«កំុលោភ កុំលឿន ប្រយ័ត្នលង់» ។នេះជាប្រសាសន៍របស់ឯកឧត្តម យឹម លាត ទេសាភិបាលរងធនាគារជាតិនៃកម្ពុជា ដែលបានថ្លែងក្នុងវេទិកាចំណេះដឹងហិរញ្ញវត្ថុឌីជីថលរៀបចំឡើងដោយធនាគារជាតិនៃកម្ពុជានិងក្រុមហ៊ុនក្រេឌី ប៊្យូរ៉ូ ខេមបូឌា នៅចុងសប្តាហ៍មុន។

ឯកឧត្តមទេសាភិបាលរងបានលើកឡើងដូច្នេះក្នុងន័យឱ្យពលរដ្ឋមានការប្រុងប្រយ័ត្នខ្ពស់ចំពោះករណីឆបោកអនឡាញ។កុំលោភលន់ កុំចុចលីងផ្តេសផ្តាស​លឿនពេក និងកុំជឿដោយគ្មានការពិចារណារហូតដល់ចាញ់បោកគេ។

ឯកឧត្តមមានប្រសាសន៍ថា ៖បច្ចេកវិទ្យាឌីជីថលមានការរីកចម្រើនយ៉ាងឆាប់រហ័ស ដែលផ្តល់ប្រយោជន៍ជាច្រើនដល់អ្នកប្រើប្រាស់ ទន្ទឹមនឹងនោះក៍មាន​ហានិភ័យផងដែរ ប្រសិនបើយើងមានចំណេះដឹងលើបច្ចេកវិទ្យាឌីជីថលមិនច្បាស់លាស់ ឬប្រើប្រាស់មិនមានការប្រុងប្រយ័ត្ន ដូច្នេះទាមទារឱ្យមានទំនួលខុសត្រូវខ្ពស់ចំពោះការប្រើប្រាស់នេះ។

ឯកឧត្តមថ្លែងដូច្នេះថា៖ ប្រសិនបើអ្នកប្រើប្រាស់មិនមានឧបករណ៍ល្អក្នុងការរុករកបច្ចេកវិទ្យាថ្មីៗទេ នោះទំនុកចិត្តនៅក្នុងប្រព័ន្ធនឹងត្រូវចុះខ្សោយ ដែលជាភាសាអង់គ្លេស «If users are not well-equipped to navigate new technologies, confidence in the system may weaken» ។

ជាឧទាហរណ៍នៅពេលប្រើប្រាស់ អ៊ីនធឺណិត Wifi នៅទីកន្លែងណាមួយ ដែលមានការភណ្ឌច្រលំ នោះក្រុម Haker អាចចូលទៅគ្រប់គ្រងលេខសម្ងាត់របស់យើង គ្រប់គ្រងគណនីធនាគារបស់យើង ឬគេអាចឆែកដឹងពីពត៌មានផ្ទាល់ខ្លួនរបស់យើងបានថែមទៀតផង។

លោគ អឿ សុធារ័ត្ន ប្រធាននាយកប្រតិបត្តិ ក្រុមហ៊ុន ក្រេឌីត ប្យួរ៉ូ ខេមបូឌា មានប្រសាសន៍ថា ៖សេដ្ឋកិច្ចឌីជីថលរបស់ប្រទេសកម្ពុជា កំពុងពង្រីកយ៉ាងឆាប់រហ័ស ក្នុងនោះមានដូចជាសេវាធនាគារចល័ត ការទូទាត់ប្រាក់តាម QR ការផ្តល់ប្រាក់កម្ចីឌីជីថល និងការច្នៃប្រឌិតបច្ចេកវិទ្យាហិរញ្ញវត្ថុ ដែលជាផ្នែកមួយនៃជីវិតប្រចាំថ្ងៃ សម្រាប់ប្រជាជនកម្ពុជារាប់លាននាក់។

លោកថា ការរីកចម្រើនទាំងនេះនាំមកនូវភាពងាយស្រួល ប៉ុន្តែវាក៏នាំមកនូវហានិភ័យ និងការទទួលខុសត្រូវថ្មីៗផងដែរ។ ចំណេះដឹងផ្នែកហិរញ្ញវត្ថុនាពេលបច្ចុប្បន្ននេះ លាតសន្ធឹងហួសពីការយល់ដឹងអំពីប្រាក់កម្ចី ប្រាក់សន្សំ ឬអត្រាការប្រាក់ទៅទៀត។

កាលពីពេលថ្មី សមត្ថកិច្ចបានជំរុញឲ្យពលរដ្ឋមានការប្រុងប្រយ័ត្ន ករណីអំពើឆបោកប្រាស់ដោយប្រើប្រាស់មធ្យោបាយបច្ចេកវិទ្យា ឬជាការលួងលោមឆបោកជនរងគ្រោះថា នឹងឲ្យរបស់មានតម្លៃ ឬប្រាក់ដល់ជនរងគ្រោះ និងតម្រូវជនរងគ្រោះបង់ប្រាក់មួយចំនួន ដើម្បីសម្រួលនីតិវិធី សេវាដឹកជញ្ជូន ឬសេវាពន្ធ ប៉ុន្តែផ្ទុយទៅវិញពុំមានរបស់ឬប្រាក់ត្រូវបានប្រគល់ជូនជនរងគ្រោះ ដូចការសន្យានោះឡើយ។

គិតត្រឹមខែវិច្ឆិកា ឆ្នាំ២០២៥ សមត្ថកិច្ចបានបង្ក្រាបបទល្មើសឆបោកតាមប្រព័ន្ធបច្ចេកវិទ្យាចំនួន ២៤លើក។ ក្នុងនោះស្រាវជ្រាវស៊ើបអង្កេតដោយផ្ទាល់ចំនួន ១៣លើក និងតាមកិច្ចសហប្រតិបត្តិការជាមួយសមត្ថកិច្ចបរទេសចំនួន ១១លើក ឃាត់ខ្លួនជនបរទេសសរុបចំនួន ១,៨៥៩នាក់ និងកសាងសំណុំរឿងបញ្ជូនទៅតុលាការចំនួន១១ករណី។ ឃាត់ខ្លួនជនសង្ស័យជាមេខ្លោង និងមុខសញ្ញាដែលងាយនឹងប្រព្រឹត្តបទល្មើសម្តងទៀតសរុបចំនួន ១៤៨នាក់៕