ភ្នំពេញ៖ បុណ្យចូលឆ្នាំប្រពៃណីចិន-វៀតណាម ឬបុណ្យនានិទាឃរដូវ ដែលជាធម្មតាគេតែងហៅថា បុណ្យចូលឆ្នាំចិន គឺថ្ងៃឈប់សម្រាកដ៏សំខាន់បំផុត សម្រាប់ជនជាតិចិន ឬបងប្អូនមានសែស្រឡាយចិន-វៀតណាម។ ពិធីបុណ្យចូលឆ្នាំចិន ត្រូវបានចាត់ទុកជាថ្ងៃដ៏មានសារៈសំខាន់ សម្រាប់ប្រជាជនចិន ហើយវាក៏មានឥទ្ធិពលទៅលើប្រទេសជិតខាង ក្នុងប្រទេសកម្ពុជាយើងផងដែរ ជាពិសេសចំណងវប្បធម៌ ជាមួយប្រជាជន ដែលជនជាតិចិនទំនាក់ទំនងជាមួយ។

អំឡុងពេលពិធីបុណ្យចូលឆ្នាំចិននេះដែរ គេសង្កេតឃើញថា ប្រជាពលរដ្ឋ ដែលមានសែស្រឡាយចិន ត្រូវការចំណាយប្រាក់ជាច្រើនដើម្បីធ្វើដំណើរកម្សាន្តទៅជួបជុំគ្រួសារ ជប់លៀង និងចែកអាំងប៉ាវជាដើម។ លើសពីនេះ ឆ្លៀតក្នុងឱកាសពីធីបុណ្យនេះដែរ គេឃើញបងប្អូនប្រជាជានខ្មែរជាច្រើនក៏ចេញដើរកម្សាន្ត និងចំណាយលុយច្រើនផងដែរ។ ដូច្នេះដើម្បីចៀសវាងការចំណាយខុសខ្ទង់ ឬលើសពីផែនការចំណាយថវិការបស់អ្នក និងដើម្បីកុំឱ្យប៉ះពាល់ដល់ការចំណាយ ប្រជាពលរដ្ឋត្រូវរៀបចំផែនការចំណាយឱ្យច្បាស់លាស់ ដទៃទៀត បន្ទាប់ពីពិធីបុណ្យមួយនេះ។

ការចំណាយតិច ឬច្រើនមិនមែនជាបញ្ហាទេ ដែលបណ្តាលឱ្យមានការចំណាយខុសខ្ទង់ទេ។ បើមើលទៅសេដ្ឋកិច្ច ការចាយវាយច្រើនរបស់ប្រជាពលរដ្ឋនឹងធ្វើចរន្តលុយល្អប្រសើរ ហើយសេដ្ឋកិច្ចរីកក៏មានការរីកចម្រើន។

ក្នុងន័យសេដ្ឋកិច្ច ឧទាហរណ៍ អំឡុងពេលមានបុណ្យទាន ប្រជាពលរដ្ឋចាយលុយច្រើនលើសណ្ឋាគារ ទិញទំនិញ ម្ហូបអាហារ កន្លែងលក់ដូរ និងអ្នកប្រកបអាជីវកម្មពាក់ព័ន្ធនឹងទទួលបានផលប្រយោជន៍ច្រើន។ ជាមួយគ្នានេះ បើការចាយវាយមិនមានផែនការ មិនត្រូវខ្ទង់ ខុសខ្ទង់ ឬមិនបានព្រាងទុក ចាយទៅលើសពីលទ្ធភាពក្នុងការចំណាយ នោះវាធ្វើឱ្យប៉ះពាល់ដល់ការចំណាយផ្សេងៗ ឬក៏ប៉ះពាល់ដល់ការចំណាយក្នុងគ្រួសារ។

