សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ធនាគារជាតិនៃកម្ពុជាបានបញ្ជាក់ពីការកើនឡើងគួរឱ្យកត់សម្គាល់នៃប្រតិបត្តិការនៅក្នុងប្រព័ន្ធទូទាត់បាគងជាមួយនឹងប្រតិបត្តិការចំនួន ៦០៨.៣២ លានដង ទាំងប្រតិបត្តិការប្រាក់រៀល និងប្រតិបត្តិការជាប្រាក់ដុល្លារអាមេរិក ដោយបានជួយសម្រួលដល់សកម្មភាពពាណិជ្ជកម្ម អាជីវកម្ម សេដ្ឋកិច្ច និងបានរួមចំណែកដល់ការលើកកម្ពស់បរិយាបន្នហិរញ្ញវត្ថុ។
នៅក្នុងរបាយការណ៍ប្រចាំឆ្នាំ២០២៤ របស់ធនាគារជាតិនៃកម្ពុជាបានឱ្យដឹងថា ប្រតិបត្តិការផ្ទេរ និងទូទាត់ប្រាក់ដែលធ្វើឡើងតាមរយៈប្រព័ន្ធបាគង បានកើនដល់ជាង ៦០៨ លានប្រតិបត្តិការនៅត្រឹមឆ្នាំ ២០២៤ ខណៈចំនួនអ្នកប្រើប្រាស់ប្រព័ន្ធទូទាត់បាគងដែលបានចុះឈ្មោះបានកើនឡើង ៧ ភាគរយដល់ ៦៤២.៥ លាននាក់។ នៅក្នុងនោះ ប្រតិបត្តិការប្រាក់រៀលបានកើនឡើង ៣៣៤ ភាគរយ ដល់ ២៩៩.៣២ ប្រតិបត្តិការ ខណៈដែលប្រតិបត្តិការជាប្រាក់ដុល្លារអាមេរិក បានកើនឡើងដល់ ៣០៨.២ លានប្រតិបត្តិការ កើនឡើង ១៣៣ ភាគរយ ដោយគូសបញ្ជាក់ថា ប្រតិបត្តិការប្រាក់រៀលមានចំណែក ៤៩ ភាគរយនៃប្រតិបត្តិការសរុប។
របាយការណ៍ដដែលបានបន្តថា បរិមាណប្រតិបត្តិការប្រាក់រៀលមានចំនួនសរុប ១៨៣.៧៤ ទ្រីលានរៀល (ប្រហែល ៤៥.៨ ពាន់លានដុល្លារ) កើនឡើង ១២៧ ភាគរយ ធៀបនឹងរយៈពេលមួយឆ្នាំ ហើយប្រតិបត្តិការជាប្រាក់ដុល្លារអាមេរិក មានចំនួន ១០៤.៨១ ពាន់លានដុល្លារ កើនឡើង ៩៥ ភាគរយ។ ក្នុងនោះ ទំហំប្រាក់សរុបនៅក្នុងឆ្នាំ២០២៤ ស្មើនឹង ៣៣០ ភាគរយ នៃផលិតផលក្នុងស្រុកសរុប(ផ.ស.ស)។
ធនាគារជាតិនៃកម្ពុជា បានបញ្ជាក់នៅក្នុងរបាយការណ៍ថា៖ ការប្រើប្រាស់ប្រាក់រៀលក្នុងប្រព័ន្ធទូទាត់បាគងបានកើនឡើងជាលំដាប់ បន្ទាប់ពីប្រព័ន្ធទូទាត់បាគងត្រូវបានដាក់ឱ្យដំណើរការកាលពីអំឡុងខែតុលា ឆ្នាំ២០២០កន្លងទៅ។
