សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លូវជាតិលេខ៤១ តភ្ជាប់ពីផ្លូវជាតិលេខ៤ ត្រង់ចំណុងថ្នល់ទទឹងទៅដល់ផ្លូវជាតិលេខ៣ ត្រង់ចំណុចជិតចំណោតយាយម៉ៅ មានប្រវែង ៩៥,២៧គីឡូម៉ែត្រ ត្រូវបានរាជរដ្ឋាភិបាលចំណាយថវិកាជាង៦៧លានដុល្លារអាមេរិក ដើម្បីស្ដារ និងលើកកម្រិតគុណភាពឱ្យកាន់តែប្រសើរ ហើយនៅពេលសាងសង់រួច វានឹងក្លាយជាខ្សែផ្លូវយុទ្ធសាស្ត្រដ៏សំខាន់មួយ និងជាប្រវត្តិសាស្ត្រដ៏ផូរផងរបស់កម្ពុជា ។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា ផ្លូវជាតិលេខ៤១ ជាខ្សែផ្លូវយុទ្ធសាស្ត្រ និងផ្សារផ្ជាប់ជាមួយប្រវត្តិសាស្ត្រដ៏ផូរផងរបស់កម្ពុជា ។ រហូតមកដល់ពេលនេះ គម្រោងស្ដារ និងលើកកម្រិតគុណភាពផ្លូវជាតិលេខ៤១នេះ សម្រេចសមិទ្ធផលបានជាង៩៧ភាគរយហើយ ដោយក្នុងនោះ ការងារអ៊ុតកៅស៊ូ AC បានបញ្ចប់ស្ទើរតែ១០០ភាគរយ ហើយការងារបំពាក់សម្ភារៈសុវត្ថិភាពចរាចរណ៍ ដូចជា គំនូសចរាចរណ៍ ផ្លាកសញ្ញាចរាចរណ៍ ផ្លាកបង្ហាញទិសផ្លូវ របារ និងការងារចាំបាច់ផ្សេងៗក៏ជិតរួចរាល់ ។
គម្រោងផ្លូវនេះ ត្រូវបានអតីតនាយករដ្ឋមន្ត្រីនៃព្រះរាជាណាចក្រកម្ពុជា សម្ដេចអគ្គមហាសេនាបតីតេជោ ហ៊ុន សែន បើកការដ្ឋានសាងសង់កាលពីអំឡុងចុងខែធ្នូ ឆ្នាំ ២០២២កន្លងទៅ ដោយថវិកាដែលយកមកសាងសង់ផ្លូវនេះ ជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជាសម្រាប់ការដោះស្រាយផលប៉ះពាល់ និងពន្ធអាករផ្សេងៗ។
ផ្លូវនេះ គឺជាផ្លូវដែលតភ្ជាប់ពីតំបន់ផ្សេងៗ ទៅកាន់តំបន់ឆ្នេរសមុទ្រនៃព្រះរាជាណាចក្រកម្ពុជា ដោយវាបានភ្ជាប់ពីផ្លូវជាតិលេខ៤ ទៅផ្លូវជាតិលេខ៣ ទៅកាន់ទីរួមខេត្តកំពត ទៅកាន់ឆ្នេរសមុទ្រក្រុងកែប និងមួយផ្នែកទៀតទៅកាន់ឆ្នេរសមុទ្រក្រុងព្រះសីហនុ ។ មិនតែប៉ុណ្ណោះ វាក៏នឹងក្លាយជាផ្លូវដឹកជញ្ជូនដ៏សំខាន់មួយសម្រាប់ដឹកជញ្ជូនទំនិញពីកំពង់ផែទឹកជ្រៅខេត្តកំពតទៅកាន់រាជធានីភ្នំពេញ ខេត្តកំពង់ស្ពឺ ដែលជាតំបន់មានសក្ដានុពលខ្ពស់ក្នុងវិស័យឧស្សាហកម្ម ការផលិត និងការនាំចេញ ។
បើតាមអ្នកជំនាញនៃវិស័យអចលនទ្រព្យកម្ពុជាជាច្រើនបានមើលឃើញថា នៅពេលផ្លូវនេះសាងសង់រួចរាល់ វាក៏នឹងជួយជំរុញសក្ដានុពលវិស័យដីធ្លី និងតម្រូវការដីធ្លីនៅតាមបណ្ដោយផ្លូវនេះបានមួយកម្រិតទៀតផងដែរ ជាពិសេសរោងចក្រ ឃ្លាំងស្តុកទំនិញ ខណៈបច្ចុប្បន្នសកម្មភាពនៃការប្រើប្រាស់ដីធ្លីនៅតាមបណ្ដោយផ្លូវជាតិលេខ៤១នេះ ក៏ចាប់ផ្ដើមកម្រើកជាបន្តបន្ទាប់ ដោយមានរោងចក្រសហគ្រាស ឃ្លាំងស្តុកទំនិញ ការអភិវឌ្ឍលំនៅឋាន ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសសាន៍ថា តំបន់តាមបណ្ដោយផ្លូវជាតិលេខ៤១ ជាតំបន់ដែលមានសក្ដានុពលលើឧស្សាហកម្ម ហើយដីធ្លីនៅតំបន់នេះ នឹងអាចប្រើប្រាស់ជាទីតាំងសម្រាប់សាងសង់រោងចក្រ និងឃ្លាំងស្តុកទំនិញ ស្របនឹងកំពង់ផែទឹកជ្រៅខេត្តព្រះសីហនុក៏បានសាងសង់ ដែលអាចធ្វើឱ្យតំបន់តាមបណ្ដោយផ្លូវនេះកាន់តែមានសក្ដានុពលនិងមានតម្រូវការខ្ពស់ ៕
Account
Security
Favourite Content