សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ធនាគារជាតិនៃកម្ពុជា (NBC) បានណែនាំដល់គ្រឹះស្ថានធនាគារ និងហិរញ្ញវត្ថុទាំងអស់ឱ្យផ្តល់វិញ្ញាបនបត្រសម្គាល់ម្ចាស់អចលនវត្ថុ ឬបណ្ណសម្គាល់សិទ្ធិកាន់កាប់អចលនវត្ថុ (ទ្រព្យធានា) នៅគ្រឹះស្ថានធនាគារ ក៏ដូចជាគ្រឹះស្ថានហិរញ្ញវត្ថុ និងលិខិតបញ្ជាក់ពីការរួចបំណុលជូនអតិថិជនក្នុងរយៈពេលយ៉ាងយូរ ០៧ (ប្រាំពីរ) ថ្ងៃ នៃថ្ងៃធ្វើការ បន្ទាប់ពីអតិថិជនបានបំពេញកាតព្វកិច្ចទូទាត់សងឥណទានចប់ជាស្ថាពរ។
ក្នុងសារាចរណែនាំរបស់ធនាគារជាតិនៃកម្ពុជា បានឱ្យដឹងថា ក្នុងគោលបំណងរួមចំណែកដល់ការរក្សាទំនុកចិត្តរបស់អតិថិជនចំពោះប្រព័ន្ធធនាគារទាំងមូល ធនាគារជាតិនៃកម្ពុជាសូមណែនាំដល់គ្រឹះស្ថានធនាគារ និងហិរញ្ញវត្ថុទាំងអស់ឱ្យផ្តល់វិញ្ញាបនបត្រសម្គាល់ម្ចាស់អចលនវត្ថុ ឬបណ្ណសម្គាល់សិទ្ធិកាន់កាប់អចលនវត្ថុ ដែលជាទ្រព្យធានានៅគ្រឹះស្ថានធនាគារ និងហិរញ្ញវត្ថុ ព្រមទាំងលិខិតបញ្ជាក់ពីការរួចបំណុលជូនអតិថិជនក្នុងរយៈពេលយ៉ាងយូរ ០៧ (ប្រាំពីរ) ថ្ងៃ នៃថ្ងៃធ្វើការ បន្ទាប់ពីអតិថិជនបានបំពេញកាតព្វកិច្ចទូទាត់សងឥណទានចប់ជាស្ថាពរ។ សេចក្តីដូចបានជម្រាបជូនខាងលើ សូមគ្រឹះស្ថានធនាគារ និងហិរញ្ញវត្ថុទាំងអស់ជ្រាប និងសហការអនុវត្តឱ្យមានប្រសិទ្ធភាពខ្ពស់។ សារាចរណែនាំនេះមានប្រសិទ្ធភាពអនុវត្តចាប់ពីថ្ងៃចុះហត្ថលេខានេះតទៅ (ថ្ងៃទី២៣ ខែកញ្ញ ឆ្នាំ២០២៤)។
លោកស្រី ម៉ារ អមរា សមាជិកក្រុមប្រឹក្សាភិបាល សមាគមធនាគារនៅកម្ពុជា និងជាអនុប្រធាននាយកប្របត្តិជាន់ខ្ពស់ និងជាគណៈប្រធាននាយិកាប្រតិបត្តិហិរញ្ញវត្ថុ នៃធនាគារ អេស៊ីលីដា បានថ្លែងប្រាប់ថា ការដាក់ចេញនូវសារាចរណែនាំ ស្តីពីការប្រគល់ឯកសារសម្គាល់ទ្រព្យធានាជូនអតិថិជនរបស់ធនគារជាតិនៃកម្ពុជា គឺការអនុវត្តមួយល្អសម្រាប់ទាំងគ្រឹះស្ថាន និងអតិថិជន ដោយសារវាជួយឱ្យការងាររៀបឯកសារប្រគល់បណ្ណសម្គាល់ទ្រព្យធានារវាងគ្រឹះស្ថាន និងអតិថិជនលឿន និងរហ័សជាងមុន។
លោកស្រី បានថ្លែងបញ្ជាក់ថា ៖
“ធម្មតា បន្ទាប់បញ្ចប់កាតព្វកិច្ចទូទាត់សងទៅកាន់គ្រឹះស្ថានរួចរាល់ អតិថិជនតែងតែចង់បានបណ្ណសម្គាល់កម្មសិទ្ធិ ដែលជាទ្រព្យធានា លឿន ហើយការងារនេះ គ្រប់គ្រឹះស្ថានសុទ្ធតែអាចធ្វើបាន។ […] សម្រាប់រយៈពេលប្រគល់ជូនអតិថិជនក្នុងរយៈពេលយ៉ាងយូរ ៧ ថ្ងៃ នៃថ្ងៃធ្វើការ មិនមែនជារយៈពេលលឿនពេកទេ ហើយយើងអាចចូលរួមអនុវត្តបាន។”
យោងតាមរបាយការណ៍ប្រចាំឆមាសទី១ និងទិសដៅការងារឆមាសទី២ ឆ្នាំ២០២៤ របស់ធនាគារជាតិនៃកម្ពុជា បានបញ្ជាក់ថា ប្រព័ន្ធធនាគាររក្សាបានភាពធន់ និងបន្តមានវឌ្ឍនភាព ដោយទ្រព្យសកម្មរបស់ប្រព័ន្ធធនាគារ មានកំណើន ៦,១% (ដល់ ៣៥៦,៩ ទ្រីលានរៀល ស្មើ ៨៨,៣ ប៊ីលានដុល្លារអាមេរិក) ដែលក្នុងនោះ ទ្រព្យសកម្មវិស័យធនាគារកើនឡើង ១៤,៤% ខណៈដែលទ្រព្យសកម្មវិស័យមីក្រូហិរញ្ញវត្ថុធ្លាក់ចុះ -៤៦,៩% និងវិស័យភតិសន្យាហិរញ្ញវត្ថុ -៩,៧%។
ឥណទានទៅកាន់វិស័យចម្បងៗបានថមថយកំណើនមកត្រឹម ២,៦% (ដល់ ២៣៨,១ ទ្រីលានរៀល ស្មើ ៥៨,៩ ប៊ីលានដុល្លារអាមេរិក) ក្នុងពេលដែលប្រាក់បញ្ញើអតិថិជនមានកំណើនក្នុងអត្រា ១៣,៤% (ដល់ ២០៩,៩ ទ្រីលានរៀល ស្មើ ៥១,៩ ប៊ីលាន ដុល្លារអាមេរិក)៕
Account
Security
Favourite Content