សូមជម្រាបថា ធនាគារជាតិនៃកម្ពុជាបានដាក់ឱ្យដំណើរការប្រព័ន្ធបាគង ដែលជាហេដ្ឋារចនាសម្ព័ន្ធសាធារណៈឌីជីថលដ៏សំខាន់មួយ ដើរតួនាទីក្នុងការសម្រួលដល់ការទូទាត់ជាឌីជីថលសម្រាប់សាធារណជន។ ប្រព័ន្ធបាគងបានរួមចំណែកក្នុងការលើកកម្ពស់ការធ្វើសមាហរណកម្មក្នុងប្រព័ន្ធហិរញ្ញវត្ថុ តាមរយៈការជំរុញឱ្យមានការធ្វើអន្តរប្រតិបត្តិការរវាងគ្រឹះស្ថានធនាគារ និងហិរញ្ញវត្ថុ និងគ្រឹះស្ថានផ្តល់សេវាទូទាត់សងប្រាក់ ដែលការណ៍នេះបានពង្រីកនូវលទ្ធភាពក្នុងការធ្វើប្រតិបត្តិការប្រកបដោយភាពងាយស្រួល និងកាន់តែទូលំទូលាយជាងមុនដល់សាធារណជន។
លើសពីនេះ មុខងារទូទាត់ភ្លាមៗរបស់ប្រព័ន្ធបាគងបានជួយបង្កើនប្រសិទ្ធភាព និងសម្រួលដល់ដំណើរការទូទាត់របស់រាជរដ្ឋាភិបាល ដូចជា ការប្រមូលពន្ធ និងសេវាសាធារណៈផ្សេងទៀតបានកាន់តែប្រសើរ។ ក្នុងន័យនេះ ប្រព័ន្ធបាគងមិនត្រឹមតែជាហេដ្ឋារចនាសម្ព័ន្ធសាធារណៈឌីជីថលប៉ុណ្ណោះទេ ប៉ុន្តែថែមទាំងជាប្រព័ន្ធទូទាត់ដ៏សំខាន់ដែលជំរុញ និងសម្រួលដល់ការចូលរួមក្នុងសកម្មភាពសេដ្ឋកិច្ចពាណិជ្ជកម្ម សំដៅគាំទ្រដល់កំណើនសេដ្ឋកិច្ចប្រកបដោយចីរភាពរបស់ប្រទេសកម្ពុជាផងដែរ។
លោកជំទាវបណ្ឌិត ជា សេរី ទេសាភិបាលធនាគារជាតិនៃកម្ពុជា បានមានប្រសាសន៍ថា សេវាទូទាត់តាមប្រព័ន្ធឌីជីថលបានចូលរួមចំណែកយ៉ាងសំខាន់ក្នុងការលើកកម្ពស់បរិយាបន្នហិរញ្ញវត្ថុ ជំរុញនវានុវត្តន៍ និងផ្តល់នូវភាពងាយស្រួល ប្រកបដោយសុវត្ថិភាពដល់អ្នកប្រើប្រាស់។
លោកជំទាវបណ្ឌិតបានមានបញ្ជាក់ថា៖
«ការអភិវឌ្ឍន៍ហេដ្ឋារចនាសម្ព័ន្ធទូទាត់បានជួយសម្រួលដល់សកម្មភាពពាណិជ្ជកម្ម និងសេដ្ឋកិច្ចទាំងក្នុងស្រុក និងក្នុងតំបន់ ហើយបានរួមចំណែកដល់ការលើកកម្ពស់បរិយាបន្នហិរញ្ញវត្ថុ»។
លោកជំទាវបណ្ឌិត ជា សិរី បានគូសបញ្ជាក់ថា ប្រទេសកម្ពុជាបានពង្រីកការតភ្ជាប់ប្រព័ន្ធទូទាត់ជាបន្តបន្ទាប់ជាមួយប្រទេសនានាក្នុងតំបន់ និងប្រព័ន្ធទូទាត់អន្តរជាតិ ដោយផ្តល់នូវលទ្ធភាពទូទាត់កាន់តែទូលំទូលាយសម្រាប់ប្រជាជនកម្ពុជា និងអ្នកធ្វើដំណើរអន្តរជាតិ ដែលបច្ចុប្បន្ន កម្មវិធីទូទាត់បាគងទេសចរ (Bakong Tourism App) ត្រូវបានដាក់ឱ្យប្រើប្រាស់ ដើម្បីចូលរួមចំណែកក្នុងការលើកកម្ពស់វិស័យទេសចរណ៍៕
Account
Security
Favourite Content