ភ្នំពេញ ៖ របាយការណ៍ថ្មីរបស់សាជីវកម្មហិរញ្ញវត្ថុអន្តរជាតិ (IFC) និងអង្គការពាណិជ្ជកម្មពិភពលោក (WTO) កាលពីថ្ងៃទី ១៣ ខែធ្នូ ឆ្នាំ ២០២៣ បានឱ្យដឹងថា ការកែលម្អលទ្ធភាពទទួលបានហិរញ្ញប្បទានពាណិជ្ជកម្មដែលមានតម្លៃសមរម្យ​ អាចបង្កើនការនាំចូល និងការនាំចេញរហូតដល់ ៩ ភាគរយ​ នៅក្នុងប្រទេសវៀតណាម កម្ពុជា និងឡាវ។ ទិន្នន័យនេះតំណាងឱ្យការកើនឡើងប្រចាំឆ្នាំនៃពាណិជ្ជកម្មទំនិញដែលមានចំនួនជាង ៥៨ ពាន់លានដុល្លារ នៅក្នុងប្រទេសចំនួនបីនេះរួមបញ្ចូលគ្នា។

របាយការណ៍ដែលទទួលបានពីលទ្ធផលនៃការសិក្សានេះ គឺជាការអង្កេតលើកទីពីរអំពីហិរញ្ញប្បទានពាណិជ្ជកម្មក្នុងតំបន់​បន្ទាប់ពីអាហ្រ្វិកខាងលិច ដែលវិភាគប្រព័ន្ធអេកូឡូស៊ីហិរញ្ញប្បទានពាណិជ្ជកម្មក្នុងតំបន់ និងផ្តល់ការយល់ដឹងអំពីរបៀបដែលក្រុមហ៊ុននាំចេញ នាំចូលនានាអាចបង្កើនពាណិជ្ជកម្មអន្តរជាតិ​ ជាមួយនឹងការគាំទ្រប្រសើរឡើងពីស្ថាប័នហិរញ្ញវត្ថុ។ គួរកត់សម្គាល់ថា ការបង្កើនការគ្របដណ្តប់អោយមានហិរញ្ញប្បទានពាណិជ្ជកម្មមានសារៈសំខាន់ជាងការកាត់បន្ថយថ្លៃដើមនៃហិរញ្ញប្បទាន។

ជាទូទៅ កំណើន​ពាណិជ្ជកម្ម​ក្នុង​តំបន់​មេគង្គ​មាន​ភាព​មិន​ស្មើគ្នាឡើយ។ ការ​នាំ​ចេញ​ពី​ក្រុមហ៊ុន​ដែល​គ្រប់​គ្រង​ដោយ​បរទេស​បាន​កើន​ឡើង​លើស​ពី​ខ្សែ​សង្វាក់​ផ្គត់ផ្គង់ដែល​គ្រប់​គ្រងដោយក្រុមហ៊ុន​​ក្នុង​ស្រុក។ ការសិក្សាបានបង្ហាញថា ហិរញ្ញប្បទានពាណិជ្ជកម្មក្នុងស្រុកមិនត្រឹមតែត្រូវបានគេប្រើប្រាស់តិចតួចប៉ុណ្ណោះទេ ប៉ុន្តែថែមទាំងមានតម្លៃថ្លៃ មានសភាពដាច់ដោយឡែកពីគ្នាជាផ្នែកៗ និងមានលក្ខណ:ប្រពៃណីផងដែរ។ ក្នុងឆ្នាំ ២០២២ ធនាគារក្នុងស្រុកបានផ្តល់ការគាំទ្រត្រឹមតែ ២១ ភាគរយ​នៃការនាំចេញ និងនាំចូលរបស់វៀតណាមប៉ុណ្ណោះ។ នៅ​កម្ពុជា និង​ឡាវ តួលេខ​នោះ​មាន​តិច​ជាង ៣ ភាគរយ។ ពាណិជ្ជករបានលើកឡើងពីតម្រូវការទ្រព្យធានាខ្ពស់ និងដំណើរការដាក់ពាក្យស្នើសុំដ៏លំបាក​ ក្នុងចំណោមហេតុផលសំខាន់ៗ ដែលពួកគេមិនបានស្វែងរកការគាំទ្រពីធនាគារក្នុងស្រុក។

