ភ្នំពេញ ៖ រាជរដ្ឋាភិបាលកម្ពុជា​គ្រោងនឹង​ចាយថវិកា​ប្រមាណ៨៦​ពាន់លានរៀល​ ឬប្រមាណ២១​លានដុល្លារ​អា​មេ​រិក​ សម្រាប់ត្រៀមជួសជុលផ្លូវ​ជាតិលេខ​៧៦ ពីស្នួល​ខេត្តក្រចេះ​ទៅដល់​ក្រុង​សែន​មនោរម្យ​ខេត្ត​មណ្ឌល​គីរី ។ នេះបើតាមរដ្ឋមន្ត្រីក្រសួងសាធារណការ ​និងដឹកជញ្ជូន​ថ្លែង​​ក្នុងឱកាស​ចុះពិនិត្យ​ទី​តាំង​ផ្លូ​វបាក់ស្រុត​​ ក្នុងភូមិអណ្ដូង​ក្រឡឹង ឃុំសែន​មនោរម្យ​ ស្រុកអូររាំង ខេត្ត​មណ្ឌល​គីរីនៅព្រឹក​ថ្ងៃទី​០៨ ខែសីហា ឆ្នាំ២០២៣ ។​

ឯកឧត្តម ទេសរដ្ឋមន្ត្រី ​ឯកឧត្តម​ ស៊ុន ចាន់ថុល ​រដ្ឋមន្ត្រីក្រសួងសាធារណការ និងដឹកជញ្ជូន ​បាន​មានប្រសាសន៍ថា​ ផ្លូវ​ទៅកាន់ខេត្តមណ្ឌលគីរី​អាចធានាគុណភាពបានត្រឹមតែ ៧ ទៅ ៨ ឆ្នាំប៉ុណ្ណោះ តាមស្ដង់ដារ​ដែលបានសាងសង់​ ប៉ុន្តែជាក់ស្ដែង​ផ្លូវនេះ​មានរយៈពេល​ជាង​១០ឆ្នាំម​ក​ហើយ​​​​នៅតែមានគុណភាពល្អ ។

ឯកឧត្តមបញ្ជាក់ថា ៖ ​

“ផ្លូវជាតិលេខ​៧៦​ ត្រូវបានចាប់ផ្ដើមសាងសង់​នៅឆ្នាំ២០០៧​​ និង​បា​ន​ដាក់ឱ្យដំណើរការ​ជាផ្លូវការ​នៅក្នុងឆ្នាំ២០១១ ដូច្នេះមកដល់ពេលនេះវា​មានរយៈពេល​១១ឆ្នាំ ទៅ​ ១២​ឆ្នាំ ហើយ​ នៅតែ​មានសភាពល្អ”

ឯកឧត្តម​បន្តថា​ ៖

“ឆ្នាំ២០២៤​ខាងមុខនេះ ក្រសួង​នឹង​ស្នើ​សុំថវិកា​ដើម្បីជួសជុលផ្លូ​វជាតិលេខ៧៦​ឱ្យបានល្អពី​ស្នួលទៅ​មណ្ឌលគីរីតែម្ដង ហើយបើតាមការ​ប៉ាន់ស្មាន់ ថវិកា​ចំណាយសម្រាប់ការ​ជួសជុល​គឺប្រមាណជា​៨៦​ពាន់លានរៀល ​ឬក៏ជាង ​២១​លានដុល្លារអាមេរិកប៉ុណ្ណោះ ។ សម្រាប់​ទីតាំង​ដែលបាក់ស្រុត​នោះ ការ​ចំណាយ​លើការ​ជួស​ជុល និង​ធ្វើ​ផ្លូវវាង​មានប្រមាណជា​១ពាន់លានរៀល​ ហើយពេលនេះ ក្រសួង​ក៏កំពុងពិចារណា​ថា​តើ​នឹងយកផ្លូវថ្មីសម្រាប់ធ្វើចរាចរណ៍រហូតឬក៏​ត្រូវជួសជុលផ្លូវចាស់​នោះឡើង​វិញ”

ឯកឧត្តម​បាន​បន្ថែមថា រដ្ឋាភិបាល​បានចំណាយថវិកា​យ៉ាងច្រើន​ក្នុងការ​ជួសជុល​ថែទាំ និង​សាងស​ង់​ហេដ្ឋា​រចនាសម្ព័ន្ធផ្លូវ ស្ពាន ដើម្បីសម្រួលដល់ការធ្វើដំណើររបស់​ប្រជាពលរដ្ឋ​ពី​តំបន់មួយទៅ​តំបន់មួយ​ពី​ខេ​ត្ត​មួ​យ​ទៅ​ខេត្ត​មួយ និងជួយសម្រួលដល់ការ​ជំរុញ​វិស័យ​ទេសចរណ៍​នៅកម្ពុជា​កាន់តែមានភាពប្រសើរ។ មិន​តែប៉ុ​ណ្ណោះ​ ការ​សាងសង់ហេដ្ឋារចនាសម្ព័ន្ធផ្លូវនេះដែរ ក៏បានទាក់ទាញ​និងជំរុញការ​វិនិយោគ​ទៅដល់​បណ្ដាខេត្ត​ដែល​នៅឆ្ងាយៗពីរាជធានី​ភ្នំពេញបានមួយកម្រិតផងដែរ។ ​

ជាកា​រកត់សម្គាល់​ក្នុងរយៈពេល​ប៉ុន្មានឆ្នាំចុងក្រោយនេះ ខេត្តមណ្ឌលគីរី​ហាក់ទទួលបានការ​នូវការ​វិនិយោគ​កាន់តែខ្លាំងបន្ថែម​ទៀត ជាពិសេស​ទៅលើ​វិស័យបដិសណ្ឋារកិច្ច ទេសចរណ៍ និង​កសិ-ទេសចរណ៍ ក្នុងនោះ​ដែរ​មួយរយៈចុងក្រោយនេះ​ គេសង្កេតឃើញថា នៅខេត្តមណ្ឌលគីរី​មានការសាងសង់លើ​ផ្ទះសំណាក់ រីសត និង​ភោជនីយដ្ឋាន​ច្រើន​ ហើយក្នុងនោះដែរ សកម្មភាពនៃការ​ទិញលក់ដីធ្លី  នៅក្នុង​ខេត្តមណ្ឌលគីរី​ក៏ឃើញ​ថា​​មួយរយៈមុននេះ​​មានភាពល្អប្រសើរ និង​បានថមថយ​វិញនៅពេល​មានវិបត្តិកូវីដ​១៩ និង​ក្នុងអំឡុង​នៃ​សង្គ្រា​ម​រវាងរុស្ស៊ីនិងអ៊ុយក្រែន។​

លោក​ មាឃ ឬទ្ធីជ័យ ភ្នាក់ងារអចលនទ្រព្យ​មួយរូប​ប្រចាំខេត្ត​មណ្ឌលគីរីនៃក្រុមហ៊ុន Century 21 Zillion Holding បានមានប្រសាសន៍លើកឡើងថា មណ្ឌលគីរី​បានក្លាយជា​ខេត្ត​មួយដែលមានភាពទាក់ទាញ​សម្រា​ប់​​អ្នកអភិវឌ្ឍ​ន៍ទេសចរណ៍ ដូចជា​ការទិញដីដើម្បីត្រៀម​សង់​រីសត ​បឹង​ហ្កាឡូ ផ្ទះសំណាក់ និង​សណ្ឋាគារ​ជា​ដើម  ៕