បរទេស៖ យោងតាមប្រភពព័ត៌មានពី The Guardian ​បានរាយការណ៍ថា ធនាគារកណ្តាលចិន PBOC បានចេញវិធានការធំបំផុតមិនធ្លាប់មានចំនួន២ ដើម្បីស្តារកំណើនសេដ្ឋកិច្ច និងជួយវិស័យអចលនទ្រព្យដែលកំពុងធ្លាក់ចុះខ្លាំងឱ្យមានភាពល្អប្រសើរឡើងវិញ។

វិធានការជំរុញសេដ្ឋកិច្ចថ្មីរបស់ធនាគារកណ្តាលចិន PBOC បានកើតឡើងប៉ុន្មានថ្ងៃបន្ទាប់ពីធនាគារកណ្តាលអាមេរិក Federal Reserve បានទម្លាក់អត្រាការប្រាក់ជាលើកដំបូងក្នុងរយៈពេលជាង ៤ ឆ្នាំចុងក្រោយ។ កាលពីថ្ងៃអង្គារ៍កន្លងទៅនេះ ធនាគារកណ្តាលចិន PBOC បានអនុម័តនូវវិធានការចំនួន ២ ដើម្បីកាត់បន្ថយការចំណាយលើការខ្ចីប្រាក់ រួមមាន ការកាត់បន្ថយអត្រាការប្រាក់លើកម្ចីអចលនទ្រព្យដែលមានស្រាប់ និងការផ្តល់លទ្ធភាពដល់ធនាគារនានាផ្តល់កម្ចីប្រាក់បានថែមទៀត។ ការផ្លាស់ប្តូរនេះកើតឡើងបន្ទាប់ពីទិន្នន័យបង្ហាញថា សេដ្ឋកិច្ចចិនមិនបានសម្រេចគោលដៅកំណើន ៥ ភាគរយរបស់ខ្លួនសម្រាប់ឆ្នាំនេះទេ។

លោក Pan Gongsheng ទេសាភិបាលធនាគារកណ្តាលចិនបាននិយាយថា PBOC នឹងបន្ធូរបន្ថយការរឹតបន្តឹងលើការខ្ចីប្រាក់ដើម្បីវិនិយោគលើប័ណ្ណភាគហ៊ុន ព្រមទាំងភាគហ៊ុននៅលើទីផ្សារប្តូរប្រាក់របស់ចិនផងដែរ។ ជាការកត់សម្គាល់ ក្នុងរយៈពេលប៉ុន្មានម៉ោងបន្ទាប់ពីការប្រកាស សន្ទស្សន៍ភាគហ៊ុននៅសៀងហៃបានកើនឡើងជាង ៤ ភាគរយ ខណៈដែលតម្លៃ​ប្រេង​​ឆៅម៉ាក Brent ឡើងថ្លៃ​ជាង ១ ភាគរយ ដែលមានតម្លៃជិត ៧៥ ដុល្លារ​ក្នុង​មួយ​បារ៉ែល។

ក្នុងជំហានទីមួយ PBOC អាចនឹងកាត់បន្ថយអត្រាសាច់ប្រាក់តម្កល់ ឬ បម្រុង (RRR) ដែលជាចំនួនសាច់ប្រាក់ត្រូវរក្សាទុកក្នុងទុនបម្រុង និងជាដំណើរការដែលធនាគារកណ្តាលទិញមូលបត្រពីធនាគារពាណិជ្ជតាមរយៈការដេញថ្លៃ ជាមួយនឹងកិច្ចព្រមព្រៀងមួយដើម្បីលក់វាចេញវិញនៅពេលអនាគត។ ការកាតបន្ថយសាច់ប្រាក់បម្រុង (RRR) អាចនឹងមានចន្លោះ ០,២៥ ទៅ ០,៥០ ពិន្ទុនៃភាគរយ ឬ ប្រហែល ១ ទ្រីលានយ័ន (១៤២ ពាន់លានដុល្លារ) នៅចុងឆ្នាំអាស្រ័យទៅលើស្ថានភាព។ ការកាត់បន្ថយនេះបានផ្តល់លទ្ធភាពដល់ធនាគារនានាអាចផ្តល់កម្ចីប្រាក់បន្ថែមទៀតទៅឱ្យអតិថិជនរបស់ខ្លួន។

ជំហានទីពីរ គឺជាវិធានការដែលមានគោលបំណងជំរុញទីផ្សារអចលនទ្រព្យដែលរងគ្រោះពីវិបត្តិ តាមរយៈការកាត់បន្ថយអត្រាការប្រាក់សម្រាប់កម្ចីទិញផ្ទះដែលមានស្រាប់ និងកាត់បន្ថយការបង់រំលោះលើផ្ទះគ្រប់ប្រភេទពី ២៥ ភាគរយមកត្រឹម ១៥ ភាគរយ។ PBOC រំពឺងថា អត្រាការប្រាក់កម្ចីទិញផ្ទះទាប និងប្រាក់បង់រំលោះទាបអាចនឹងជួយប្រហែល ៥០ លានគ្រួសារ ដោយកាត់បន្ថយការចំណាយគ្រួសារជាមធ្យមប្រហែល ១៥០ ពាន់លាន​យ័ន (២១,៣៥ ពាន់លានដុល្លារ) ក្នុងមួយឆ្នាំ​។

គួរកត់សម្គាល់ថា ចាប់​តាំង​ពី​ឆ្នាំ ២០២១ វិស័យ​អចលនទ្រព្យ​របស់​ចិនបាន​ធ្លាក់​ចុះ​យ៉ាង​ខ្លាំងរហូតដល់ធ្លាក់ចូលក្នុងវិបត្តិ​ ដោយក្រុមហ៊ុនអភិវឌ្ឍន៍ជាច្រើនបានដួលរលំ និងជាប់បំណុល ដោយបន្សល់ទុកផ្ទះមួយចំនួនធំដែលលក់មិនចេញ និងគម្រោងសាងសង់មិនទាន់រួចរាល់៕