សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ចាម ៖ គិតមកដល់ពេលនេះ មានរយៈពេល១ខែហើយដែលរាជរដ្ឋាភិបាលកម្ពុជាបានប្រកាសដាក់ឱ្យអនុវត្តកម្មវិធីបណ្តុះបណ្តាលជំនាញបច្ចេកទេសវិជ្ជាជីវៈ ដល់យុវជនមកពីគ្រួសារក្រីក្រ និងគ្រួសារងាយរងគ្រោះនៅទូទាំងប្រទេស ចំនួនប្រមាណ ១.៥លាននាក់។ យ៉ាងណាមិញ កម្មវិធីនេះជាអាទិភាពមួយក្នុងចំណោមការងារអាទិភាពទាំង ៦ចំណុចរបស់នាយករដ្ឋមន្ត្រីក្នុងវិស័យការងារ និងបណ្តុះបណ្តាលបច្ចេកទេសវិជ្ជាជីវៈ។
បើតាមអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ក្នុងមួយខែកន្លងទៅនេះមានសិស្សចំនួន ១១ ៦១០ នាក់ ដែលមកពីគ្រួសារក្រីក្រ និងគ្រួសារងាយរងហានិភ័យ បានចុះឈ្មោះចូលរៀនវគ្គបណ្តុះបណ្តាលជំនាញវិជ្ជាជីវៈ និងបច្ចេកទេស នៅទូទាំងប្រទេស។
ដោយឡែកសម្រាប់ខេត្តកំពង់ចាម គិតត្រឹមថ្ងៃទី១២ ខែធ្នូ ឆ្នាំ២០២៣ ម្សិលមិញនេះ មានសិស្សចុះឈ្មោះចូលរៀនជំនាញចំនួន ១៦០នាក់ ស្មើនឹងប្រមាណជា ៤០% នៃផែនការរបស់ខេត្តដោយក្នុងនោះមានសិស្សដែលមកពីគ្រួសារក្រីក្រប្រមាណជា ៦០នាក់។ នេះបើតាមការបញ្ជាក់ឱ្យដឹងពីលោក ហាវ ធិន នាយកវិទ្យាស្ថានពហុបច្ចេកទេសខេត្តកំពង់ចាម។
យ៉ាងណាមិញ នាយកវិទ្យាស្ថានរូបនេះបានបន្តឱ្យដឹងថា ការផ្សព្វផ្សាយអំពីកម្មវិធីបណ្ដុះបណ្ដាលជំនាញនេះហាក់នៅមិនទាន់ជ្រាបទៅដល់ប្រជាជនតាមភូមិឃុំបានគ្រប់ជ្រុងជ្រោយនៅឡើយទេ។ ហេតុនេះ ក្នុងនាមជាអ្នកអនុវត្តកម្មវិធីរបស់ខេត្ត លោកបានដាក់ផែនការនានា ដើម្បីផ្សព្វផ្សាយអំពីព័ត៌មាននេះទៅកាន់ប្រជាជននៅទូទាំងខេត្តកំពង់ចាមតែម្ដង។
លោក ហាវ ធិន បានមានប្រសាសន៍យ៉ាងដូច្នេះថា ៖
«សម្រាប់ការផ្សព្វផ្សាយគឺយើងយល់ថា មិនទាន់បានទូលំទូលាយនៅឡើយទេ តែឥឡូវយើងបង្កើនការផ្សព្វផ្សាយដោយឱ្យមន្ត្រីម្នាក់កាន់មួយស្រុក ហើយចងក្រងជាក្រុម (Telegram) ដើម្បីងាយស្រួលទំនាក់ទំនងគ្នា»។
លោកបន្តឱ្យដឹងទៀតថា៖
«ក្រៅពីនោះ នៅក្នុងមួយស្រុកគឺមានមេឃុំ មានជំទុក និងស្មៀន ដែលពួកគាត់គឺជាអ្នកផ្សព្វផ្សាយ ក៏ដូចជាជ្រើសរើសគ្រួសារក្រីក្រ និងងាយរងគ្រោះចេញពីឃុំរបស់គាត់។ ទន្ទឹមនឹងនេះដែរ យើងក៏មានផែនការសម្រាប់ឱ្យក្រុមការងារចុះតាមផ្ទះផងដែរ»។
គួរបញ្ជាក់ថា អ្នកចុះឈ្មោះចូលរៀនជំនាញទូទាំងប្រទេសទាំងជាង១ម៉ឺននាក់នោះ មានស្រីចំនួន ៤០០១នាក់ ក្នុងនោះមកពីរាជធានីភ្នំពេញចំនួន ៥ ១១៤ នាក់ (ស្រី ១ ៦៥៧ នាក់), ខេត្តបាត់ដំបង ចំនួន១ ២០៣ នាក់ (ស្រី ៥៦៧នាក់), សៀមរាប ៧៣៦នាក់ (ស្រី ១៥៥នាក់), ពោធិ៍សាត់ ៤១៥នាក់ (ស្រី ២០៨នាក់), ព្រះសីហនុ ៤១១នាក់ (ស្រី ១៣៥នាក់) និងបណ្ដាខេត្តផ្សេងៗចំនួន ៣ ៧៣១នាក់ (ស្រី ១២៧៩នាក់)។
បើតាមអ្នកនាំពាក្យក្រសួងការងារ វិស័យនានាដែលយុវជន-យុវនារីបានចុះឈ្មោះរៀនរួមមាន ៖ វិស័យសំណង់សរុបមានចំនួន ១ ៦១៩នាក់ (ស្រី ២២៦នាក់), អគ្គិសនី និងថាមពល ៤៥៩នាក់ (ស្រី ៤៩នាក់), អេឡិចត្រូនិក ៣០៩នាក់ (ស្រី ៤៤នាក់), កម្មន្តសាល ៧៩នាក់ (ស្រី ៥នាក់), មេកានិចទូទៅ/មេកានិចរថយន្ត ១ ៧០០នាក់ (ស្រី ៨៤នាក់), ធុរកិច្ច និងព័ត៌មានវិទ្យា ៣ ៧៧៥នាក់ (ស្រី ១ ៩៨២នាក់)។
សេវាកម្ម ៦២៧នាក់ (ស្រី ៥៤០នាក់), បរិក្ខារត្រជាក់ និងកម្តៅ ១ ៧២២នាក់ (ស្រី ៧៥នាក់), ទេសចរណ៍ ៧១៨នាក់ (ស្រី ៥៣៤នាក់), និងកសិកម្ម និងកសិ-ឧស្សាហកម្ម ៦០២នាក់ (ស្រី ៤៦២នាក់)។ ដោយឡែក សម្រាប់ការបើកវគ្គបណ្តុះបណ្តាល លោក កត្តា អ៊ន បានបញ្ជាក់ថា គឺមិនទាន់ចាប់ផ្តើមនៅឡើយទេ៕
Account
Security
Favourite Content