ុន្តែជាលទ្ធផលក្រោយពីការដាំបានរយៈពេលជិតមួយខែ ស្រាប់តែត្រសក់ចាប់ផ្តើមផ្លែផ្កាឱ្យផលជាបន្តបន្ទាប់ ដោយក្នុងមួយថ្ងៃបេះបានប្រមាណជា ៨០ ទៅ ១០០គីឡូក្រាម ហើយមានម៉ូយមកចាំទិញដល់ចំការតែម្តង។ សម្រាប់ម៉ូយទិញរាយ កសិករខាងលើលក់ចេញក្នុងតម្លៃ ២០០០រៀលក្នុងមួយគីឡូក្រាម ចំណែកម៉ូយដុំកសិករលក់ចេញបានតែ ១០០០រៀលប៉ុណ្ណោះក្នុងមួយគីឡូក្រាម ដែលមួយថ្ងៃមួយៗរកចំណូលបានប្រមាណពី៨ម៉ឺនរៀល ទៅដល់១០ម៉ឺនរៀលជាប្រចាំ។
ចំពោះការដាំដុះមិនមានការលំបាកនោះទេ កសិករគ្រាន់តែភ្ជួរដីហាលចោលមួយសប្តាហ៍ ដើម្បីសម្លាប់មេរោគ និងសម្លាប់ស្មៅឱ្យងាប់ជាមុន បន្ទាប់មកលើកថ្នាលពូនជារងគម្លាតពីគ្នាមួយម៉ែត្រ ហើយរៀបចំក្រាលកៅស៊ូពីលើថ្នាលនីមួយៗ និងចោះកៅស៊ូដាក់គ្រាប់ត្រសក់ចន្លោះពីគ្នាប្រហែល ២.៥សង់ទីម៉ែត្រ។ បន្ទាប់មកស្រោចទឹករហូតត្រសក់ដុះបានមួយសប្តាហ៍ ទើបរៀបចំធ្វើចំណារ ដោតបង្គោល និងរាយសំណាញ់ឱ្យត្រសក់តោងឡើង បន្ទាប់មកគេថែទាំដាក់ជី ស្រោចទឹករាល់ថ្ងៃជាប្រចាំរហូតដល់អាយុជិតមួយខែ ត្រសក់ចាប់ផ្តើមឱ្យផលបេះបានបណ្តើរៗ។ យ៉ាងណាក៍ដោយ ត្រសក់ចំណា ឱ្យផលរយៈពេលចន្លោះពី១៥ថ្ងៃទៅជាង២០ថ្ងៃ ត្រសក់លែងឱ្យផលទៀតហើយ។
ដូច្នេះ កសិករខាងលើបានរៀបចំដីចំការចំនួន០២ទីតាំងបន្ថែមទៀត ដើម្បីរៀបចំដាំបន្តដែលជាផែនការត្រសក់បេះផ្លែអស់មួយចំការ នៅមួយចំការទៀតចាប់ផ្តើមឱ្យផលបេះបន្តបន្ទាប់គ្នា ធ្វើយ៉ាងណាកុំឱ្យត្រសក់អស់ផលរកចំណូលចូលគ្រួសារលែងបាន។
ពាក់ព័ន្ឋករណីនេះ អ្នកជំនាញកសិកម្មបានលើកទឹកចិត្តដល់កសិករដែលនៅសល់ដីទំនេរ គួរគិតគូរដាំបន្លែដំណាំផ្សេងៗ ដែលជាដំណាំត្រូវការហូបប្រចាំថ្ងៃ ដើម្បីអាចបរិភោគខ្លួនឯងបានផង និងសម្រាប់លក់ចេញបានចំណូលក្នុងគ្រួសារប្រចាំថ្ងៃដូចកសិករខាងលើផងដែរ។ តែយ៉ាងណា ដើម្បីកុំឱ្យការដាំបន្លៃ ឬដំណាំគ្មានទីផ្សារ មុននឹងដាំកសិករគួរមើលដំណាំ ឬបន្លែដែលគេដាក់លក់នៅតាមទីផ្សារ ទាំងផ្សារក្នុងភូមិ ផ្សារតាមសហគមន៍ ផ្សារធំៗតាមទីប្រជុំជន ឬផ្សារនៅតាមផ្សារទំនើបផងដែរ។
យ៉ាងណាក៏ដោយ ជាយោបល់របស់អ្នកជំនាញកសិកម្ម និងទីផ្សារបានលើកឡើងថា កសិករគួរកុំដាំដំណាំដាច់ដោយឡែកពីគ្នា ឬធ្វើការដាំដុះតែគ្រួសារមួយតែឯង គួរចងក្រងជាសហគមន៍ផលិតដំណាំមានតម្រូវការចាំបាច់ប្រើប្រាស់នៅលើទីផ្សារ ហើយអាចផ្គត់ផ្គង់ក្នុងតម្លៃធូរថ្លៃ ដើម្បីប្រកួតប្រជែងបានជាមូយតម្លៃបន្លៃ ឬដំណាំនាំចូល។ ករណីនេះអ្នកជំនាញ ក៍បានអំពាវនាវឱ្យពលរដ្ឋទូរទៅជួយគាំទ្រដំណាំក្នុងស្រុកជាជាងគាំទ្រដំណាំនាំចូល ជៀសវាងកុំឱ្យហូរលុយចេញក្រៅប្រទេស គោលដៅជួយឱ្យសេដ្ឋកិច្ចគ្រួសារ និងសេដ្ឋកិច្ចជាតិមានការកើនឡើង ៕ អត្ថបទ ៖ វិន ឈុនហ៊ាត
Account
Security
Favourite Content