ភ្នំពេញ៖ ស្ថានទូតចិនប្រចាំនៅកម្ពុជាបានបញ្ជាក់ជាផ្លូវការលើ Facebook របស់ខ្លួនកាលពីថ្ងៃទី៧ ខែសីហា ឆ្នាំ២០២៣កន្លងទៅនេះថា រដ្ឋបាលគយនៃប្រទេសចិនទើបបានបញ្ចប់នីតិវិធីក្នុងការអនុញ្ញាតឱ្យផលិតផលជលផលរបស់កម្ពុជាចំនួន ៤មុខទៀត អាចនាំចេញដោយផ្ទាល់ទៅកាន់ប្រទេសចិនបាន រួមមាន បង្កងប៉ាក អន្ទង់ ត្រីដំរី និងខ្យង។

ស្ថានទូតចិនប្រចាំកម្ពុជាបានបញ្ជាក់ដូច្នេះថា ផ្អែកលើពាណិជ្ជកម្មប្រពៃណី ដែលមានស្រាប់លើជលផលរវាងចិន និងកម្ពុជា រួមមានបង្កងប៉ាក អន្ទង់ ត្រីដំរី និងខ្យង សម្រេចបាននូវជលផលទាំងស្រុង ដែលត្រូវបានអនុញ្ញាតនាំចេញទៅកាន់ប្រទេសចិន។

អ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ ជំទាវ អ៊ឹម រចនា បានលើកឡើងថា ផលិតផល​ជលផល​របស់​កម្ពុជា ៤​ប្រភេទបន្ថែមទៀត គឺបង្កងប៉ាក អន្ទង់ ត្រីដំរី និងខ្យង នឹង​មាន​វត្តមាន​លើ​ទីផ្សារ​ប្រទេស​ចិន ដែល​ជា​ទីផ្សារ​មួយ​ដ៏​ធំ​ ទាំង​នៅ​ក្នុង​តំបន់ និង​ពិភពលោក​។

លោកជំទាវបានគូសបញ្ជាក់ថា ចំពោះ​ការ​បើក​ទីផ្សារផលិតផល​ជលផល​របស់​កម្ពុជា​៤​ប្រភេទបន្ថែម​ទៀត​ ទៅ​កាន់​ទីផ្សារ​ប្រទេស​ចិន​នា​ពេល​នេះ កម្ពុជាជឿជាក់ថា ផលិតផលជលផលធម្មជាតិរបស់កម្ពុជា នឹងក្លាយ​ជា​ទី​ពេញនិយមរបស់​ប្រជាជនចិន ហើយក៏ជាជោគជ័យថ្មីមួយទៀត នៅក្នុងការអភិវឌ្ឍវិស័យជលផលរបស់កម្ពុជា ព្រោះមិនត្រឹមតែជំរុញការនាំចេញ​នាំចូលរវាង​ប្រទេសទាំង២ កម្ពុជា-ចិន ប៉ុណ្ណោះទេ ប៉ុន្តែវានឹងរួមចំណែកជួយទៅដល់ជីវភាពរបស់ប្រជានេសាទកម្ពុជាផង​ដែរ។

ការអនុញ្ញាតនេះ ជាសមិទ្ធផលដ៏សំខាន់ក្នុងការនាំចេញកសិផលកម្ពុជាទៅកាន់ទីផ្សារប្រទេសចិន ហើយចំពោះក្រុមហ៊ុនដែលត្រូវបានរដ្ឋបាលគយនៃប្រទេសចិនទទួលស្គាល់សម្រាប់ការនាំចេញផលិតផលជលផលទាំងនេះគឺក្រុមហ៊ុន Cambodian Tienit International Trading ដែលបានជាប់ដំណាក់កាលនៃការត្រួតពិនិត្យរបស់រដ្ឋបាលគយប្រទេសចិន និងបានបញ្ចប់ការ​ចុះបញ្ជីដាក់របាយការណ៍។

ក្រុមហ៊ុន Cambodian Tienit International Trading ជាក្រុមហ៊ុនដំបូងគេ ដែលបានបញ្ចប់ការចុះឈ្មោះដាក់របាយការណ៍​ក្នុងការនាំចេញ​ជល​ផល​ទៅកាន់ប្រទេសចិន បន្ទាប់ពីចិន និងកម្ពុជាបានចុះហត្ថលេខារួមគ្នាលើ    «ពិធីសារលក្ខខណ្ឌ​តម្រូវភូតគាម​អនាម័យ​សម្រាប់នាំចេញជលផលទៅកាន់ប្រទេសចិន»។

សូមជម្រាបថា កាលពីខែឧសភា ឆ្នាំ២០២៣ ផលិតផលជលផលធម្មជាតិរបស់កម្ពុជាចំនួន ១១ប្រភេទ ទទួលបានការអនុញ្ញាតឱ្យនាំចេញ ទៅកាន់ទីផ្សារប្រទេសចិន ដែលផលិផលចំនួន ១១ប្រភេទនេះរួមមាន៖​ កំពឹសទឹកសាប,​ ត្រីប្រាធំ, ត្រីប្រាខ្ចៅ,​ ខ្យងទឹកសាបពីរប្រភេទ, អន្ទង់ទឹកសាប, បង្កងកណ្តូបពីរប្រភេទ, បង្គាខ្លឹង,​ បង្គាស,​ និងបង្គាប៉ារ៉ា។

ផលិតផលជលផលធម្មជាតិរបស់កម្ពុជាចំនួន ១១ប្រភេទ ត្រូវបានអគ្គរដ្ឋបាលគយចិន បានអនុម័តលើការចុះបញ្ជី​របស់ក្រុមហ៊ុននាំចេញមានឈ្មោះ KIM CHOU Co., Ltd Import Export and International Trans​portation ដែលបានស្នើសុំនាំចេញផលផលិតផលជលផលពីធម្មជាតិចំនួន ១១ប្រភេទទៅកាន់ប្រទេសចិន។

សូមជម្រាបថា រហូតមកដល់ពេលនេះ ផលិតផលកសិកម្មរបស់កម្ពុជា ដែលអាចនាំចេញប្រទេសចិន រួមមាន៖ អង្ករ ដំឡូងមីក្រៀម គ្រាប់ស្វាយចន្ទី ចេក ផ្លែស្វាយ ពោត ផ្លែមៀនប៉ៃលិន (តាង៉ែន) ត្រីប្រា ម្រេច ផលិតផលជលផលពីធម្មជាតិចំនួន ១១ប្រភេទ និងផលិតផលជលផលចិញ្ចឹម ៤មុខទៀតដែលបានបញ្ជាក់ខាងលើ៕