លោក Makhtar Diop នាយកគ្រប់គ្រង IFC បាននិយាយថា​ ៖

“ខ្ញុំសូមថ្លែងអំណរគុណចំពោះអង្គការពាណិជ្ជកម្មពិភពលោក សម្រាប់កិច្ចសហការដ៏ល្អក្នុងការផលិតរបាយការណ៍នេះ។ យើងបានឃើញជារឿយៗនូវអំណាចបរិវត្តកម្មនៃហិរញ្ញប្បទានពាណិជ្ជកម្មសម្រាប់ប្រទេសកំពុងអភិវឌ្ឍន៍។ ប៉ុន្តែ វាតម្រូវឱ្យមានសកម្មភាពដែលសម្របសម្រួលដោយវិស័យឯកជន អ្នកបង្កើតគោលនយោបាយ ស្ថាប័នហិរញ្ញវត្ថុ និង​អង្គការអន្តរជាតិ ដើម្បីដោះស្រាយឧបសគ្គចំពោះហិរញ្ញប្បទានពាណិជ្ជកម្ម និងអនុវត្តសក្តានុពលពេញលេញរបស់ខ្លួនសម្រាប់ទីផ្សារដែលកំពុងរីកចម្រើន។”

របាយការណ៍នេះបានណែនាំឱ្យបង្កើតឧបករណ៍​ ដូចជាហិរញ្ញប្បទានខ្សែសង្វាក់ផ្គត់ផ្គង់ និងសេវាដំណើរការដោយប្រព័ន្ធឌីជីថលប្រកបដោយលក្ខណ:នវានុវត្តន៍ ដើម្បីកាត់បន្ថយការចំណាយ និងលើកកម្ពស់លទ្ធភាពទទួលបានហិរញ្ញប្បទានពាណិជ្ជកម្ម។ ការណ៍នេះ​តម្រូវ​ឱ្យ​មាន​ក្របខណ្ឌ​បទប្បញ្ញត្តិ​កាន់តែ​រឹងមាំ​ដែល​​ដោះស្រាយ​តម្រូវការ​ទ្រព្យធានា ប្រតិបត្តិការ​ឌីជីថល លក្ខខណ្ឌរបស់​ធនាគារកណ្តាល និង​ក្របខ័ណ្ឌ​គណនេយ្យភាព។ របាយការណ៍នេះក៏ណែនាំផងដែរអំពីការបង្កើនការយល់ដឹងអំពីរបៀបទទួលបានហិរញ្ញប្បទានពាណិជ្ជកម្មក្នុងចំណោមក្រុមហ៊ុនតូចៗ និងក្រុមហ៊ុនផ្គត់ផ្គង់ក្នុងស្រុក។

លោកស្រី Ngozi Okonjo-Iweala អគ្គនាយក WTO បាននិយាយថា ៖

“ការស្រាវជ្រាវរួមគ្នានេះបានបង្ហាញថា ការបិទគម្លាតក្នុងការទទួលបានហិរញ្ញប្បទានពាណិជ្ជកម្មដែលមានតម្លៃសមរម្យ​នឹងបង្កើនលំហូរពាណិជ្ជកម្ម ជួយបង្កើតការងារ កាត់បន្ថយភាពក្រីក្រ និងផ្តល់លទ្ធភាពក្នុងការទទួលបានការផ្គត់ផ្គង់សំខាន់ៗដូចជា ម្ហូបអាហារ និងថ្នាំពេទ្យ។ របាយការណ៍ថ្មីនេះផ្តល់ការយល់ដឹងសម្រាប់រដ្ឋាភិបាល ស្ថាប័នហិរញ្ញវត្ថុ និងពាណិជ្ជករ អំពីរបៀបក្នុងការចាប់យកឱកាសដើម្បីជំរុញពាណិជ្ជកម្ម កំណើន និងការធ្វើឱ្យប្រសើរឡើងនូវជីវភាពរស់នៅ​របស់ប្រជាជន។”

IFC និង WTO បានស្ទង់មតិធនាគារដែលមានវត្តមានក្នុងស្រុក​នៅក្នុងប្រទេសទាំងបី ក៏ដូចជាពាណិជ្ជកររាប់រយនាក់នៅក្នុងប្រទេសវៀតណាម។ ការវិភាគពិចារណាពីឥទ្ធិពល រួមនៃការពង្រីកការគ្របដណ្តប់ដោយហិរញ្ញប្បទាន ដែលមានធនាគារជាអន្តរការីចំនួន ២០ ភាគរយ និងកាត់បន្ថយការចំណាយលើការផ្តល់ហិរញ្ញប្បទានដល់កម្រិតអន្តរជាតិ៕