ជាការពិតណាស់ថា ភាគច្រើនក្នុងការទទួលបានកម្ចីពីធនាគារ ក៏ដូចជាគ្រឹះស្ថានមីក្រូហិរញ្ញវត្ថុ អតិថិជន ឬអ្នកខ្ចី​ត្រូវមានទ្រព្យដើម្បីធានាការសងត្រឡប់វិញ។ នៅពេលដែលអតិថិជនរូបនោះមិនមានលទ្ធភាពសងត្រឡប់ទេ គ្រឹះស្ថានមីក្រូហិរញ្ញវត្ថុ និងធនាគារអាចមានសិទ្ធិក្នុងការរក្សាទុកទ្រព្យធានានោះជាបណ្តោះអាសន្ន។ ប៉ុន្តែទោះជាយ៉ាងណា ការរឹបអូសយកទ្រព្យធានានេះមិនមែនជាអ្វីដែលស្ថាប័នផ្ដល់កម្ចីចង់បាននោះទេ ពោលគឺវាជាជម្រើសចុងក្រោយបំផុត។ ជម្រើសចុងក្រោយ ព្រោះថាស្ថាប័នផ្ដល់កម្ចីត្រូវឆ្លងកាត់និតិវិធីជាច្រើនដំណាក់កាលរហូតអាចលក់ទ្រព្យធានានោះបាន។

ទាក់ទិននឹងករណីនេះ លោកមេធាវី ជូ សុខហេង ដែលជាសមាជិកគណៈមេធាវីនៃព្រះរាជាណាចក្រ​កម្ពុជា និងដែលបច្ចុប្បន្នបម្រើការងារនៅការិយាល័យចក្រាយុធបានរៀបរាប់អំពីផ្លូវច្បាប់ថា ពាក់ព័ន្ធទៅនឹងការរឹបអូស គឺធនាគារមិនមានសិទ្ធិក្នុងការរឹបអូសទ្រព្យនោះមកធ្វើជារបស់ខ្លួនទេ ប៉ុន្តែគេអាចដាក់ពាក្យបណ្ដឹងដើម្បីទាមទារតាមផ្លូវតុលាការ។ 

លោកបន្តថា មុននឹងឈានទៅដល់ការរឹបអូសតាមផ្លូវច្បាប់ តាមនិតិវិធីបណ្ដឹងត្រូវចំណាយរយៈ​ពេលយូរ ទម្រាំតែបានលិខិតអនុវត្ត ត្រូវការសាលក្រម និងសាលដីការជាស្ថាពរមួយ។ 

លោក ជូ សុខហេង បានបន្តគូសបញ្ជាក់ថា ៖ «ប៉ុន្តែមុនការប្ដឹងនេះ គ្រឹះស្ថានត្រូវតែក្រើនរំលឹក និងចរចាជាមួយអតិថិជនឱ្យអស់​ពីលទ្ធភាព​ដើម្បីដាស់តឿនឱ្យកូនបំណុលអនុវត្តនូវកាតព្វកិច្ច​របស់ខ្លួន។ តែបើក្នុងករណី​ដែលអស់​ពីលទ្ធភាពហើយ ទើបខាងម្ចាស់បំណុលគាត់សម្រេចចិត្តថា ដាក់ពាក្យបណ្ដឹងទៅតុលាការ»។

ជាមួយគ្នានេះ លោក លី ប៊ុនរឹទ្ធិ នាយកប្រតិបត្តិប្រតិបត្តិការនៃគ្រឹះស្ថានមីក្រូហិរញ្ញវត្ថុចម្រើន ក៏បានបញ្ជាក់ឱ្យដឹងផងដែរថា ជាទូទៅកម្រមានករណីដែលគ្រឹះស្ថានផ្ដល់កម្ចី​ដាក់ពាក្យ​លក់ឡៃឡុង​ណាស់ ពីព្រោះដំណើរការនៃនិតិវិធីគឺវែងឆ្ងាយ ម្យ៉ាងទៀតវាជះឥទ្ធិពលមិនល្អទៅដល់ស្ថាប័ន​ជាដើម។

លោក លី ប៊ុនរឹទ្ធិ បន្តឱ្យដឹងថា ៖ «មុននឹងករណីប្ដឹងនីមួយៗ គឺមានការជជែកពិភាក្សាគ្នាយ៉ាង​ល្អិតល្អន់នៅក្នុងស្ថាប័ន ទម្រាំតែសម្រេចចិត្តប្ដឹងតាមផ្លូវច្បាប់ ហើយបើឥណទានតូចៗទេ យើងនឹងរក្សាទំនាក់ទំនងជាមួយអតិថិជន ធ្វើម៉េចឱ្យគាត់សងតាមលទ្ធភាពដែលគាត់អាច​សងបាន»។​

បើតាមអ្នកជំនាញរូបនេះ ទោះបីជាឥណទាននៅក្នុងកម្រិតតូចដែលគាត់មិនមានលទ្ធភាពសង ហើយស្ថាប័នមិនប្រើនិតិវិធីប្ដឹងក៏ដោយ ក៏អតិថិជនខ្លួនឯងត្រូវប្រយ័ត្នផងដែរ។ ប្រុងប្រយ័ត្ននៅទីនេះ លោកចង់បានសេចក្ដីថា ធនាគារជាតិនៃកម្ពុជាមាននូវស្ថាប័នមួយសម្រាប់កត់ត្រាប្រវត្តិនៃការខ្ចីរបស់អតិថិជន ដែលគេហៅថាការិយាល័យឥណទាន (Credit Bureau Cambodia) ។ ការរិយាល័យមួយនេះ មានផ្ទុកនូវប្រវត្តិខ្ចីទាំងអស់របស់អតិថិជនគ្រប់រូប ដូច្នេះប្រសិនបើអតិថិជនណាម្នាក់មិនសងត្រឡប់នោះនឹងពិបាកក្នុងការស្វែងរកកម្ចីថ្មីផ្សេងទៀតនៅពេលក្រោយ។

ដូច្នេះហើយ ជានិតិវិធីដែលចំណេញទាំងសងខាង គឺអតិថិជនគួរតែបើកចិត្តចរចា និងប្រាប់ពីស្ថាន​ភាព​របស់ខ្លួន ដើម្បីឱ្យភាគីធនាគារចូលខ្លួនដោះស្រាយជូន ពោលគឺចៀសវាងនូវនិតិវិធីរឹបអូសទ្រព្យធានាតែម្ដង៕