សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្ពៃតឿ ឬស្ពៃជើងទា ជាប្រភេទបន្លែបៃតងដែលមានការពេញនិយមខ្លាំងពីសំណាក់មនុស្សទូទៅ និងមានលក់ច្រើននៅលើទីផ្សារ ដោយសារតែបន្លែប្រភេទនេះមានទាំងរសជាតិ និងគុណប្រយោជន៍ច្រើនចំពោះសុខ ហើយថែមទាំងមានតម្លៃសមរម្យ ហើយអាចច្នៃចេញជាមុខម្ហូបបានច្រើនយ៉ាង។ ហេតុនេះហើយទើបអ្នកជំនាញកសិកម្មបានចងក្រងពីបច្ចេកទេសសំខាន់ៗក្នុងការដាំស្ពៃតឿ ដោយបង្ហាញពីភាពងាយស្រួលក្នុងការដាំដុះ និងការមើលថែ ហើយថែមទាំងអាចទទួលបានទិន្នផលខ្ពស់។
មុននឹងដាំស្ពៃតឿ កសិករត្រូវការរៀបចំដី និងធ្វើរង ដោយគេត្រូវសម្អាតដីចំការ និងរើសស្មៅចេញឱ្យអស់ រួចភ្ជួររាស់ដីឱ្យម៉ដ្ឋល្អ ជម្រៅពី ១០-២០សង់ទីម៉ែត្រ ហើយហាលដីពី ១០-១៥ថ្ងៃ។ បន្ទាប់មកលើករងដាំស្ពៃតឿ លើរងសម្រាប់ដាំស្ពៃតឿ ដែលគេអាចលើករងដាំ ៣ជួរ ឬ ៤-៥ជួរក្នុងមួយរង។
សម្រាប់រងដាំ ៣ជួរ គេត្រូវធ្វើរងមានបាតទំហំ ១ម៉ែត្រ ផ្ទៃលើ ០.៩៥ម៉ែត្រ ហើយបណ្ដោយទៅតាមលទ្ធភាពដី តែមិនគួរឱ្យលើសពី ១៥ម៉ែត្រឡើយ ចៀសវាងពិបាកក្នុងការថែទាំ ស្រោចទឹក ដកស្មៅ។ នៅរដូវប្រាំង យើងអាចលើករងកម្ពស់ ២០-៣០សង់ទីម៉ែត្រ ហើយនៅរដូវវស្សាពី ៣០-៥០សង់ទីម៉ែត្រ បន្ទាប់មកដាក់ជីលាមកសត្វដែលពុកផុយ ឬជីកំប៉ុស្តិ៍ចំនួន ២គីឡូក្រាមលើផ្ទៃដីរង ១ម៉ែត្រការ៉េដោយបាចលើរង ហើយជ្រុំលាយជាមួយដីឱ្យស្មៅសព្វ។
ចំពោះប្លាស្ទិកសម្រាប់គ្របរង គេត្រូវលាតសន្ធឹងដុំប្លាស្ទិច ដោយដោតកន្លាស់ឬស្សីនៅជាយរង និងខាងចុងរង បន្ទាប់មកចោះរណ្ដៅដាំកូនដោយប្រើកំប៉ុងក្ដៅ ដោយប្រើខ្សែទាញតំរ៉ង់ដើម្បីចោះរណ្ដៅដាំកូន និងប្រើខ្នាតសម្រាប់ចោះពីគុម្ពមួយទៅគុម្ពមួយ ប្រមាណ ២តឹក គុណនឹង ២តឹកកន្លះ។
ការបណ្ដុះកូនស្ពៃតឿ គេត្រូវរើសពូជណាដែលធន់នឹងអាកាសធាតុ សត្វល្អិត ជំងឺ ជាពូជដែលផ្ដល់ទិន្នផលខ្ពស់ពូជ និងមានអត្រាដុះចាប់ពី ៨៥ភាគរយឡើងទៅ។ ហើយរបៀបដកកូនបន្លែចេញពីថាសបណ្ដុះដោយយកម្រាមដៃរុញបាតថាសឡើងលើ ហើយដៃម្ខាងដកកូនបន្លែដោយថ្នមៗចេញពីរន្ធថាសបណ្ដុះ ដើម្បីកុំឱ្យដាច់ឫសកូនបន្លែ។
ពាក់ព័ន្ធនឹងរបៀបដាំកូនស្ពៃតឿវិញ គេត្រូវបញ្ចូលទឹកតាមចន្លោះរង រួចបំបែកកូនស្ពៃដែលបណ្ដុះក្នុងរន្ធថាសនីមួយៗ ដោយយក១ដើម ដាំក្នុង ១រណ្ដៅ។ ត្រូវដាំកូនស្ពៃនៅពេលរសៀល ដោយកបគល់ស្មើត្រឹមដីបណ្ដុះ ចៀសវាងកប់លិចដើមជ្រៅពេកអាចបណ្ដាលឱ្យរលួយបាន។
បន្ទាប់ពីដាំហើយ កសិករគួរយកចិត្តទុកដាក់លើការថែទាំ និងដាក់ជីបំប៉ន ក្រៅពីនេះគេក៏ត្រូវត្រួតពិនិត្យលើដី និងតម្រូវការទឹករបស់ដំណាំស្ពៃតឿ ដោយមិនគួរស្រោចតិចពេក ឬច្រើនពេកព្រោះវាអាចបណ្ដាលឱ្យស្ពៃងាប់បាន។ កសិករក៏ត្រូវដកសម្អាតស្មៅក្បែរៗរង និងនៅជុំវិញចំការឱ្យបានស្អាត ដើម្បីបំផ្លាញជម្រកសត្វល្អិត និងការពារកុំឱ្យវាបំផ្លាញបន្លែ។
គួរបញ្ជាក់ដែរថា ស្ពៃតឿផ្ទុកនូវសារធាតុចិញ្ចឹមសំខាន់ៗ មានដូចជា ពពួកវីតាមីនចម្រុះ ពិសេសនោះគឺ វីតាមីន B6 និង C មានបរិមាណច្រើន និង ពពួករ៉ែវិញ មានកាល់ស្យូម ដែក ប៉ូតាស្យូម ម៉ាញ៉េស្យូម ផូស្វ័រ សូដ្យូម ស័ង្កសី ទង់ដែង បូករួមទាំងពពួកអាស៊ីដ ដែលអាចជួយពង្រឹងសុខភាពឆ្អឹង ជំនួយភ្នែក ពង្រឹងប្រព័ន្ធភាពស៊ាំ សម្រួលសរសៃឈាម និងចង្វាក់បេះដូង ជំនួយសុខភាពស្បែក និងរក្សាតុល្យភាពទម្ងន់៕
Account
Security
Favourite Content