ជាធម្មតា បើអ្នកបានព្រាងទុកសម្រាប់ការផែនការចំណាយរបស់អ្នក អ្នកដឹងលទ្ធភាពក្នុងការចំណាយ នោះមិនឱ្យប៉ះពាល់ដល់ការចំណាយផ្សេងៗទៀតទេ។ ប៉ុន្តែបើអ្នកមិនបានព្រាងទុកសម្រាប់ការចំណាយ ដោយយកចំណូលមកចំណាយ ដែលធ្វើឱ្យប៉ះពាល់ដល់ការចំណាយជាប្រចាំ ហើយឈានដល់ការត្អួញត្អែហេតុធ្វើបានជាមានចំណាយ ដោយសារការចំណាយរបស់អ្នកមិនមានការរៀបចំខ្ទង់ចំណាយឱ្យមានត្រឹមត្រូវ។

ប្រជាពលរដ្ឋមួយចំនួនទៅលេងស្រុកកំណើត ឬដើរលេងកម្សាន្តជារៀងរាល់ឆ្នាំ នាឱកាសចូលឆ្នាំចិន  ពួកគាត់ដឹងថា មានកម្មពិធីអ្វីខ្លះ និងចំណាយអស់ប៉ុន្មាន ដូច្នេះ ពេលចូលឆ្នាំចិន ហើយគាត់ត្រូវចំណាយប៉ុន្មាន គាត់នឹងត្រៀមទុកសម្រាប់ការចំណាយ។ ប៉ុន្តែបញ្ហាមិនមែនដូច្នេះ បញ្ហាគឺគាត់អត់បានត្រៀម ហើយយកចំណូលធម្មតាប្រចាំខែ ទៅចំណាយសម្រាប់តែរយៈបីថ្ងៃ នោះហើយវាធ្វើឱ្យប៉ះពាល់ដល់ការចំណាយប្រចាំខែរបស់គាត់ ទម្រាំតែទទួលបានចំណូលប្រចាំខែថ្មីមកវិញ។

ប្រជាពលរដ្ឋត្រូវមានគម្រោងថវិកាឱ្យច្បាស់លាស់ ដូច្នេះការចាយវាយរបស់យើងនឹងមិនប៉ះពាល់ដល់ខ្ទង់ចំណាយជីវភាព ឬតម្រូវការរបស់យើងទេ។ ពេលយើងមានផែនការ និងគម្រោងថវិកា យើងដឹងថាតើត្រូវចាយវាយនៅពេលណា  ដូច្នេះយើងមានគម្រោង យើងមានការសន្សំទុក ដើម្បីចំណាយពេលណា ដែលយើងត្រូវចំណាយ។ ដូច្នេះបើសិនជាប្រជាពលរដ្ឋមានការៀបចំបែបនេះ ក្រុមគ្រួសារនីមួយៗមានលទ្ធភាពច្រើនក្នុងការចំណាយ ពេលកម្មពិធីឈប់សម្រាក។

សូមបញ្ជាក់ផងដែរថា ពិធីបុណ្យចូលឆ្នាំចិន ក៏បានប្រារព្ធធ្វើផងដែរ នៅក្នុងប្រទេសសិង្ហបុរី ឥណ្ឌូនេស៊ី ម៉ាឡេស៊ី ហ្វីលីពីន ថៃ កម្ពុជា ក៏ដូចជាប្រទេសដទៃទៀត ដែលមានប្រជាជនចិនរស់នៅដោយស្របច្បាប់ ភាគច្រើន គឺប្រទេសស្ថិតនៅក្បែរសមុទ្រចិន។ ពិធីបុណ្យនេះ បានក្លាយទៅជាផ្នែកមួយ នៃវប្បធម៌ប្រពៃណី របស់ប្រទេសទាំងនោះ។ នៅក្នុងប្រទេសកាណាដា ទោះបីជាពិធីបុណ្យចូលឆ្នាំចិន មិនមែនជាថ្ងៃឈប់សម្រាកជាផ្លូវការក៏ដោយ ក៏ប្រជាជនចិនជាច្រើន នៅតែប្រារព្ធពិធីនេះ យ៉ាងទូលំទូលាយ ហើយប្រៃសណីយ៍នៃប្រទេសកាណាដាបានចែកចាយតែមសម្រាប់ប្រើនៅឆ្នាំថ្មី នៅតាមគេហដ្ឋាននីមួយៗផងដែរ៕